ప్రజలకు ఇబ్బందులు కలిగించొద్దు..
రవాణా శాఖలో పెండింగ్‌లో ఉ ప్రమోషన్లు పూర్తి చేయాలి
స్కూల్‌ బస్సులపై నిరంతర తనిఖీలు •ఈవీ పాలసీపై ప్రజల్లో అవగాహన కల్పించండి..
సమీక్ష సమావేశంలో రవాణా, బీసీ సంక్షేమ శాఖ మంత్రి పొన్నం ప్రభాకర్‌
హైదరాబాద్‌, ప్రజాతంత్ర, నవంబర్‌ 23 : తెలంగాణ కాంగ్రెస్‌ ప్రభుత్వం ఏర్పడి ఏడాది సమీపిస్తుండటంతో ఆదాయం పెంపు లక్ష్యంపై స్పెషల్‌ సెక్రటరీ వికాస్‌ రాజ్‌ తో కలిసి రవాణా, బీసీ సంక్షేమ శాఖ మంత్రి పొన్నం ప్రభాకర్‌ అధికారులతో సమీక్షా సమావేశాన్ని నిర్వహించారు. ఖైరతాబాద్‌ రవాణా శాఖ కార్యాలయంలో జరిగిన సమీక్షా సమావేశంలో రవాణా శాఖ అధికారులు పాల్గొన్నారు. పలువురు అధికారుల పనితీరు మెరుగుపర్చుకోవాలని సూచించారు. క్షేత్ర స్థాయిలో ప్రజలను ఇబ్బందులు పెట్టకుండా ఆదాయ అన్వేషణ చేయాలని సూచించారు. వొచ్చే కొద్ది రోజుల్లో రెవెన్యూ పెంచుకున్న నివేదిక కనిపించాలని ఆదేశించారు. రాష్ట్ర వ్యాప్తంగా ఉన్న 62 రవాణా శాఖ కార్యాలయాల్లో ఉద్యోగుల పనితీరు, కార్యాలయాలకు అవసరమైన కొత్త భవనాలు, మౌలిక సదుపాయాలు, డ్రింకింగ్‌ వాటర్‌, టాయిలెట్స్, సాంకేతిక పరిజ్ఞానం, సీసీ కెమెరాల వినియోగం తదితర అవసరాలపై 15 రోజుల్లో నివేదిక ఇవ్వాలని అధికారులను ఆదేశించారు.
రోడ్డు సేఫ్టీ పై స్కూల్‌ లు కాలేజీలలో రోడ్డు భద్రతపై విద్యార్థులకు అవగాహన కల్పించాలని సూచించారు. ప్రతి స్కూల్‌ లో ట్రాఫిక్‌ అవేర్నెస్‌ పార్క్ ఏర్పాటు చేయాలని, కొత్తగా నిర్మించనున్న ఇంటిగ్రేటెడ్‌ రెసిడెన్షియల్‌ స్కూల్లో కూడా ఇది తప్పనిసరి ఉండేలా విద్యాశాఖతో మాట్లాడాలని రవాణా శాఖ అధికారులను ఆదేశించారు. ఇందుకోసం యునిసెఫ్‌ సహకారం తీసుకోవాలని ఇటీవల ఒక స్వచ్ఛంద సంస్థ లైసెన్స్ పొందే ముందు డ్రైవర్లకు అవగాహన కల్పిస్తామన్న వారికి సౌకర్యాలు కల్పించాలని సూచించారు.
