– బారాఖంబా రోడ్‌ పోలీస్‌ స్టేషన్‌కు తరలించిన రాహుల్ విడుదల
– జంతర్‌మంతర్‌కు వెళ్లకుండా విపక్ష ఎంపీల అడ్డగింత
– కాశ్మీరీ గేట్‌లో కాంగ్రెస్‌, ఆప్‌, వామపక్షాల నిరసన
–అక్టోబర్ 10న మరో భారీ ఆందోళనకు పిలుపున్యూదిల్లీ, అక్టోబర్ 7: ప్రధాన ఎన్నికల కమిషనర్‌ జ్ఞానేశ్‌ కుమార్‌ రాజీనామా చేయాలన్న డిమాండ్‌తో దేశ రాజధానిలో బుధవారం విపక్షాల నిరసనలు కొనసాగాయి. జంతర్‌మంతర్‌కు బయలుదేరిన ప్రతిపక్ష ఎంపీలను పోలీసులు అడ్డుకోవడంతో రోడ్డుపైనే ఆందోళనకు దిగారు. లోక్‌సభ ప్రతిపక్ష నేత రాహుల్ గాంధీ, ప్రియాంక గాంధీ వాద్రాతోపాటు పలువురు నాయకులను పోలీసులు అదుపులోకి తీసుకున్నారు. బారాఖంబా రోడ్‌ పోలీస్‌ స్టేషన్‌కు తరలించిన రాహుల్‌ను అనంతరం విడుదల చేశారు. జ్ఞానేశ్‌ కుమార్‌ పదవి నుంచి తప్పుకునేవరకు ఉద్యమం కొనసాగిస్తామని రాహుల్ ప్రకటించారు.
కాంగ్రెస్‌ అధ్యక్షుడు మల్లికార్జున ఖర్గే జనపథ్‌లో ఏర్పాటు చేసిన భోజన సమావేశం అనంతరం విపక్ష ఎంపీలు బస్సుల్లో జంతర్‌మంతర్‌కు బయలుదేరారు. కే.సి. వేణుగోపాల్‌, తృణమూల్‌ కాంగ్రెస్‌ ఎంపీ డెరెక్‌ ఒబ్రెయిన్‌, వామపక్ష ఎంపీలు పి. సంతోష్‌ కుమార్‌, వి. శివదాసన్‌ తదితరులు సమావేశంలో పాల్గొన్నారు. జంతర్‌మంతర్‌ వైపు వెళ్తున్న బస్సులను విండ్సర్‌ ప్లేస్‌ ప్రాంతంలో పోలీసులు నిలిపివేశారు. దీంతో నాయకులు, కార్యకర్తలు అక్కడే నిరసన వ్యక్తం చేశారు. పోలీసులు అడ్డుకోవడంతో ప్రియాంక గాంధీ సహా పలువురు ఎంపీలు రోడ్డుపై పడుకుని నిరసన తెలిపారు. రాహుల్‌ను పోలీసులు బస్సులోకి ఎక్కించగా, కొద్దిసేపటి తరువాత ప్రియాంకను కూడా అక్కడి నుంచి తరలించారు. కొందరు కాంగ్రెస్‌ కార్యకర్తలు బస్సుల పైకెక్కి నిరసన వ్యక్తం చేశారు. తమను బలవంతంగా నేలపై పడేశారని, మహిళా పోలీసుల చర్యలతో తన శరీరంపై గీరుకుపోయిన గాయాలయ్యాయని ప్రియాంక ఆరోపించారు. యువజన కాంగ్రెస్‌, ఎన్ఎస్‌యూఐ కార్యకర్తలపై పోలీసులు లాఠీచార్జి చేసారు . గాయపడిన వారి సంఖ్యకు సంబంధించి ధ్రువీకరించిన వివరాలు లభించలేదు. రాహుల్‌ను రెండు గంటలకు పైగా నిర్బంధించిన తరువాత విడుదల చేసినట్లు పీటీఐ సమాచారం. అదుపులోకి తీసుకున్న కొందరు నాయకులను ఛత్రసాల్‌ స్టేడియానికి తరలించారు . అయితే ప్రియాంకతోపాటు మిగిలిన ఎంపీలు, కార్యకర్తలందరి విడుదల పరిస్థితిపై సమగ్ర సమాచారం అందుబాటులో లేదు. బుధవారం మొత్తం ఎంతమందిని అదుపులోకి తీసుకున్నారన్న అధికారిక సంఖ్య కూడా ధ్రువీకరణ కాలేదు. కాశ్మీరీ గేట్‌లోని దిల్లీ ప్రధాన ఎన్నికల అధికారి కార్యాలయం వద్ద మరో నిరసన జరిగింది. ఆమ్‌ ఆద్మీ పార్టీ, కాంగ్రెస్‌, వామపక్షాల నాయకులు, కార్యకర్తలు ఇందులో పాల్గొన్నారు. సింధీ అకాడమీ నుంచి ప్రధాన ఎన్నికల అధికారి కార్యాలయం వైపు వెళ్లిన ఆప్‌ కార్యకర్తలను పోలీసులు బారికేడ్లతో అడ్డుకున్నారు. వోటర్ల జాబితా ప్రత్యేక సమగ్ర సవరణలో అక్రమాలు జరుగుతున్నాయని, అర్హుల పేర్లు తొలగిస్తున్నారని ఆప్‌ నాయకుడు సౌరభ్‌ భరద్వాజ్‌ ఆరోపించారు. ప్రధాన ఎన్నికల కమిషనర్‌ రాజీనామా చేయాలని ఆప్‌ ఎమ్మెల్యే కుల్దీప్‌ కుమార్‌ డిమాండ్‌ చేశారు. jకశ్మీరీ గేట్‌ నిరసన నేపథ్యంలో ట్రాఫిక్‌ నియంత్రణకు పోలీసులు ముందస్తు ఏర్పాట్లు చేశారు. బౌలెవార్డ్‌ రోడ్‌, రింగ్‌ రోడ్‌, ఎస్‌.పి. మార్గ్‌, ఎన్‌.ఎస్‌. మార్గ్‌ పరిసరాల్లో వాహనాలను అవసరాన్ని బట్టి మళ్లిస్తామని ట్రాఫిక్‌ పోలీసులు ప్రకటించారు. లోథియన్‌ రోడ్డుపైనా ఆంక్షలు ఉండవచ్చని సూచించారు. వోటర్ల జాబితా సవరణ, ఎన్నికల కమిషన్‌ నిర్ణయాల్లో పారదర్శకతపై అభ్యంతరాలే ఈ ఆందోళనలకు ప్రధాన కారణం. ఎన్నికల కమిషన్‌ అధికార బీజేపీకి అనుకూలంగా వ్యవహరిస్తోందని ప్రతిపక్షాలు ఆరోపిస్తున్నాయి. అయితే అక్రమాలు జరిగాయన్న ఆరోపణలను ఎన్నికల కమిషన్‌, బీజేపీ తిరస్కరించాయి.మంగళవారం, అక్టోబర్ 6న జరిగిన ఆకాశవాణి భవన్‌ ధర్నాకు కొనసాగింపుగా బుధవారం నిరసనలు చోటుచేసుకున్నాయి.
మంగళవారం పార్లమెంట్‌ నుంచి ఎన్నికల కమిషన్‌కు వెళ్లేందుకు ప్రయత్నించిన ఎంపీలను అడ్డుకోవడంతో రాహుల్, ప్రియాంక తదితరులు ఆకాశవాణి భవన్‌ ప్రాంగణంలో గంటలపాటు బైఠాయించారు. ఆ ఘటనలో అదుపులోకి తీసుకున్న నాయకులను మంగళవారం రాత్రే విడుదల చేశారు. భవనంలో అనుమతి లేకుండా ప్రవేశించారన్న ఆరోపణపై నమోదైన కేసు కూడా ఆ ముందు రోజు ఘటనకు సంబంధించినదే. ఎంపీలతో సమావేశం జరగకపోవడంపై ఎన్నికల కమిషన్‌ మంగళవారం ఇచ్చిన వివరణలో, సాయంత్రం నాలుగు గంటల వరకు సమావేశ సమయం కోరుతూ అభ్యర్థన అందలేదని పేర్కొంది. తరువాత సుమారు 240 మంది ఎంపీలతో పార్లమెంట్‌ అనెక్స్‌లో సమావేశం నిర్వహించాలన్న ప్రతిపాదన వచ్చిందని, అది తమ నిర్ణీత విధానానికి విరుద్ధమని తెలిపింది. వినతిపత్రం స్వీకరించేందుకు సీనియర్‌ అధికారిని పంపుతామన్న ప్రతిపాదనను ఎంపీలు అంగీకరించలేదని కమిషన్‌ మంగళవారం (అక్టోబర్ 6) వెల్లడించింది. ఆందోళనను మరింత విస్తరించేందుకు అక్టోబర్ 10న జంతర్‌మంతర్‌ వద్ద నిరసనకు కాక్రోచ్‌ జనతా పార్టీ (సీజేపీ), విద్యార్థి సంఘాలు పిలుపునిచ్చాయి. బుధవారం జరిగిన సంయుక్త విలేకరుల సమావేశంలో ఐసా, ఏఐఎస్ఎఫ్‌, ఎస్ఎఫ్ఐ ప్రతినిధులు ఉద్యమానికి మద్దతు ప్రకటించారు. దీర్ఘకాలిక ఆందోళనకు సిద్ధంగా రావాలని సీజేపీ సహ కన్వీనర్‌ సౌరవ్‌ దాస్‌ కోరారు. ఆ కార్యక్రమానికి ఆప్‌ కూడా మద్దతు ఇస్తుందని సౌరభ్‌ భరద్వాజ్‌ తెలిపారు. పోలీసులకు కార్యక్రమ సమాచారం అందించినట్లు నిర్వాహకులు పేర్కొన్నప్పటికీ, అనుమతి మంజూరైనట్లు ధ్రువీకరణ లభించలేదు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
