పేదల కడుపు మంటపై రాజకీయం!

“ప్రతిపక్ష బీఆర్ఎస్, బీజేపీల విమర్శలు కేవలం రాజకీయ అసూయ, ఉనికిని కాపాడుకునే తాపత్రయంతో కూడుకున్నవి మాత్రమేనని స్పష్టమవుతోంది.  గత పదేళ్ల తమ పాలనలో తాము చేయలేని మంచి పనులను, ఇప్పుడు కొత్త కాంగ్రెస్ ప్రభుత్వం వేగంగా చేస్తుంటే చూసి ఓర్వలేక అడ్డుపడటం విపక్షాల దిగజారుడు రాజకీయాన్ని తెలియజేస్తోంది..”

 ‘సన్న’గిల్లిన ప్రతిపక్షాలు… కాంగ్రెస్ ‘స్మార్ట్’ పందెం!

తెలంగాణ పౌరసరఫరాల వ్యవస్థ చుట్టూ ఇప్పుడు రాజకీయ వేడి పరాకాష్ఠకు చేరింది. గతంలో వరి వేస్తే ఉరి అని చెప్పి రైతులను తీవ్ర భయాందోళనలకు గురిచేసిన నాయకులకు, ఇప్పుడు పేదల కడుపు నింపేందుకు తెచ్చిన ఉచిత సన్నబియ్యం పథకానికి ఉన్న వ్యత్యాసమేంటో స్పష్టంగా చూపుతామంటూ ముఖ్యమంత్రి రేవంత్ రెడ్డి విసిరిన అసెంబ్లీ రండి సవాల్ రాష్ట్ర రాజకీయాల్లో తీవ్ర ప్రకంపనలు సృష్టిస్తోంది. పదేళ్ల పాటు పేదల రేషన్ కార్డుల దరఖాస్తులను పట్టించుకోకుండా కోల్డ్ స్టోరేజ్ లో పెట్టిన బీఆర్ఎస్, అలాగే ఉచిత బియ్యం పంపిణీ పేరుతో కేవలం రాజకీయ ప్రచారం మాత్రమే చేసుకున్న బీజేపీ పార్టీలు ఇప్పుడు కాంగ్రెస్ ప్రభుత్వం ప్రవేశపెట్టిన స్మార్ట్ రేషన్ కార్డులు, నాణ్యమైన సన్నబియ్యం పంపిణీ కార్యక్రమంపై విమర్శలు గుప్పించడం అత్యంత విడ్డూరంగా ఉంది. పేదవాడి ఆత్మగౌరవాన్ని దెబ్బతీసిన పాత పాలకులు, తమ రాజకీయ ఉనికిని కాపాడుకోవడం కోసం ఉచితాల చుట్టూ అల్లిన విమర్శల నాటకాలను ఎండగట్టడానికి ఇది సరైన సమయంగా కనిపిస్తోంది.

గడిచిన పదేళ్ల బీఆర్ఎస్ పాలనా కాలాన్ని నిష్పాక్షికంగా పరిశీలిస్తే, బంగారు తెలంగాణ అనే రంగుల కలల ప్రచారం వెనుక పేదల ప్రాథమిక హక్కులను ఏ విధంగా కాలరాశారో చాలా స్పష్టమవుతుంది. వివాహమై కొత్తగా కాపురం పెట్టుకున్న లక్షలాది మంది యువ జంటలు, నిరుపేద కుటుంబాలు పదేళ్ల పాటు ఒక కొత్త రేషన్ కార్డు కోసం దరఖాస్తు చేసుకుని మీ-సేవ కేంద్రాలు, ప్రభుత్వ కార్యాలయాల చుట్టూ కాళ్లరిగేలా తిరిగినా ఫలితం లేకుండా పోయింది. క్రమబద్ధంగా కొత్త కార్డులు ఇవ్వకపోవడం ద్వారా వేల కోట్ల రూపాయల సబ్సిడీ భారాన్ని ఆదా చేశామని సంబరపడటం తప్ప, అర్హులైన ప్రతి పేదవాడికి ప్రాథమిక ఆహార భద్రత కల్పించాలనే కనీస బాధ్యతారాహిత్యం గత ప్రభుత్వంలో కొట్టొచ్చినట్లు కనిపించింది. మరోవైపు గత ప్రభుత్వ హయాంలో రేషన్ దుకాణాల ద్వారా ఇచ్చిన లావు దొడ్డు బియ్యాన్ని పేదలు నేరుగా తినలేక, అత్యంత తక్కువ ధరకు దళారులకు లేదా బ్లాక్ మార్కెట్ వ్యాపారులకు అమ్ముకోవాల్సిన దుస్థితి ఏర్పడింది. ఆ బియ్యం తిరిగి పశువుల దాణాగా మారడం లేదా రీసైక్లింగ్ అయి మళ్లీ రైస్ మిల్లులకు చేరడం బహిరంగ రహస్యంగా మారింది. పేదవాడి ఆకలి తీర్చడం అనే నెపంతో వేల కోట్ల ప్రజాధనాన్ని అక్రమార్కులు, దళారుల జేబుల్లోకి మళ్లించిన ఘనత ఆనాటి బీఆర్ఎస్ ప్రభుత్వానికే దక్కుతుంది.

