వీసీ బిజె రావుకు డిప్యూటీ సీఎం భట్టి విక్రమార్క మల్లు లేఖ
హైదరాబాద్ సెంట్రల్ యూనివర్సిటీ లో పోలీసు బలగాలను ఉపసంహరిస్తున్నామని డిప్యూటీ సీఎం భట్టి విక్రమార్క వెల్లడించారు. ఈ మేరకు సోమవారం యూనివర్సిటీ వీసీ బిజె రావుకు డిప్యూటీ సీఎం లేఖ రాశారు. హైదరాబాద్ సెంట్రల్ యూనివర్సిటీ కంచె గచ్చిబౌలి సమస్యపై డాక్టర్ బి.ఆర్ అంబేడ్కర్ రాష్ట్ర సచివాలయంలో జరిగిన సబ్ కమిటీ సమావేశంలో హైదరాబాద్ సెంట్రల్ యూనివర్సిటీ ఉపాధ్యాయ సంఘం ప్రతినిధులు ప్రొఫెసర్ సౌమ్య దేచమ్మ సీసీ, ప్రొఫెసర్ శ్రీపర్ణ దాస్, ప్రొఫెసర్ భంగ్య భూక్య, పౌర సంఘాల ప్రతినిధులు విస్సా కిరణ్‌కుమార్, ఎన్ ఏపీఎం, వి.సంధ్య, డబ్ల్యూటీ జేఏసీ కె.సజయ, డబ్ల్యూటీజేఏసీ ఇమ్రాన్ సిద్ధిఖీ, సీడబ్ల్యూసీ ఇండియా ప్రతినిధులు హైదరాబాద్ సెంట్రల్ యూనివర్సిటీలో మోహరించిన పోలీసు బలగాలను ఉపసంహరించుకోవాలని మంత్రుల బృందానికి వినతిపత్రం సమర్పించారు. వారు చేసిన విజ్ఞప్తిని మంత్రుల సబ్ కమిటీ సానుకూలంగా స్పందించింది.
సబ్ కమిటీ అధ్యక్షులు రాష్ట్ర ఉప ముఖ్యమంత్రి విక్రమార్క మల్లు హైదరాబాద్ సెంట్రల్ యూనివర్సిటీ విద్యార్థులు అధ్యాపకులు, రిజిస్ట్రార్ గతంలో చేసిన విజ్ఞప్తిని క్రోడీకరిస్తూ యూనివర్సిటీ వైస్ ఛాన్సలర్ కు లేఖ రాశారు. హైదరాబాద్ సెంట్రల్ యూనివర్సిటీ స్వయం ప్రతిపత్తి, బోధన, పరిశోధనలకు సురక్షితంగా ఉండాలని తెలంగాణ ప్రభుత్వానికి అచంచల విశ్వాసం ఉందని పునరుద్గాటిస్తున్నామని తెలిపారు. ఈనెల 2న యూనివర్సిటీలో శాంతి భద్రతలు, విద్యార్థులు అధ్యాపకుల భద్రతకు క్యాంపస్ లో పోలీసులను అందుబాటులో ఉంచాల్సిందిగా
యూనివర్సిటీ రిజిస్ట్రార్ కోరారని, ఆ మేరకు గతంలో పోలీసు బందోబస్తు ఏర్పాటు చేశామని చెప్పారు. ఉపాధ్యాయ జేేఏసీ, పౌర సంఘం సభ్యుల విజ్ఞప్తికి స్పందించి కంచ గచ్చిబౌలి లోని 400 ఎకరాలను మినహాయించి మెయిన్ క్యాంపస్ సమీపంలో పోలీస్ బందోబస్తు ఉపసంహరించుకోవాలని నిర్ణయించినట్టు తెలిపారు.
సుప్రీంకోర్టు ఆదేశానికి అనుగుణంగా 400 ఎకరాలు ఉన్న కంచ గచ్చిబౌలి లో చెట్ల సంరక్షణ తప్ప ఏ ఇతర కార్యకలాపాలకు అనుమతించకూడదని తెలిపారు. క్యాంపస్ లో కార్యకలాపాలు శాంతియుతంగా జరిగేలా మీ సొంత సెక్యూరిటీ ఏర్పాటు చేసుకొని తగిన చర్యలు తీసుకోవాలని లేఖలో డిప్యూటీ సీఎం కోరారు. మీ నుంచి లిఖిత పూర్వకంగా హామీ వచ్చిన తర్వాత పోలీసులను ఉపసంహరిస్తామని పేర్కొన్నారు. ప్రభుత్వ౦ హెచ్ సీయూకి సంబంధించిన అంశంలో అందరితోనూ చర్చలకు ఎల్లవేళలా సిద్ధంగా ఉందని తమ పక్షాన మీరు హామీ ఇవ్వాలని కోరారు. విద్య, నైపుణ్యం సామాజిక బాధ్యత సాధించడంలో యూనివర్సిటీకి రాష్ట్ర ప్రభుత్వం వెన్నుదన్నుగా నిలిచి పని చేయడానికి ఎల్లప్పుడూ సిద్ధంగా ఉంటుందని భట్టి విక్రమార్క లేఖలో పేర్కొన్నారు.
