- హైదరాబాద్ లో భూగర్భజలాలతోపాటు తాగునీటి వనరులు కలుషితం
- నీటిశుద్ధి ప్రాజెక్టులకు మెరుగుపరచండి..
- పార్లమెంట్ లో జలశక్తి మంత్రిని కోరిన ఎంపీ ఈటల రాజేందర్
వేగవంతమైన పట్టణ విస్తరణతో, పెరుగుతున్న జనాభా అవసరాలను తీర్చడానికి రాష్ట్ర ప్రభుత్వాలు తగినంత మౌలిక సదుపాయాలు అందించడంలో ఇబ్బంది పడుతున్నాయని మల్కాజిగిరి ఎంపి ఈటల రాజేందర్ అన్నారు. పార్లమెంట్ సమావేశాల్లో ఆయన మాట్లాడుతూ.. కేంద్ర ప్రభుత్వం ఈ సవాలును గుర్తించి, స్మార్ట్ సిటీస్ మిషన్, అమృత్ పథకం కింద పారిశుధ్యం, సురక్షితమైన తాగునీటి సౌకర్యాల కోసం వేల కోట్ల రూపాయలను కేటాయించడం ప్రశంసనీయమని అన్నారు.
అదే స్ఫూర్తితో, తన పార్లమెంటరీ నియోజకవర్గం మల్కాజ్‌గిరిలో పారిశుద్ధ్య ప్రాజెక్టులకు, తాగునీటి సౌకర్యాలకు ప్రత్యేక నిధులు కేటాయించాలని జలశక్తి మంత్రిత్వ శాఖను కోరారు. హైదరాబాద్‌లోని సరస్సులు, మురుగునీటితో కలుషితం కావడం వల్ల నగరం పర్యావరణ సంక్షోభాన్ని ఎదుర్కొంటోందని తెలిపారు. హుస్సేన్ సాగర్‌తో సహా దాని నీటి వనరులు అన్ని మురుగునీటి ప్రవాహాల కారణంగా కలుషితమయ్యాయి. ఇది జల పర్యావరణ వ్యవస్థలను నాశనం చేసి, చేపలు, ఇతర జీవవైవిధ్యాన్ని చంపే కాలుష్యానికి దారితీసింది. కలుషితమైన నీరు బయటకు రావడం, భూగర్భ జలలు కాలుష్యానికి గురికావడం వల్ల, నీటి ద్వారా సంక్రమించే వ్యాధులకు కారణమవుతున్నది.
ఈ సరస్సులను పునరుద్ధరించడానికి, మురుగునీటిని మళ్లించడానికి, ప్రత్యామ్నాయ మురుగునీటి శుద్ధి మౌలిక సదుపాయాల అభివృద్ధికి, శుద్ధి చేసిన నీరు మాత్రమే సరస్సులోకి వచ్చేలా మురుగునీటి శుద్ధి కర్మాగారాలను బలోపేతం చేయడం వంటి కొన్ని తక్షణ ప్రత్యామ్నాయాలకు తగిన నిధులు కేటాయించాలని జలశక్తి మంత్రిని కోరారు. ఆధునిక మురుగు నీటి నిర్వహణ వ్యవస్థల ద్వారా శుద్ధి చేయని మురుగు నీటిని సరస్సుల నుంచి దూరంగా మళ్లించాల్సిన అవసరం ఉందని పేర్కొన్నారు. హైదరాబాద్‌లోని మూసీ నదిని ప్రభావితం చేస్తున్న తీవ్రమైన కాలుష్య సంక్షోభంతో ఇబ్బందులు ఎదురవుతున్నాయని తెలిపారు.
నియంత్రించబడని పారిశ్రామిక వ్యర్థాలు, రసాయన వ్యర్థాల కారణంగా మూసీ తీవ్రంగా కలుషితమైంది. దీంతో పర్యావరణ ఆరోగ్య ప్రమాదాలను కలిగిస్తుంది. మూసీ భూగర్భ జలాలతోపాటు తాగునీటి వనరులను కలుషితం చేస్తోందన్నారు. విషపూరిత గాలి, నీటి ద్వారా ప్రజలు అనారోగ్యానికి గురవుతున్నారు. మంత్రిత్వ శాఖ తగినంత నిధులను కేటాయించాలని, నది వెంబడి ఉన్న మురుగునీటి శుద్ధి కర్మాగారాలను మెరుగుపరచడానికి, అప్‌గ్రేడ్ చేయడానికి తగిన చర్యలు తీసుకోవాలని ఎంపీ ఈటల రాజేందర్ కోరారు. కేంద్ర ప్రభుత్వం నీటి మౌలిక సదుపాయాల ప్రాజెక్టులకు చురుకుగా మద్దతు ఇస్తున్నందున, అందరికీ శుభ్రమైన తాగునీటిని పొందేలా తెలంగాణకు ఆర్థిక సహాయం అందించాలని కోరారు.