మరొకవైపు కేంద్రంలో అధికారంలో ఉన్న బీజేపీ వైఖరి కూడా అంతకంటే విడ్డూరంగా తయారైంది. జాతీయ ఆహార భద్రతా చట్టం కింద రాష్ట్రాలకు కేటాయించే ధాన్యంలో తన వాటా ఎంత ఉందో స్పష్టంగా చెప్పకుండా, అంతా తామే ఉచితంగా ఇస్తున్నట్లు సొంత డబ్బా కొట్టుకోవడంలోనే కేంద్ర బీజేపీ నాయకులు నిత్యం బిజీగా గడుపుతున్నారు. రేషన్ కార్డులపై లేదా బియ్యం సంచులపై ప్రధాని మోడీ బొమ్మ ఉండాలని పట్టుబట్టే బీజేపీ నాయకులు, ఆ బియ్యాన్ని గ్రామ గ్రామాన ఉన్న పేదలకు సురక్షితంగా చేరవేయడానికి రాష్ట్ర ప్రభుత్వం సొంత నిధుల నుండి భరిస్తున్న వేల కోట్ల రూపాయల రవాణా, గోదాముల నిర్వహణ, హమాలీ, పంపిణీ సబ్సిడీల గురించి ఎందుకు నోరు మెదపరో ప్రజలకు సమాధానం చెప్పాలి. పేదవాడికి కేవలం దొడ్డు బియ్యం ఇస్తే సరిపోతుందనే అహంకార ధోరణి బీజేపీలో కనిపిస్తోంది. మరి తమ సొంత పాలనలో ఉన్న ఏ ఒక్క రాష్ట్రంలోనైనా పేదలకు ఉచితంగా నాణ్యమైన సన్నబియ్యం పంపిణీ చేసే ధైర్యం లేదా సాహసం బీజేపీ ప్రభుత్వం చేసిందా అంటే అక్కడ అస్సలు సమాధానం ఉండదు. ఒకవైపు సన్ ఫ్లవర్ నూనె, గ్యాస్, పప్పు ధాన్యాలు వంటి నిత్యావసర వస్తువుల ధరలను ఆకాశానికి ఎత్తేసి, సామాన్య మధ్యతరగతి ప్రజల నడుము విరిచిన బీజేపీకి తెలంగాణలో అమలువుతున్న సంక్షేమ రేషన్ వ్యవస్థపై విమర్శలు చేసే నైతిక అర్హత ఎంతమాత్రమూ లేదు.

రాజకీయంగా విశ్లేషిస్తే రేషన్ కార్డులు, ఆహార భద్రత విషయంలో బీఆర్ఎస్, బీజేపీలు రెండూ వేర్వేరు కావు. వారు నాణేనికి బొమ్మ, బొరుసు లాంటివారు. ఒకరు అధికారంలో ఉండి పేదలకు కొత్త రేషన్ కార్డులు ఇవ్వకుండా పదేళ్ల పాటు ఏడిపిస్తే, మరొకరు కేంద్రంలో ఉండి నిత్యావసరాల ధరలను విపరీతంగా పెంచి పేదవాడి గరిటెలో అన్నం లేకుండా చేశారు. ఈ రెండు ప్రతిపక్ష పార్టీలు తమ పాలనలో పేదలకు బుక్కెడు మంచి నాణ్యమైన బువ్వ పెట్టాలనే ఆలోచన ఎప్పుడైనా చేశాయా అంటే చరిత్ర పుటల్లో ఆ దాఖలాలు ఎక్కడా కనిపించవు. శాసనసభకు వచ్చి ప్రజా సమస్యలు, రైతుల సంక్షేమంపై నేరుగా అధికార పక్షంతో చర్చించే ధైర్యం లేక, కేవలం బయట మీడియా మైకుల ముందు అసత్య ప్రచారాలు చేయడం విపక్షాల నాయకత్వ బలహీనతకు స్పష్టమైన నిదర్శనంగా నిలుస్తోంది.

