సోనియ‌మ్మ మాట శిలాశాస‌నం…

చేవెళ్ల‌, ప్రజాతంత్ర, ఫిబ్రవరి 27:  ప్ర‌తి గ్రామంలో వివిధ సామాజిక‌వ‌ర్గాల‌కు చెందిన అయిదుగురితో క‌లిపి ఇందిర‌మ్మ క‌మిటీలు వేస్తామ‌ని,  ఇళ్లు, పింఛ‌న్లు, సిలెండ‌ర్లు,  ఏ ప‌థ‌క‌మైనా ఆ క‌మిటీల  ద్వారానే పేద‌ల‌కు చేర్చే బాధ్య‌త త‌మ ప్ర‌భుత్వం తీసుకుంటుంద‌ని ముఖ్య‌మంత్రి రేవంత్ రెడ్డి తెలిపారు. గెలిచిన త‌ర్వాత నాయ‌కులు కార్య‌క‌ర్త‌ల‌ను మ‌ర్చిపోతార‌నే ప్ర‌చారం ఉంద‌ని.. తాము అలా కాద‌ని పార్టీ అధికారంలోకి రావ‌డానికి కార‌ణ‌మైన కార్య‌క‌ర్త‌ల‌ను వార్డు స‌భ్యులుగా, స‌ర్పంచులుగా, ఎమ్పీటీసీ సభ్యులుగా, ఎంపీపీలుగా, జడ్పీటీసీ స‌భ్యుల‌గా, జ‌డ్పీ అధ్య‌క్షులుగా గెలిపించుకునే వ‌ర‌కు అండ‌గా నిల‌బ‌డ‌తామ‌ని ఆయ‌న హామీ ఇచ్చారు. 75 రోజులుగా 18 గంట‌లు ప‌ని చేస్తున్నాన‌ని, ఒక్క రోజు సెల‌వు తీసుకోలేదని, సాధ్య‌మైనంత మేర కార్య‌క‌ర్త‌ల‌ను క‌లిశాన‌ని ముఖ్య‌మంత్రి తెలిపారు.  వివిధ స‌మీక్ష‌లు, ఇత‌ర కార‌ణాల‌తో  అంద‌రిని క‌ల‌వ‌లేక‌పోవ‌చ్చున‌ని, త్వ‌ర‌లోనే నియోజ‌క‌వ‌ర్గాలు, జిల్లాలు తిరిగి కార్య‌క‌ర్త‌ల‌తో కూర్చొంటాన‌ని, వారి ఆలోచ‌న‌లు తీసుకొని రాష్ట్ర అభివృద్ధికి వాటిని వినియోగిస్తామ‌న్నారు.  గ‌త ప్ర‌భుత్వంలో అణిచివేత‌, కేసులు ఎదుర్కొన కార్య‌క‌ర్త‌లు లేరంటే అతిశ‌యోక్తి కాద‌న్నారు. గ‌త ప‌దేళ్లో నాటి కేసీఆర్ ప్ర‌భుత్వం ఎన్ని కేసులు పెట్టినా ఆస్తులు ఆక్ర‌మించుకున్నా, అక్ర‌మ కేసులు పెట్టినా నిటారుగా నిల‌బ‌డి కొట్లాడి కాంగ్రెస్ అధికారంలోకి రావ‌డానికి, కార్య‌క‌ర్త‌లు త‌మ ర‌క్తాన్ని చెమ‌ట‌గా మార్చి క‌ష్ట‌ప‌డ్డార‌ని, వారిని గుండెల్లో పెట్టుకొని చూసుకుంటాన‌న్నారు.  కార్య‌క‌ర్త‌ల‌కు తోడుగా ఉంటాన‌ని ముఖ్య‌మంత్రి రేవంత్ రెడ్డి అన్నారు.