రవాణా శాఖలో సుదీర్ఘ కాలంగా పెండింగ్‌ లో ఉన్న ఉద్యోగుల ప్రమోషన్లు పూర్తి చేయాలని అందుకు సంబంధించి నివేదిక తయారు చేయాలని సూచించారు. కింది స్థాయి అసిస్టెంట్‌ మోటార్‌ వెహికల్‌ ఇన్స్పెక్టర్‌ నుండి జేటీసీ వరకు ప్రమోషన్లు పూర్తి చేయాలన్నారు. ప్రమోషన్లు పారదర్శకంగా పూర్తి చేయాలని అధికారులను ఆదేశించారు. స్కూల్‌ బస్సులపై నిరంతర తనిఖీలు నిర్వహించాలని ఆదేశించారు. 15 సంవత్సరాలు దాటిన స్కూల్‌ బస్సులను సీజ్‌ చేయాలని ఆదేశించారు. స్కూల్‌ బస్సుల తనిఖీల్లో భాగంగా ఫిట్‌ నెస్‌ ,ఇన్స్యూరెన్స్ , ఆర్సి అన్నింటినీ చెక్‌ చేయాలన్నారు. రాష్ట్ర వ్యాప్తంగా ఉన్న 25 వేల స్కూల్‌ బస్సులపై నివేదిక ఇవ్వాలని ఆదేశించారు. స్కూల్‌ బస్సుల తనిఖీల్లో భాగంగా స్కూల్‌ టైమింగ్స్ లో విద్యార్థులు బస్సుల్లో ఉన్నప్పుడు కానీ తనిఖీలు చేయొద్దని అధికారులకు సూచించారు. అదే విధంగా 15 సంవత్సరాలు దాటిన ప్రైవేట్‌ వాహనాలు గ్రీన్‌ టాక్స్ స్పెషల్‌ డ్రైవ్‌ నిర్వహించాలని సూచించారు.
ఈవీ పాలసీపై మంచి నిర్ణయం తీసుకున్నందుకు ఈవీ కంపెనీలు మంత్రి పొన్నం ప్రభాకర్‌ ను అభినందించారు. దేశ వ్యాప్తంగా ఎక్కడా లేని విధంగా కాలుష్యాన్ని తగ్గించడానికి తెలంగాణ ప్రభుత్వం ఈవీ పాలసీపై విప్లవాత్మక నిర్ణయం తీసుకుందని దీనిపై ప్రతి ఎలక్ట్రిక్‌ వాహనాల షోరూంల వద్ద ప్రజలకు అవగాహన కల్పించాలని సూచించారు. సీఎస్‌ఆర్‌ ఫండ్స్ తో స్కూళ్లలో ట్రాఫిక్‌ అవేర్నెస్‌ పార్క్ లు ఏర్పాటు చేయాలని ఈవీ కంపెనీల ప్రతినిధులు కోరారు..
ఆటోమేటిక్‌ టెస్టింగ్‌ స్టేషన్స్ ,టెస్టింగ్‌ ట్రాకింగ్‌ ,డ్రైవింగ్‌ టెస్టింగ్‌ ,వెహికిల్‌ ట్రాకింగ్‌ పై అధికారులను అడిగి తెలుసుకున్నారు. వాహన సారథి అమలు ఆలస్యం చేయవద్దని సూచించారు. కొత్తగా వొచ్చిన అసిస్టెంట్‌ మోటార్‌ వెహికల్‌ ఇన్‌స్పెక్టర్‌లను ఎన్ఫోర్స్ మెంట్‌ లో ఉపయోగించాలని వారికి ప్రత్యేక శిక్షణ ఇవ్వాలని సూచించారు. రవాణా శాఖకు ప్రత్యేక లోగో రాబోతుందని ప్రజా విజయోత్సవాల్లో దానిని పరిచయం చేయాలని సూచించారు. రవాణా శాఖ అధికారులకు ప్రత్యేక వాహనాలు రాబోతున్నాయని , దాంతో పాటు డేటా ఎంట్రీ కోసం టాబ్‌ లు ఇస్తామన్నారు. రాష్ట్రంలో ఉన్న డ్రైవింగ్‌ స్కూల్‌ లు ఎన్ని వాటి పనితీరు తదితర వాటిపై ఎన్ఫోర్స్మెంట్‌ చేసి నివేదిక ఇవ్వాలని అధికారులను ఆదేశించారు. సమీక్ష సమావేశంలో రవాణా శాఖ ప్రత్యేక శాఖ కార్యదర్శి వికాస్‌ రాజ్‌, రవాణా శాఖ కమిషనర్‌ సురేంద్ర మోహన్‌, జేటిసి రమేష్‌, మమత ఇతర ఉన్నతాధికారులు పాల్గొన్నారు.