రేవంత్ రెడ్డి నాయకత్వంలోని కాంగ్రెస్ ప్రభుత్వం అధికారంలోకి వచ్చాక పౌరసరఫరాల శాఖలో విప్లవాత్మకమైన మార్పులకు శ్రీకారం చుట్టింది. కోటి 6 లక్షల మందికి కొత్తగా స్మార్ట్ రేషన్ కార్డులు అందించడం ద్వారా ప్రజల్లో ఉన్న పదేళ్ల సుదీర్ఘ నిరీక్షణకు కాంగ్రెస్ ప్రభుత్వం తెరదించింది. రాష్ట్రంలో ఉన్న 3 కోట్ల 48 లక్షల మంది ప్రజలకు రోజూ తినడానికి నాణ్యమైన సన్నబియ్యాన్ని ఉచితంగా అందించడం అనేది తెలంగాణ పౌరసరఫరాల చరిత్రలోనే ఒక విప్లవాత్మక నిర్ణయం. ధనవంతులు తినే నాణ్యమైన సన్న అన్నాన్ని పేదవాడు కూడా తిని తీరాలనే ఈ నిర్ణయం పేదల ఆత్మగౌరవాన్ని నిలబెట్టేలా ఉంది. అంతేకాక ఇన్నాళ్లూ సాగిన రేషన్ బియ్యం అక్రమ రీసైక్లింగ్ మాఫియా నడుము విరిచేందుకు ఇది అత్యుత్తమమైన మందుగా పనిచేస్తుంది. ఇక రేషన్ కార్డు అనేది కేవలం కాగితపు ముక్క కాదు, అది పేదవాడి హక్కు, గుర్తింపు. క్యూఆర్ కోడ్ సాంకేతికత కలిగిన స్మార్ట్ కార్డులను అందుబాటులోకి తీసుకురావడం ద్వారా దొంగ కార్డులకు, బియ్యం పక్కదారి పట్టించే అక్రమ రవాణాకు కాంగ్రెస్ ప్రభుత్వం పూర్తిగా చరమగీతం పాడింది.

ముగింపుగా చెప్పాలంటే ప్రతిపక్ష బీఆర్ఎస్, బీజేపీల విమర్శలు కేవలం రాజకీయ అసూయ, ఉనికిని కాపాడుకునే తాపత్రయంతో కూడుకున్నవి మాత్రమేనని స్పష్టమవుతోంది. గత పదేళ్ల తమ పాలనలో తాము చేయలేని మంచి పనులను, ఇప్పుడు కొత్త కాంగ్రెస్ ప్రభుత్వం వేగంగా చేస్తుంటే చూసి ఓర్వలేక అడ్డుపడటం విపక్షాల దిగజారుడు రాజకీయాన్ని తెలియజేస్తోంది. రాష్ట్రంపై ఉన్న ఆర్థిక సవాళ్లు, అప్పుల భారాన్ని తట్టుకుంటూ 3.48 కోట్ల మందికి సన్నబియ్యం పంపిణీ నిరంతరాయంగా, పారదర్శకంగా సాగేలా చూడడమే ప్రస్తుత కాంగ్రెస్ ప్రభుత్వం ముందున్న ప్రధానమైన బాధ్యత. ఈ పథకం గనుక క్షేత్రస్థాయిలో ఎలాంటి లోటుపాట్లు లేకుండా పక్కాగా అమలు జరిగితే, ప్రతిపక్షాల విమర్శల నోళ్లకు శాశ్వతంగా పూత పడటం ఖాయం!.