కార్య‌క‌ర్త‌ల త్యాగాన్ని మ‌రువ‌మ‌ని, ప‌దేళ్లు కాంగ్రెస్ జెండాను భుజాలు కాయ‌లు కాసేలా మోసిన వారి రుణం తీర్చుకునే స‌మ‌యం వ‌చ్చింద‌న్నారు. స‌చివాల‌యంలో రూ.500కే సిలిండ‌ర్ స‌ర‌ఫ‌రా, 200 యూనిట్ల వ‌ర‌కు ఉచిత విద్యుత్ గ్యారంటీల అమ‌లును మంగ‌ళ‌వారం ప్రారంభించిన అనంత‌రం చేవెళ్లకు ముఖ్య‌మంత్రి వెళ్లారు.  చేవెళ్ల‌లో ఏర్పాటు చేసిన జ‌న‌జాత‌ర స‌భ‌లో ముఖ్య‌మంత్రి మాట్లాడుతూ శాస‌న‌స‌భ ఎన్నిక‌ల‌కు ముందు తుక్కుగూడ స‌భ‌లో సెప్టెంబ‌రు 17న సోనియా గాంధీ తెలంగాణ ప్ర‌జ‌ల‌కు ఆరు గ్యారెంటీల‌ను ఇచ్చారని ముఖ్య‌మంత్రి రేవంత్ రెడ్డి గుర్తు చేశారు. నాడు ప‌ది ల‌క్ష‌ల మంది సాక్షిగా నాలుగు కోట్ల ప్ర‌జ‌ల‌కు సోనియా హామీ ఇచ్చింద‌న్నారు.  2004 లో తెలంగాణ ఇస్తాన‌ని క‌రీంన‌గ‌ర్‌లో మాట ఇచ్చిన సోనియా గాంధీ ఎన్ని కష్టాలు, ఎన్ని న‌ష్టాలు వ‌చ్చినా, ఆంధ్ర‌ప్ర‌దేశ్‌లో పార్టీ న‌ష్ట‌పోయినా తెలంగాణ ఇచ్చింద‌న్నారు. అలానే తుక్కుగూడ స‌భ‌లో సోనియ‌మ్మ ఇచ్చిన మాటపై విశ్వాసంతో రాష్ట్రంలో ప్ర‌జ‌లు ఇందిర‌మ్మ రాజ్యం తెచ్చార‌ని ముఖ్య‌మంత్రి అన్నారు.  సోనియ‌మ్మ ఇచ్చిన ఆరు గ్యారెంటీల అమ‌లుకు త‌మ ప్ర‌భుత్వం క‌ట్టుబ‌డి ఉంద‌న్నారు. డిసెంబ‌రు 7న అధికారం చేప‌ట్టిన తాము 48 గంట‌ల్లోనే  ఆడ బిడ్డ‌ల‌కు బ‌స్సుల్లో ఉచిత ప్ర‌యాణం సౌక‌ర్యం క‌ల్పించామ‌ని, రాజీవ్ ఆరోగ్య‌శ్రీ ప‌రిమితిని రూ.5 ల‌క్ష‌ల నుంచి రూ.ప‌ది క్ష‌ల‌కు పెంచామ‌ని గుర్తు చేశారు.  మేడారం జాత‌ర‌కు మ‌హిళ‌లు ఉచితంగా బ‌స్సుల్లో వెళ్లార‌ని ముఖ్య‌మంత్రి అన్నారు.

అల్లాట‌ప్ప‌గాళ్లం కాదు..
