– ఇంజినీరింగ్ పేరుతో చంపకూడదు
– మూసీ జన్ ఆందోళన్ డిమాండ్
హైదరాబాద్, ప్రజాతంత్ర, ఆగస్టు 18: మూసీ నదిని ఎలా పునరుద్ధరిస్తున్నారు, నదీ పర్యావరణ వ్యవస్థను ఎలా పరిగణిస్తున్నారు, వరదలు, ఇతర ప్రమాదాలను ఎలా అంచనా వేశారు, ప్రాజెక్టు విస్తీర్ణం, నిర్వాసితుల సంఖ్యకు సంబంధించిన గణాంకాలు పరస్పరం ఎందుకు సరిపోవడం లేదు, అలాగే పర్యావరణ అనుమతి ప్రక్రియలో ప్రజలు, నిపుణులు లేవనెత్తిన కీలక అభ్యంతరాలకు తగిన సమాధానాలు ఇచ్చారా అన్నదే తమ ప్రధాన ప్రశ్న అని హైదరాబాద్కు చెందిన ప్రముఖ పౌరుల బృందం స్పష్టం చేసింది. ఈమేరకు మంగళవారం మీడియా సమావేశం నిర్వహించింది. ఈ సందర్భంగా బృంద సభ్యులు మాట్లాడుతూ నదిని పునరుద్ధరిస్తున్నామనే పేరుతో, ఒక సజీవ నదిని కాంక్రీట్ నిర్మాణాల మధ్య వరుసగా నిల్వ నీటి కొలనులుగా మార్చే విధానాన్ని తాము వ్యతిరేకిస్తున్నామని స్పష్టం చేసింది. ఇంతటి విస్తీర్ణం, చారిత్రక ప్రాధాన్యత కలిగిన నదిని కేవలం నిర్మాణ కారిడార్గా కాకుండా ఒక జీవావరణ వ్యవస్థగా, సహజ వరద నియంత్రణ వ్యవస్థగా చూడాలని పేర్కొన్నారు.ఈ ప్రాజెక్టులో నదిపై ప్రతిపాదించిన ఏడు చెక్డ్యామ్ల్లో ప్రతిదానికి సంబంధించిన ముంపు విస్తీర్ణం, నీటి నిల్వ సామర్థ్యం, బ్యాక్వాటర్ పొడవు వంటి కీలక వివరాలను ఈఐఏ స్పష్టంగా వెల్లడించలేదన్నారు. జలచర జీవులను కాపాడేందుకు “పర్యావరణ ప్రవాహం” కొనసాగిస్తామని ఈఐఏ లో పదేపదే పేర్కొన్నారు. అయితే ఆ ప్రవాహం ఎంత ఉండాలి అనే విషయాన్ని స్పష్టమైన సంఖ్యతో — ఉదాహరణకు నిర్దిష్ట పరిమాణం, సహజ ప్రవాహంలో నిర్దిష్ట శాతం లేదా తగిన హైడ్రాలజికల్ పద్ధతి ఆధారంగా — నిర్ణయించినట్లు కనిపించడం లేదన్నారు. ప్రాజెక్టు స్వంత ప్రజెంటేషన్ మరియు ఈఐఏ లో ప్రకటించిన ప్రాజెక్టు విస్తీర్ణానికి వెలుపల ఒక “బఫర్ జోన్”ను గుర్తించారు. ప్రాజెక్టు పత్రాల్లో పేర్కొన్న కొలతల ఆధారంగా ఈ అదనపు ప్రాంతం సుమారు 205 హెక్టార్లు, ప్రకటించిన 199.89 హెక్టార్ల ప్రాజెక్టు ప్రాంతానికి అదనమని పేర్కొన్నారు. ఈ బఫర్ ప్రాంతాన్ని కేవలం రక్షణ, పర్యావరణ పరిరక్షణ లేదా వరద నిర్వహణ కోసం ఖాళీగా ఉంచుతున్నట్లు కనిపించడం లేదన్నారు.ప్రాజెక్టు ప్రతిపాదిస్తున్న వరద మైదానం, బఫర్ జోన్లోని భూవినియోగాలు — ప్రాజెక్టు సమర్థనకు స్వయంగా ఉటంకించిన వరద జోనింగ్ మార్గదర్శకాల పరిమితులు, సూత్రాలకు అనుగుణంగా ఉన్నాయా? అన్న ప్రశ్న తలెత్తుతోందన్నారు. తదుపరి నిర్మాణాలు చేపట్టే ముందు ఈ ప్రశ్నకు స్పష్టమైన, ప్రజలకు అందుబాటులో ఉండే సమాధానం ఇవ్వాలని కోరారు. అత్యంత తీవ్రమైన వరద అంచనాను ప్రాజెక్టు వాస్తవ రూపకల్పన ప్రమాణాలు, నిర్వహణ విధానాలు, ప్రజా హెచ్చరిక వ్యవస్థల్లో తగినంతగా ప్రతిబింబించలేదు. ఇవి ప్రధానంగా 5 సంవత్సరాలు, 25 సంవత్సరాలకు ఒకసారి సంభవించే చిన్న స్థాయి వరదల ఆధారంగా రూపొందించినట్లు కనిపిస్తున్నాయన్నారు. ప్రాజెక్టు అవసరాన్ని సమర్థించేందుకు 1908 స్థాయి వరదను ప్రస్తావిస్తే, అంతటి తీవ్రమైన వరద సంభవించినప్పుడు ఎదురయ్యే పరిస్థితులను దృష్టిలో పెట్టుకుని ప్రాజెక్టు భద్రతా వ్యవస్థలను ఎందుకు రూపొందించలేదని ప్రశ్నించారు. చరిత్రలోని అత్యంత విధ్వంసకర వరదను ప్రాజెక్టు అవసరాన్ని సమర్థించేందుకు ఉపయోగించి, అదే సమయంలో దాని కంటే చాలా చిన్న వరదల కోసం మాత్రమే భద్రతా ప్రణాళిక రూపొందించడం సమర్థనీయం కాదని పేర్కొన్నారు. ఇంతటి భారీ ప్రాజెక్టులో అత్యల్ప సంభావ్యత ఉన్నప్పటికీ అత్యంత తీవ్రమైన పరిణామాలకు దారితీసే ప్రమాదాలను తక్కువగా అంచనా వేయకుండా ఉండేలా విపత్తు-ప్రమాద అంచనా పద్ధతిని స్వతంత్రంగా సమీక్షించాలని సూచించారు.ప్రాజెక్టు ప్రకటించిన విస్తీర్ణం 199.89 హెక్టార్లు. అదే సమయంలో ఈఐఏలో సుమారు 20.5 కిలోమీటర్ల పొడవు, 140 నుంచి 300 మీటర్ల వెడల్పు కలిగిన కారిడార్ గురించి పేర్కొన్నారు. ఈ కొలతలను గణితపరంగా పరిశీలించినప్పుడు, నివేదికలో పేర్కొన్న కారిడార్ విస్తీర్ణం, ప్రకటించిన ప్రాజెక్టు విస్తీర్ణంతో పూర్తిగా సరిపోతుందా అనే ప్రశ్న తలెత్తుతోందన్నారు. ప్రాజెక్టు పరిధిని అధికారికంగా సవరించకుండానే ముందుకు వెళ్లేందుకు ఏ చట్టపరమైన ఆధారంతో అనుమతి ఇచ్చారని ప్రశ్నించారు. ఈ చట్టపరమైన ఉటంకింపుకు సంబంధించిన పూర్తి రికార్డును ప్రజలకు అందుబాటులో ఉంచాలని మేము డిమాండ్ చేసారు.నిర్వాసితులుగా మారే ప్రతి కుటుంబానికి ఎంతమంది కుటుంబాలు ప్రభావితమవుతున్నాయి, ఎందుకు ప్రభావితమవుతున్నాయి, ఏ భూమి మరియు నిర్మాణాలు ఇందులోకి వస్తున్నాయి, తుది సంఖ్యను ఎలా నిర్ణయించారనే విషయాలు స్పష్టంగా తెలియాల్సిన హక్కు ఉంది.అందువల్ల పునరావాసం మరియు పునరావాస ప్రణాళికలను ఖరారు చేసే ముందు అన్ని నిర్వాసిత, ప్రభావిత కుటుంబాలు, నిర్మాణాలు, భూములు మరియు జీవనోపాధులకు సంబంధించి స్వతంత్రంగా క్షేత్రస్థాయి ధృవీకరణ నిర్వహించాలని డిమాండ్ చేశారు. నిపుణుల పర్యావరణ మదింపు కమిటీని తిరిగి సమావేశపరచి, తదుపరి అందిన అన్ని ప్రజా ప్రతినిధిత్వాలు, సాంకేతిక సమర్పణలను పరిశీలించాలని, ఆ ప్రక్రియకు సంబంధించిన పూర్తి రికార్డును, మినిట్స్ను, నిర్ణయాలను ప్రజలకు అందుబాటులో ఉంచాలని డిమాండ్ చేశారు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్సైట్ ను సందర్శించండి. తాజా అప్ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
