రాష్ట్రంలో సురక్షిత కమ్యూనిటీల నిర్మాణం

హైదరాబాద్, ప్రజాతంత్ర, మే 1 : కమ్యూనిటీలలో భద్రతా వ్యవస్థలను క్రమం తప్పకుండా నిర్వహించాలని, పారదర్శక పాలనపై దృష్టి సారించాలని రెసిడెంట్ వెల్ఫేర్ అసోసియేషన్‌లకు జీహెచఎంసీ కమిషనర్ ఆర్.వి.కర్ణన్ సూచించారు. అలాగే కొనసాగుతున్న జనగణన డిజిటల్ సెల్ఫ్-ఎన్యూమరేషన్‌కు మద్దతు ఇవ్వాలని విజ్ఞప్తి చేశారు. రాష్ట్రంలోని రెసిడెంట్ వెల్ఫేర్ అసోసియేషన్స్ (ఆర్‌డబ్ల్యూఏ), హౌసింగ్ సొసైటీల బాధ్యతలపై దృష్టి సారించి నరెడ్కో((NAREDCO) తెలంగాణ, ఫెడరేషన్ ఆఫ్ తెలంగాణ ఛాంబర్స్ ఆఫ్ కామర్స్ అండ్ ఇండస్ట్రీ(ఎఫ్‌టీసీసీఐ), యునైటెడ్ ఫెడరేషన్ ఆఫ్ రెసిడెంట్ వెల్ఫేర్ అసోసియేషన్స్(యూ-ఎఫ్‌ఈఆర్‌డబ్ల్యూఏఎస్) సంయుక్తంగా హైదరాబాద్‌లోని ఫెడరేషన్ హౌస్‌లో గురువారం ప్రత్యేక వర్క్‌షాప్‌ను నిర్వహించాయి. చట్టబద్ధమైన పునరుద్ధరణలు, భద్రతా సమ్మతి, సౌకర్య నిర్వహణ అంశాలపై ఈ వర్క్‌షాప్ జరిగింది. రాష్ట్రంలో భద్రతా ప్రమాణాలను బలోపేతం చేయడమే లక్ష్యంగా ప్రభుత్వ అధికారులు, పరిశ్రమ నాయకులు, ఆర్‌డబ్ల్యూఏలు, ఫెసిలిటీ మేనేజర్‌లు, భద్రతా నిపుణులను ఈ కార్యక్రమం ఒకే వేదికపైకి తీసుకొచ్చింది. నరెడ్కో అధ్యక్షుడు కె.శ్రీధర్ రెడ్డి మాట్లాడుతూ చట్టబద్ధమైన పునరుద్ధరణలు, భద్రతా సమ్మతి, సమర్థవంతమైన సౌకర్య నిర్వహణపై ఆర్‌డబ్ల్యుఏలకు అవగాహన పెంపొందించేందుకు నరెడ్కో కట్టుబడి ఉందని తెలిపారు. అగ్నిమాపక సేవల డీజీ విక్రమ్ సింగ్ మాన్ మాట్లాడుతూ అగ్నిమాపక భద్రత అనేది ఉమ్మడి బాధ్యత అని, దీనికి క్రమం తప్పని నిర్వహణ, చురుకైన సంసిద్ధత అవసరమని ఉద్ఘాటించారు. సురక్షిత కమ్యూనిటీల కోసం ఆర్‌డబ్ల్యూఏలు భద్రతకు నిరంతర ప్రాధాన్యత ఇవ్వాలని సూచించారు. హెచ్‌ఎండబ్ల్యూఎస్‌ఎస్‌బీ ఎండీ అశోక్ రెడ్డి మాట్లాడుతూ పట్టణ ప్రాంతాల్లో నీటి సంరక్షణ, వర్షపు నీటి నిల్వ, శుద్ధి చేసిన నీటి వినియోగాన్ని ప్రోత్సహించడంలో ఆర్‌డబ్ల్యూఏలు చురుకైన పాత్ర పోషించాలని కోరారు. ఫైర్ సేఫ్టీ క్లియరెన్స్‌లు, లిఫ్ట్ నిర్వహణ, పర్యావరణ నిబంధనలు, స్ట్రక్చరల్ ఆడిట్‌లు సహా తప్పనిసరి పునరుద్ధరణలు, ధ్రువీకరణలపై ఈ సెషన్ స్పష్టమైన మార్గదర్శకాలను అందించింది. ఈ చొరవ ద్వారా రాష్ట్రంలోని పట్టణ కమ్యూనిటీలు చట్టబద్ధంగా కట్టుబడి ఉంటూ సురక్షితంగా, మరింత స్థితిస్థాపకత కలిగి ఉండేలా చర్యలు తీసుకోవడం ఒక ముఖ్యమైన అడుగుగా నరెడ్కో పేర్కొంది.

——————————————————————————————————————————————————————–

తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్‌సైట్ ను సందర్శించండి. తాజా అప్‌డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి..   మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.