ఎన్నిక‌ల‌కు ముందు రేవంత్ రెడ్డి పేరు చెబితే మూడు సీట్లు  రాక‌పోతుండే అని కేటీఆర్ అంటున్నాడ‌ని,
తాను ముఖ్య‌మంత్రి, పీసీసీ అధ్య‌క్షునిగా ఉన్నాన‌ని, కేటీఆర్‌కు చేత‌న‌యితే తెలంగాణ‌లో ఒక్క ఎంపీ సీటు గెలిచి చూపించాల‌ని ముఖ్య‌మంత్రి రేవంత్ రెడ్డి స‌వాల్ విసిరారు. తాము అల్లాట‌ప్ప‌గాళ్లం కాద‌ని, అయ్య పేరు చెప్పుకొని కుర్చీలో కూర్చొలేద‌ని,  కింద నుంచి కార్య‌క‌ర్త‌గా క‌ష్ట‌ప‌డి జెండాలు మోసి లాఠీ దెబ్బ‌లుతిని,  అక్ర‌మ కేసులు ఎదుర్కొని చ‌ర్ల‌ప‌ల్లి, చంచ‌ల్‌గూడ జైళ్ల‌లో మ‌గ్గి, భ‌య‌ప‌డ‌కుండా, లొంగిపోకుండా నిటారుగా నిల‌బ‌డి కేటీఆర్‌ను, ఆయ‌న అయ్య‌ను, ఆయ‌న బావ‌ను బొంద‌పెట్టి ఆ కుర్చీలో కూర్చున్నామ‌ని అన్నారు. ముఖ్య‌మంత్రి కుర్చీ త‌న‌కు ఈనాం కింద రాలేద‌ని,  అయ్య పేరుతో రాలేద‌న్నారు.  న‌ల్ల‌మ‌ల అడ‌వి నుంచి తొక్కుక్కుంటూ తొక్కుకుంటూ వ‌చ్చి కేటీఆర్ వంటి వాడి నెత్తి మీద కాలు పెట్టి తొక్కి ఆ కుర్చీలో త‌న‌ను కార్య‌క‌ర్త‌లు కూర్చొబెట్టార‌ని, ఈ రోజు ముఖ్య‌మంత్రి కుర్చీలో ఉన్నానంటే అది కాంగ్రెస్ కార్య‌క‌ర్త‌ల త్యాగం, వారి పోరాట ఫ‌లిత‌మ‌న్నారు.  కాంగ్రెస్ కార్య‌క‌ర్త‌లు అండ‌గా నిలిచినంత కాలం, త‌న‌ను భుజానమోసినంత కాలం కేటీఆర్‌, ఆయ‌న తండ్రీ వ‌చ్చినా ఈ కుర్చీని తాక‌లేర‌ని ముఖ్య‌మంత్రి హెచ్చ‌రించారు.

సోష‌ల్ మీడియా ఉంటే గెలిచేవాళ్ల‌మ‌ని కేటీఆర్ అంటున్నార‌ని,  ఉన్న టీవీలన్నీ ఆయ‌న చుట్ట‌పోళ్ల‌వేన‌ని, త‌న తండ్రి చూపించ‌డానికి త‌న‌కేమైనా టీవీ ఇచ్చాడా..?  రాసుకోవ‌డానికి పేప‌ర్, సొల్లు వాగుడు వాగ‌డానికి మైకులు  ఇచ్చాడా అని ముఖ్య‌మంత్రి ప్ర‌శ్నించారు.  త‌మ‌  కార్య‌క‌ర్త‌లు క‌ష్ట‌ప‌డితే నిల‌బ‌డి కొట్లాడితే త‌మ‌కు అధికారం వ‌చ్చింద‌ని, కేటీఆర్ చేసే త‌ప్పులను త‌మ కార్య‌క‌ర్త‌లు యూట్యూబ్‌లో పెట్టార‌న్నారు. త‌మ‌కు ఆ ట్యూబ్‌, ఈ ట్యూబ్ ఏది అక్క‌ర‌లేద‌ని, కేటీఆర్ ట్యూబ్‌లైట్ ప‌గ‌ల‌గొట్టే బాధ్య‌త తాము తీసుకుంటామ‌న్నారు.  