– ప్రజావాణి ఫిర్యాదుల పరిశీలన
– నాలాల ఆక్రమణలు తొలగించాలి
– వరద కాల్వల వెడల్పు కొనసాగించాలి
– అధికారులకు ఆదేశాలు
హైదరాబాద్, ప్రజాతంత్ర, అక్టోబర్ 8: ప్రజావాణి ఫిర్యాదులను హైడ్రా కమిషనర్ ఏవీ రంగనాథ్ బుధవారం క్షేత్రస్థాయిలో పరిశీలించడంలో భాగంగా తూముకుంట మున్సిపాలిటీలో పర్యటించారు. దేవరయాంజాల్ విలేజ్ లో సర్వే నం.135, 136లలో రహదారిలో ఆటంకాలు కలిగిస్తున్న వివాదంపై హైకోర్టు ఆదేశాల మేరకు క్షేత్ర స్థాయిలో పరిశీలించి స్థానికులతో మాట్లాడారు. అదే మార్గంలో కొత్తగా కోర్టు భవనం, ట్రాఫిక్ పోలీస్ స్టేషన్ వస్తున్న క్రమంలో రహదారిని వెంటనే పునరుద్ధరించాలని స్థానిక మున్సిపల్ అధికారులను ఆదేశించారు. అనంతరం దేవరయాంజాల్ లో వరద కాలువ ఆక్రమణలను పరిశీలించారు. తుర్కవాణి కుంట నుంచి దేవరయాంజాల్ చెరువుకు వెళ్లే వరద కాలువ కబ్జా కావడంతో నాలుగు కాలనీలు నీట మునుగుతున్నాయని స్థానికులు ఫిర్యాదు చేసారు. గ్రామ రికార్డ్స్, సర్వే ఆఫ్ ఇండియా, ఎన్ ఆర్ ఎస్ సి మ్యాపుల ఆధారంగా గతంలో ఎంత విస్తీర్ణంలో ఉండేదో చూసి ఆక్రమణలు తొలగించి వరద కాలువను పునరుద్ధరించాలని హైడ్రా కమిషనర్ ఆదేశించారు. తర్వాత
తూముకుంటలోని వాసవి సుచిర్ ఇండియా లేఔట్లో నాలా కుచించుకుపోవడాన్ని పరిశీలించారు. దేవరయాంజాల్ చెరువు, పోతాయిపల్లి చెరువు నుంచి గుండ్లకుంట చెరువుకు వెళ్లే వరద కాలువ వాస్తవ వెడల్పు కొనసాగించకుండా నిర్మించడాన్ని పరిశీలించారు. తొమ్మిది మీటర్ల వెడల్పుతో ఉండాల్సిన నాలా రెండు మీటర్లకే పరిమితం చేయడం వల్ల అదే వెంచర్లోని ప్లాట్లతో పాటు పై భాగంలో ఉన్న నివాసాలు కూడా మునిగిపోతున్నాయని స్థానికులు కమిషనర్ దృష్టికి తీసుకొచ్చారు. ఇటీవల వర్షాలకు నీట మునిగిన వీడియోలు చూపించారు. ఓపెన్ నాల ఉండాల్సిన చోట పైపులు వేయడంతో ఈ సమస్య తలెత్తిందని అధికారులు చెప్పారు. ఇరిగేషన్, హెచ్ ఎండీఏ, మున్సిపాలిటీ అధికారులతో పాటు వెంచర్ యజమానులతో త్వరలో సమావేశం ఏర్పాటు చేసి సమస్యకు పరిష్కారం చూపుతామని కమిషనర్ హామీ ఇవ్వడంతో స్థానికులు ఊరట చెందారు. హైడ్రా అదనపు కమిషనర్ ఎన్.అశోక్ కుమార్, హైడ్రా అదనపు సంచాలకులు వర్ల పాపయ్య కూడా ఈ పర్యటనలో పాల్గొన్నారు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్సైట్ ను సందర్శించండి. తాజా అప్డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
