బాలాపూర్ లడ్డూ @ రూ.39 లక్షలు

-వేలం పాటలో దక్కించుకున్న సామ ప్రణీత్ రెడ్డి
– నిమజ్జన వేడుకలను తిలకించిన మాజీ మంత్రి సబిత

మహేశ్వరం, ప్రజాతంత్ర సెప్టెంబర్ 25: ప్రపంచ ప్రసిద్ధి చెందిన బాలాపూర్ గణపతి లడ్డు వేలం పాటకు  జిహెచ్ఎంసి బడంగ్ పేట్ సర్కిల్ బాలాపూర్ గ్రామం బొడ్డురాయి వేదికయ్యింది. శుక్రవారం ఉదయం ఐదు గంటలకు ప్రత్యేక పూజలు నిర్వహించి, భజనలు చేస్తూ.. స్వామి వారి పాటలు పాడుతూ.. ఊరు చుట్టూ ఊరేగింపు నిర్వహించి, గ్రామ బొడ్రాయి వద్దకు గణనాధుని తీసుకువచ్చారు. అనివార్య కారణాలవల్ల ఊరేగింపుకు కొంత ఆలస్యం జరగడంతో, లడ్డు వేలం పాట దాదాపు రెండు గంటలకు పైగా ఆలస్యం అయింది. భక్తులు ఎంతో ఉత్కంఠగా ఎదురు చూస్తున్న బాలాపూర్ గణేష్ లడ్డు వేలం పాటను వేలాది మంది భక్త జన సందోహం నడుమ ఉత్సవ కమిటీ సభ్యులు వంగేటి లక్ష్మారెడ్డి ప్రారంభించారు. లడ్డు వేలం పాటలో సాహెబ్ నగర్ కు చెందిన సామ ప్రణీత్ రెడ్డి, చంపాపేట్కు చెందిన మర్రి రవికిరణ్ రెడ్డి, చంపా పేట్కు చెందిన కెవిఆర్ ఫ్లవర్ మర్చంట్ కందాడ శాలిని వీరేందర్ రెడ్డి, హస్తినా పురంకు చెందిన కంచర్ల శివారెడ్డి, లండన్ నుంచి సుశి ఆండ్ కో నుంచి సామ దయానంద్ రెడ్డి, సామ వరానంద్ రెడ్డి, హస్తినా పురంకు చెందిన జిఎర్ఆర్ డెవెలపర్స్ నుంచి గడ్డం నవీన్ రెడ్డి, బాలాపూర్ నుంచి ఇబ్రాం ప్రత్యూష్ , బాలాపూర్ కు చెందిన రితున్ రెడ్డితో కలిపి 9 మంది ప్రధానంగా వేలం పాటలో పాల్గొన్నారు. రూ.1016తో ప్రారంభమై హోరాహోరీగా సాగిన పోరులో రూ.39 లక్షలకు సాహెబ్ నగర్ కు చెందిన సామ ప్రణీత్ రెడ్డి  21 కిలోల లడ్డును వేలం పాటలో దక్కించుకున్నారు. తాజాగా 33వ సారి బాలాపూర్ గణేష్ లడ్డును వేలం పాటలో దక్కించుకున్న జాబితాలో సామ ప్రణీత్ రెడ్డి చేరిపోయారు.

బాలాపూర్ గణేష్ ఉత్సవాలను దాదాపు 46 ఏళ్లుగా నిర్వహిస్తున్నారు. 33 సంవత్సరాలుగా అత్యంత ప్రతిష్ఠాత్మకంగా నిర్వహించే బాలాపూర్ గణేష్  లడ్డు వేలం పాటకు తెలుగు రాష్ట్రాలలోనే కాక దేశ, ప్రపంచ వ్యాప్తంగా విశిష్ఠ గుర్తింపు పొందింది. కరోనా కారణంగా 2020లో బాలాపూర్ గణపతి లడ్డు వేలం పాటను రద్దు చేసి, అప్పటి సీఎం కేసీఆర్కు బాలాపూర్ గణేష్ ఉత్సవ సమితి అధ్యక్షుడు కళ్లెం నిరంజన్ రెడ్డి ఆధ్వర్యంలో లడ్డు బహుకరించారు. 2025లో బాలాపూర్ గణేష్ లడ్డును వేలం పాటలో దక్కించుకున్న లింగాల దశరథ్ గౌడ్ రూ.35 లక్షల నగదును గణేష్ ఉత్సవ సమితికి అందజేశారు. నగదును అందజేసిన దశరథ్ గౌడ్కు గణేష్ ఉత్సవ సమితి తరపున బంగారు చైన్ ను అందజేశారు.  అత్యంత ప్రతిష్ఠాత్మకంగా నిర్వహించిన బాలాపూర్ గణేష్ లడ్డు  వేలం పాటకు  మాజీ మంత్రి, మహేశ్వరం ఎమ్మెల్యే పట్లోళ్ల సబితా ఇంద్రారెడ్డి, మాజీ ఎమ్మెల్యే తీగల కృష్ణ రెడ్డి, రంగా రెడ్డి జిల్లా డీసీసీ అధ్యక్షురాలు చిగిరింత పారిజాత నర్సింహా రెడ్డి, జిల్లా మాజీ జెడ్పీ చైర్‌పర్సన్ డాక్టర్ తీగల అనితా రెడ్డి, భాగ్యనగర్ గణేష్ ఉత్సవ సమితి ప్రతినిధులు రాఘవరెడ్డి, శశిధర్, బీఆర్ఎస్ సీనియర్ నాయకులు వంగేటి లక్ష్మి, కాంగ్రెస్ సీనియర్ నాయకులు ఏనుగు జంగా రెడ్డి, వంగేటి ప్రభాకర్ రెడ్డి, బీజేపీ సీనియర్ నాయకులు కొలను శంకర్ రెడ్డి తదితరులు పాల్గొన్నారు. లడ్డును వేలం పాటలో దక్కించుకున్న సామ ప్రణీత్ రెడ్డి మాట్లాడుతూ.. బాలాపూర్ గణేష్ లడ్డును వేలం పాటలో దక్కించుకోవడం చాలా సంతోషంగా ఉందని పేర్కొన్నారు.