దివాళా చెడిన కేటీఆర్  యూట్యూబ్ ఛాన‌ల్ పెట్టుకుంటా అంటున్నాడ‌ని, కృష్ణాన‌గ‌ర్‌లో ఏదైనా బ్రోక‌ర్ దందా పెట్ట‌కుంటే అదీ ఇదీ క‌లిస్తే ఆయ‌న దందా బాగా న‌డిస్తుంద‌న్నారు. వాళ్ల కుటుంబం దోచుకుంటే తెలంగాణ ప్ర‌జ‌లు చెప్పుతో కొట్టార‌నే  సంగ‌తి కేటీఆర్‌కు గుర్తురావ‌డం లేద‌ని,  చెరుకు తోట‌లు, ప‌ల్లీ చేల‌పై అడ‌విపందులు ప‌డ‌కుండా రైతులు క‌రెంటు తీగ‌లు పెట్టి కాపాడుకున్న‌ట్లు, తెలంగాణ‌ను అడ‌వి పందుల్లా తెగ‌మెక్కుతుంటే తెలంగాణ ప్ర‌జ‌లు క‌రెంటు తీగ‌లు పెట్టి వారిని బ‌లి ఇచ్చి కాంగ్రెస్‌ను అధికారంలోకి తెచ్చార‌ని ముఖ్య‌మంత్రి అన్నారు.  రానున్న పార్ల‌మెంట్ ఎన్నిక‌ల్లో 14 సీట్లు గెలిపించాల‌ని ఆయ‌న ప్ర‌జ‌ల‌కు విజ్ఞ‌ప్తి చేశారు.

ఏనాడైనా ఉద్యోగాల‌పై ఆలోచించారా..?
తెలంగాణ ఉద్య‌మ స‌మ‌యంలో నీళ్లు, నియామ‌కాలు, నిధులు వ‌స్తాయ‌ని కేసీఆర్ ప్ర‌చారం చేశార‌ని,  కానీ నీళ్లు పేరుతో నిధుల దోపిడి జ‌రిగింద‌ని,  కొడుకు, అల్లుడు, బిడ్డ‌కు ఉద్యోగాలు వ‌చ్చాయి…స‌డ్డ‌కుని కొడుకుకు రాజ్య‌స‌భ స‌భ్య‌త్వం వ‌చ్చిందే త‌ప్ప ల‌క్ష‌లాది మంది యువ‌త‌కు ఉద్యోగాలు ఇవ్వ‌లేదని ముఖ్య‌మంత్రి రేవంత్ రెడ్డి విమ‌ర్శించారు. తాము ఇచ్చిన మాట ప్ర‌కారం.. నిరుద్యోగుల‌కు రెండు ల‌క్ష‌ల ఉద్యోగాలు ఇస్తామ‌ని ఇచ్చిన మాట ప్ర‌కారం  అధికారంలోకి వ‌చ్చిన రెండు నెల‌ల్లోపే 25 వేల ఉద్యోగ నియామ‌క ప‌త్రాలు ఇచ్చామ‌ని, అది చూసి ఓర్వ‌లేని కేసీఆర్‌, కేటీఆర్‌, హ‌రీశ్‌రావు, క‌విత రావు, సంతోష్‌రావు, ద‌యాక‌ర్‌రావు, వినోద్‌రావు అంతా కుట్ర‌లు చేసి కాంగ్రెస్ పార్టీకి శాప‌నార్దాలు పెడుతున్నార‌ని ఆయ‌న ఆగ్ర‌హం వ్య‌క్తం చేశారు. పేదోళ్ల బిడ్డ‌ల‌కు తాము వేలాది  ఉద్యోగాలు ఇస్తే వారి క‌డుపు మండుతుందా అని ముఖ్య‌మంత్రి ప్ర‌శ్నించారు. కేసీఆర్  బిడ్డ‌ను నిజామాబాద్‌లో ఓడిస్తే ఆరు నెల‌లు తిర‌గ‌కుండానే