– దిల్లీలో ప్రజా విచారణ
– నాలుగు పోలింగ్ కేంద్రాల్లో 416 పేర్లు తొలగించారని ఆరోపణ
– సీఈసీ జ్ఞానేశ్ కుమార్ రాజీనామా వరకు పోరాటం
– 30న ప్రజా అభిశంసనకు అనుమతిపై వివాదం
– 1న రామ్‌లీలా మైదాన్ సభ అనుమతి కొనసాగుతుందన్న పోలీసులు
దిల్లీ/హైదరాబాద్, ప్రజాతంత్ర ప్రత్యేక వార్త | అక్టోబర్ 27 :వోటర్ల జాబితాల ప్రత్యేక సమగ్ర సవరణ (‘సర్’) పేరుతో అర్హులైన పౌరుల వోటు హక్కును హరిస్తున్నారని లోక్‌సభ ప్రతిపక్ష నేత రాహుల్ గాంధీ మంగళవారం మరోసారి ఆరోపించారు. దిల్లీలోని త్రిలోక్‌పురి బ్లాక్–20లో నిర్వహించిన ‘వోటు అధికార్, జీనే కా అధికార్’ ప్రజావిచారణ కార్యక్రమంలో పాల్గొన్న ఆయన ఎన్నికల వ్యవస్థలో అత్యున్నత స్థాయి నుంచే అక్రమాలు జరుగుతున్నాయని విమర్శించారు. నాలుగు పోలింగ్ కేంద్రాల పరిధిలో 416 మంది వోటర్ల పేర్లను అక్రమంగా తొలగించారని రాహుల్ గాంధీ ఆరోపించారు. ప్రధాన ఎన్నికల కమిషనర్ జ్ఞానేశ్ కుమార్ ఈ ఆరోపణలకు సమాధానం చెప్పాలని డిమాండ్ చేశారు. సీఈసీ రాజీనామా చేసే వరకు లేదా పదవి నుంచి తొలగించే వరకు ప్రతిపక్షాల ఉద్యమం కొనసాగుతుందని ప్రకటించారు. 30న ప్రధాన ఎన్నికల కమిషనర్ జ్ఞానేశ్ కుమార్‌పై ప్రతీకాత్మక ప్రజా అభిశంసన నిర్వహించేందుకు ప్రతిపక్ష ఇండి కూటమి సిద్ధమవుతున్నది. దిల్లీలోని అశోక్ హోటల్‌లో నమూనా పార్లమెంట్ నిర్వహించాలని ప్రతిపాదించినప్పటికీ కార్యక్రమానికి అనుమతి లభించలేదని కాంగ్రెస్ ప్రధాన కార్యదర్శి కేసీ వేణుగోపాల్ మంగళవారం ఆరోపించారు. నిరసనలను అడ్డుకునేందుకు కేంద్ర ప్రభుత్వం ప్రయత్నిస్తున్న‌దని విమర్శించారు. అవసరమైతే కేంద్ర హోంమంత్రి అమిత్ షా, ప్రధానమంత్రి నరేంద్ర మోదీ నివాసాల వద్ద కూడా ధర్నా చేస్తామని హెచ్చరించారు. దిల్లీ రామ్‌లీలా మైదాన్‌లో నవంబర్ 1న ఇండి కూటమి నిర్వహించనున్న భారీ సభకు గతంలో ఇచ్చిన పోలీసు నిరభ్యంతర పత్రాన్ని ఉపసంహరించలేదని దిల్లీ పోలీసులు మంగళవారం స్పష్టం చేశారు. 25 నుంచి నవంబర్ 3 వరకు మైదానం వినియోగానికి సంబంధించిన పోలీసు అనుమతి కొనసాగుతుందని వెల్లడించారు. అయితే సభ ఏర్పాట్ల పనులను పోలీసులు అడ్డుకుంటున్నారని వేణుగోపాల్ ఆరోపించారు. ప్రధాని మోదీ, హోంమంత్రి అమిత్ షా ఆదేశాల మేరకే ఈ చర్యలు జరుగుతున్నాయని విమర్శించారు. ఇండి కూటమి సభకు పది లక్షల మందిని సమీకరించాలని కాంగ్రెస్ లక్ష్యంగా పెట్టుకుంది. మంగళవారం జరిగిన సుప్రీంకోర్టు విచారణలో ఎన్నికల సంఘం తన నిర్ణయాలను సమర్థిస్తూ దాఖలు చేసిన 248 పేజీల అఫిడవిట్ కీలకంగా మారింది. ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్‌మాల్య బాగ్చీ, జస్టిస్ వి. మోహనల ధర్మాసనం ఎన్నికల సంఘం సమాధానంపై ప్రతిస్పందించేందుకు పిటిషనర్లకు పది రోజుల గడువు ఇచ్చింది. తదుపరి విచారణ నవంబర్ 17న జరగనుంది. ఎన్నికల సంఘం తన అఫిడవిట్‌లో ‘సర్’కు సంబంధించిన నిర్ణయాలను ముగ్గురు కమిషనర్లు ఏకగ్రీవంగా ఆమోదించారని పేర్కొంది. ఫారం–6ను చట్టవిరుద్ధంగా మార్చారన్న ఆరోపణను తిరస్కరించింది. వోటర్ల పేర్లను చేర్చడం, తొలగించడం సంబంధిత ఎన్నికల నమోదు అధికారుల నిర్ణయాల ద్వారానే జరుగుతుందని వివరించింది. అయితే ఎన్నికల సంఘం అంతర్గత సమాచారాన్ని, నిర్ణయాలకు సంబంధించిన ఫైళ్లను భద్రపరచాలని రాహుల్ గాంధీ తరఫు న్యాయవాది అభిషేక్ మనుసింఘ్వీ కోరారు. ఈ పత్రాల ద్వారా నిర్ణయ ప్రక్రియలో సంప్రదింపులు జరిగాయో లేదో తెలుసుకోవచ్చని వాదించారు. తృణమూల్ కాంగ్రెస్ ఎంపీ డోలా సేన్ దాఖలు చేసిన మరో పిటిషన్‌పైనా సుప్రీంకోర్టు ఎన్నికల సంఘం స్పందన కోరింది.
తెలంగాణకు సంబంధించిన మరో అంశం
తెలంగాణకు చెందిన సమాచార హక్కు కార్యకర్త ఎం.ఏ.ముజీబ్ అయ్యూబ్ ‘సర్’లో ఉపయోగించే సాంకేతిక వ్యవస్థల వివరాలను కోరుతూ దాఖలు చేసిన ఆర్టీఐ దరఖాస్తుకు ఎన్నికల సంఘం ఇచ్చిన సమాధానం తాజాగా వెలుగులోకి వొచ్చింది. ‘సర్’ కోసం ప్రత్యేకంగా కొత్త సాఫ్ట్‌వేర్‌ను రూపొందించలేదని ఎన్నికల సంఘం పేర్కొంది. అయితే వోటర్ల వివరాల్లో వ్యత్యాసాలను గుర్తించేందుకు ఉపయోగించే సాంకేతిక పద్ధతులపై పూర్తి వివరాలు వెల్లడించలేదు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