ఎమ్మెల్సీ ఇచ్చాడ‌ని, ఆయ‌న చుట్టం వినోద్‌రావును క‌రీంన‌గ‌ర్‌లో ప్ర‌జ‌లు ఓడిస్తే ప్ర‌ణాళిక సంఘం ఉపాధ్య‌క్షుని ప‌ద‌వి ఇచ్చార‌న్నారు. కేసీఆర్ కుటుంబాన్ని ప్ర‌జ‌లు బండ‌కేసి కొట్టినా ఉద్యోగాలు ఇచ్చార‌ని, పేద‌లు, ద‌ళితులు, బ‌ల‌హీన‌వ‌ర్గాలు, ఆదివాసీలు, మైనారిటీల బిడ్డ‌ల త‌ల్లితండ్రులు ఊళ్ల‌లో క‌ష్ట‌ప‌డి రూపాయి రూపాయి కూడ‌బెట్టి అశోక్‌న‌గ‌ర్ చౌర‌స్తాలోనో, దిల్‌సుఖ్ న‌గ‌ర్ చౌర‌స్తాలోనో కోచింగ్ సెంట‌ర్ల‌లో చ‌దివిస్తే పెళ్లిళ్లు కాక ఉద్యోగాలు  లేక రోడ్ల‌పై తిరుగుతుంటే ఏ ఒక్క‌రోజైనా కేసీఆర్ ఆలోచించారా? అని ముఖ్య‌మంత్రి ప్ర‌శ్నించారు.

ఆయ‌న పిల్ల‌ల‌కు ఉద్యోగాలు లేకుంటే కేసీఆర్‌కు దుఃఖం వ‌చ్చి కొలువులు ఇచ్చాడ‌ని,  మ‌రి పేదోళ్ల పిల్ల‌లు ఉద్యోగాలు లేక పెళ్లిళ్లు కాక చెట్ల‌కు ఉరేసుకొని చ‌చ్చిపోతుంటే ఆయ‌న‌కు ప‌ట్ట‌లేద‌ని, ఆయ‌న మ‌నిషా,  మాన‌వ రూపంలో ఉన్న మృగ‌మా? ఆ పేదోళ్ల బిడ్డ‌ల గురించి ఆలోచించావా అని కేసీఆర్‌పై ముఖ్య‌మంత్రి ఆగ్ర‌హం వ్య‌క్తం చేశారు.  రాష్ట్రంలో ఇందిర‌మ్మ రాజ్యం వ‌చ్చిన  వెంట‌నే 25 వేల ఉద్యోగాలు ఇచ్చామ‌ని, మార్చి 2న మ‌రో ఆరు వేల ఉద్యోగాలు ఇవ్వ‌బోతున్నామ‌ని, గ్రూప్ వ‌న్ నోటిఫికేష‌న్ ఇచ్చామ‌ని,  త్వ‌ర‌లోనే మెగా డీఎస్సీ ఇవ్వ‌బోతున్న‌ట్లు ముఖ్య‌మంత్రి తెలిపారు. కేసీఆర్  హ‌యాంలో ప్ర‌శ్నాప‌త్రాలు జిరాక్స్ సెంట‌ర్ల‌లో ప‌ల్లీబ‌ఠానీల్లా అమ్ముతంటే ఆ దొంగ‌ల‌ను అరెస్టు చేయ‌లేద‌ని, తాము అధికారంలోకి వచ్చాక అలా చేసే వారిని జైళ్ల‌లో వేశామ‌న్నారు. పేద‌ల పిల్ల‌ల‌కు ఉద్యోగాలు ఇవ్వ‌డానికి, పార‌ద‌ర్శ‌కంగా నియామ‌కాలు చేప‌ట్ట‌డానికి  ప‌బ్లిక్ స‌ర్వీసు క‌మిష‌న్‌ను ప్ర‌క్షాళ‌న చేశామ‌ని, కోర్టుల్లో కేసుల‌ను ప‌రిష్క‌రించి వేలాది ఉద్యోగాలు ఇచ్చే బాధ్య‌త తీసుకున్నామ‌ని ముఖ్య‌మంత్రి అన్నారు.  తండ్రీ,కొడుకు,బిడ్డ‌, అల్లుడు, వారి చుట్టం  ఈ ప్ర‌భుత్వం మంచి ప‌ని చేసిందని  ఒక్క రోజైనా మాట్లాడారా అని ముఖ్య‌మంత్రి రేవంత్ రెడ్డి ప్ర‌శ్నించారు.  పొద్దున‌లేస్తే అవే చెత్త‌మాట‌లు. సొల్లు మాట‌లు మాట్లాడుతున్నార‌ని, ఈ ప్ర‌భుత్వం ఎప్ప‌డు పోతుందా..?  మేం ఎప్పుడు అక్క‌డ కుర్చుంటామా అని ఆలోచిస్తున్నార‌ని మండిప‌డ్డారు. ఒకాయ‌న ఈ ప్ర‌భుత్వం మూడు నెల‌లు ఉంట‌దా అంటే మ‌రొక‌రు  ఆరు నెల‌ల ఉంటుందా అంటున్నార‌ని, ఎవ‌రైనా ఈ ప్ర‌భుత్వం మూడు నెల‌లు, ఆరు నెల‌లు ఉండ‌ద‌ని గ్రామాల్లోకి వ‌స్తే  వారిని త‌మ కార్య‌క‌ర్త‌లు ప‌ట్టుకొని వేప‌చెట్ల‌కు వేలాడ‌దీసి తొండ‌లు విడిచి కొడ‌తార‌ని ముఖ్య‌మంత్రి హెచ్చ‌రించారు.

సోనియ‌మ్మ మాట శిలాశాస‌నం…
సోనియ‌మ్మ మాట శిలాశాస‌నమ‌ని,  ర‌క్తం ధార‌బోసైనా  ఆమె ఇచ్చిన గ్యారంటీల‌ను త‌మ మంత్రివ‌ర్గం అమ‌లు చేస్తుంద‌ని ముఖ్య‌మంత్రి రేవంత్ రెడ్డి అన్నారు. ఆడ బిడ్డ‌ల‌కు క‌ట్టెల పొయ్యి క‌ష్టాలు ఉండొద్ద‌నే నాడు దీపం ప‌థ‌కం ద్వ‌రా సోనియామ్మ సిలిండ‌ర్లు ఇచ్చింద‌ని ముఖ్య‌మంత్రి గుర్తు చేశారు. న‌రేంద్ర‌మోదీ, కేసీఆర్ అధికారంలోకి వ‌చ్చిన త‌ర్వాత రూ.400 ఉన్న సిలిండ‌ర్‌ను రూ.1200 చేసి దోచుకుంటుంటే చూసిన సోనియ‌మ్మ తాము అధికారంలోకి  వ‌చ్చిన వెంట‌నే రూ.500కే సిలిండ‌ర్ ఇస్తామ‌ని హామీ ఇచ్చార‌ని ముఖ్యమంత్రి అన్నారు. సోనియ‌మ్మ హామీ మేర‌కు ఆమె బిడ్డ ప్రియాంక గాంధీ స‌మ‌క్షంలో ఆ హామీని అమ‌లు చేయాల‌న‌కున్నామ‌ని,  కానీ మ‌హ‌బూబ్‌న‌గ‌ర్ శాస‌న‌మండ‌లి ఎన్నిక నోటిఫికేష‌న్  రావ‌డంతో స‌చివాల‌యంలో దానిని ప్రారంభించిన‌ట్లు ముఖ్య‌మంత్రి తెలిపారు.  ఇందిర‌మ్మ రాజ్యంలో మ‌హిళ‌ల‌ను కోటీశ్వ‌రుల‌ను చేసే బాధ్య‌త తాము తీసుకుంటామ‌న్నారు. రూ.500 సిలెండ‌ర్ ఇస్తున్నామ‌ని, ఇప్ప‌టికే 40 ల‌క్ష‌ల మంది అర్హుల‌య్యార‌ని ముఖ్య‌మంత్రి రేవంత్ రెడ్డి తెలిపారు. ఎవ‌రికైనా రాకుంటే మండ‌ల అధికారుల ద‌గ్గ‌కు వెళ్లి అడ‌గాలని, ఆందోళ‌న చెంద‌వ‌ద్ద‌ని ఆయ‌న సూచించారు.

ఎన్నికైన ప్ర‌భుత్వాల‌ను కూల్చ‌డ‌మే గుజ‌రాత్ మోడ‌ల్‌
త‌మ‌ది గుజ‌రాత్ మోడ‌ల్ అని బీజేపీ వాళ్లు అంటున్నార‌ని,  ఊళ్ల‌లో ఉన్న వారిని త‌గ‌ల‌బెట్ట‌డ‌మా? ఇత‌ర రాష్ట్రాల్లో పెట్టుబ‌డిదారుల‌ను బెదిరించి మీ పాలిత రాష్ట్రాల‌కు తీసుకుపోవ‌డ‌మా ?  రెండు కోట్ల ఉద్యోగాలు ఇస్తామ‌ని ఒక్క‌టైనా ఇవ్వ‌క‌పోవ‌డ‌మా..?  రైతుల ఆదాయం రెండింత‌లు చేస్తామ‌ని చెప్పి ఆందోళ‌న చేస్తున్న రైతుల‌ను కాల్చి చంప‌డ‌మేనా గుజ‌రాత్ మోడ‌ల్ అని ముఖ్య‌మంత్రి రేవంత్ రెడ్డి ప్ర‌శ్నించారు.  అడిగే వాళ్లు లేరు క‌దా అని బెదిరించి రుబాబు చేసి ద‌బాయించి బ‌త‌కాల‌ని బీజేపీ వాళ్ల అనుకుంటున్నార‌ని ముఖ్య‌మంత్రి మండిప‌డ్డారు.  మోడీని ప్ర‌ధాన‌మంత్రిని చేయాల‌ని బీజేపీ నాయ‌కులు అడుగుతున్నార‌ని,  ప‌దేళ్లుగా ఆయ‌నే ప్ర‌ధాన‌మంత్రిగా ఉన్నార‌ని, ప‌దేళ్ల‌లో సంవ‌త్స‌రానికి రెండు కోట్ల ఉద్యోగాల చొప్పున ఇర‌వై కోట్ల ఉద్యోగాలు రావాలి క‌దా ఎందుకు రాలేద‌ని, రైతుల ఆదాయం రెట్టింపు ఎందుకు కాలేద‌ని ముఖ్య‌మంత్రి ప్ర‌శ్నించారు. వ‌డ్లు, కందులు కొనేవాడే లేడ‌ని, రైతులు ఎట్లా బ‌త‌కాల‌న్నారు. గుజ‌రాత్ మోడ‌ల్ అంటే పార్టీల‌ను చీల్చ‌డం, ప్ర‌భుత్వాల‌ను ప‌డ‌గొట్ట‌డం, ఎన్నికైన వారిని కింద‌ప‌డ‌గొట్ట‌డం, మాట విన‌ని వారిని జైళ్లలో పెట్ట‌డమేన‌ని ముఖ్య‌మంత్రి విమ‌ర్శించారు. త‌మ పార్టీ  మీటింగ్ ఉందంటే  ఎన్ ఎస్‌యూఐ, యూత్ కాంగ్రెస్‌, ఇత‌ర విభాగాల నాయ‌కుల‌ను తొలుత వెళ్లి ఏర్పాట్లు చేయ‌మ‌ని చెబుతామ‌ని, మోడీ ఐటీ, సీబీఐ, ఈడీ వాళ్ల‌ను పంపి అవ‌త‌లి పార్టీలో నాయ‌కుల‌పై  కేసులు పెడితే వారిన త‌ర్వాత త‌మ పార్టీలో చేర్చుకుంటామంటాడ‌ని ఎద్దేవా చేశారు.

కేసీఆర్ కుల పెద్ద మోది..
ప్రాణ‌హిత -చేవెళ్ల‌ను కేసీఆర్ ప‌డావు పెట్టార‌ని, దాన్ని పూర్తిచేయాల‌ని మోడీ కేసీఆర్ కు  ఎప్పుడైనా చెప్పారా అని ముఖ్య‌మంత్రి రేవంత్ రెడ్డి ప్ర‌శ్నించారు. ఈ కేడీ.. మోడీ అంట‌కాగార‌ని, అల్లం బెల్లంలా అలాయ్ బ‌లాయ్ చేసుకొని ఇప్పుడు తామిద్ద‌రం వేరే.. త‌మ‌కు ఒక‌రంటే ఒక‌రు స‌రిపోద‌ని నాట‌కాలు ఆడుతున్నార‌ని… దానిని మ‌నం న‌మ్మాలా అని  ముఖ్య‌మంత్రి అన్నారు.  వారి మ‌ధ్య పొత్తు, చీక‌టి ఒప్పందం లేకుంటే కేటీఆర్‌ను ముఖ్య‌మంత్రి చేయ‌డానికి కేసీఆర్ మోడీని ఎందుకు అడిగార‌ని, ఈ విష‌యం మోడీనే చెప్పార‌ని ముఖ్య‌మంత్రి గుర్తు చేశారు. కేసీఆర్‌కు ఇంటి పెద్ద, కుల పెద్ద న‌రేంద్ర మోడీనే అని,  ఇంట్లో పంచాయితీ కుల పెద్ద‌కే క‌దా చెప్పుకునేద‌ని ముఖ్య‌మంత్రి అన్నారు.  కాంగ్రెస్‌ను  త‌ట్టుకునేందుకు చీక‌ట్లో క‌లిసి ఉండాలి.. పొద్దుటే కొట్లాడిన‌ట్లు ఉండాల‌ని మోడీ, కేడీ నాట‌కం ఆడుతున్నార‌ని ముఖ్య‌మంత్రి రేవంత్‌రెడ్డి విమ‌ర్శించారు.  ఆ విష‌యం  తెలంగాణ ప్ర‌జ‌ల‌కు తెలియ‌దా..?  గుజ‌రాత్ నుంచి వ‌చ్చి  ఆయ‌న సోది చెబితే విన‌డానికి మ‌నం సిద్ధంగా ఉన్నామా అని ముఖ్య‌మంత్రి ప్ర‌శ్నించారు.

చేవెళ్ల అభివృద్ధి బాధ్య‌త తీసుకుంటా..?
చేవెళ్ల‌లో భాజ‌పాలో  ఒక  నాయ‌కుడున్నాడ‌ని, మ‌నిషి  మంచోడే కానీ పార్టీ చ‌క్క‌నైన‌ది కాద‌ని ముఖ్య‌మంత్రి రేవంత్ రెడ్డి అన్నారు. ఆయ‌న‌కు వేసిన వోటు దండ‌గ‌ని,  క‌విత‌ను  జైలులో వేస్తార‌ని తాము ఆ పార్టీలోకి పోయామ‌ని,  అదేం జ‌ర‌గ‌లేద‌ని ఆ పెద్ద‌మ‌నిషే చెప్పార‌న్నారు. చేవెళ్ల‌లో కాంగ్రెస్ ఎవ‌రిని అభ్య‌ర్థిగా నిలిపినా అత్య‌ధిక మెజారిటీతో గెలిపించాల‌ని ముఖ్య‌మంత్రి కోరారు.  ప్రాణ‌హిత‌-చేవెళ్ల ప్రాజెక్టును పూర్తి చేసి ఈ ప్రాంతంలోకి ప్ర‌తి ఎక‌రాకు నీళ్లు ఇస్తామ‌ని, చేవెళ్ల అభివృద్ధి బాధ్య‌త‌ను తాను తీసుకుంటాన‌ని ముఖ్య‌మంత్రి హామీ ఇచ్చారు.