నేషనల్ హేరాల్ట్ వివాదంపై సోనియాగాంధీ
–ఒకపక్క ఆరోపణలు మరోపక్క తీర్పరిగా వ్యవహరిస్తున్న బీజేపీ
–బీజేపీ దూకుడును భరిస్తున్న రాహుల్ను చూస్తే గుండె తరుక్కు పోతోంది
–రాజకీయావగాహన లేనివాడిగా రాహుల్పై తప్పుడు ప్రచారం
–రాహుల్ మాట్లాడిన ప్రతి అంశాన్ని వక్రీకరించారు
–విస్తృత అధ్యయనశీలి రాహుల్
–విపాసనా యోగ సాధకుడు
–రాహుల్కు అండగా ప్రియాంక
–’బిలాంగింగ్: ఎ జర్నీ ఆఫ్ లవ్’పుస్తకంలో సోనియాగాంధీ
“తన రాజకీయ పనులు, పర్యటనలతో పాటు, అతను విస్తృతంగా చదివేవాడు, విపాసన ధ్యానాన్ని సాధన చేస్తుండేవాడు , క్రమం తప్పకుండా తన శారీరక దృఢత్వంపై శ్రద్ధ పెట్టి, ఐకిడో యుద్ధ కళల విభాగంలో బ్లాక్ బెల్ట్ సాధించాడు. 2018లో, అతడు టిబెట్‌లోని 21వేల అడుగుల ఎత్తైన పవిత్ర కైలాస పర్వతం చుట్టూ కఠినమైన పరిక్రమ యాత్ర అయిన కైలాస-మానసరోవర్ పరిక్రమను పూర్తిచేశాడు..”
న్యూదిల్లీ, నవంబర్ 11: నేషనల్ హెరాల్డ్ పునరుద్ధరణ ప్రక్రియ నుండి రాహుల్ గాంధీకి గానీ, తనకు గానీ ఒక్క పైసా కూడా అందలేదని కాంగ్రెస్ నాయకురాలు సోనియా గాంధీ స్పష్టం చేశారు. ప్రతిపక్ష నాయకులే లక్ష్యంగా బీజేపీ ఒకపక్క ఆరోపణలు చేస్తూనే మరోపక్క తీర్పరిగా వ్యవహరిస్తోందని ఆమె ఆరోపించారు. తన ఆత్మకథ ‘బిలాంగింగ్: ఎ జర్నీ ఆఫ్ లవ్’పుస్తకంలో ఆమె నరేంద్ర మోదీ ప్రభుత్వం మరియు బీజేపీ వ్యవహరించిన దూకుడు వ్యవహారశైలిని, రాహుల్ భరిస్తున్న తీరును చూసి తన హృదయం ముక్కలైందన్నారు. రాజకీయాల్లో ఇలాంటి దాడులు సర్వసాధారణమే. కాకపోతే, తన కుమారుడిని రాజకీయావగాహన లేని అహంకారపూరితుడిగా నిధులు సమకూర్చి మరీ వ్యవస్థీకృత ప్రచారం నిర్వహించారని, కేవలం తన కుమారుడి ప్రతిష్టను దెబ్బతీసే యత్నాలుగా పేర్కొంటూ వీటిని ఖండించారు. రాహుల్పై అవమానకరమైన దూషణలు చేశారు, అతనిని ఎగతాళి చేయడానికి, ఆయన పలికిన ప్రతి మాటను వక్రీకరించడానికి సోషల్ మీడియా ట్రోల్స్ రూపంలో విరుచుకుపడ్డారని తన పుస్తకంలో పేర్కొన్నారు. “ఓదార్పు మాటలు పెద్దగా ఉపయోగపడవని నా సొంత అనుభవం ద్వారా నాకు తెలుసు. నేను అతని ఇంటికి వెళ్లి, అతడిని కౌగిలించుకుని, అతనితో పాటు నిశ్శబ్దంగా కూర్చునేదాన్ని. అతడికి ఇష్టమైన వంటకాలను పంపించేదాన్ని. లేదా, అతడు పని మీద బయటకు వెళ్లినప్పుడు, నేను అతడి ఇంటికి వెళ్లి, తోటలో ఆయనకు ఎంతో ఇష్టమైన టెర్రియర్ కుక్కలతో ఆడుకుని, వాటి ఫోటోలను అతడికి పంపించేదాన్ని. ఆ విధంగా నేను అతని పట్ల సానుభూతి చూపించాను,” అని గాంధీ అన్నారు. “కానీ నేను అతడు (రాహుల్) సలిపిన వ్యక్తిగత పోరాటాన్ని కూడా చూడగలిగాను.. తన రాజకీయ పనులు, పర్యటనలతో పాటు, అతను విస్తృతంగా చదివేవాడు, విపాసన ధ్యానాన్ని సాధన చేస్తుండేవాడు క్రమం తప్పకుండా తన శారీరక దృఢత్వంపై శ్రద్ధ పెట్టి, ఐకిడో యుద్ధ కళల విభాగంలో బ్లాక్ బెల్ట్ సాధించాడు. 2018లో అతడు టిబెట్‌లోని 21వేల అడుగుల ఎత్తైన పవిత్ర కైలాస పర్వతం చుట్టూ కఠినమైన పరిక్రమ యాత్ర అయిన కైలాస-మానసరోవర్ పరిక్రమను పూర్తిచేశాడు. అతనికి తన సోదరి రూపంలో ఒక బలమైన ఆసరా,సన్నిహితుల నుండి దృఢమైన మద్దతు లభించింది,” అని ఆమె అన్నారు. ఒకేసారి నిందితుడిగా పేర్కొంటూ తీర్పరిగా వ్యవహరించడం బీజేపీ, ఆర్‌ఎస్‌ఎస్‌లు తమ ప్రత్యర్థులపై ప్రయోగించే ఒక ఎత్తుగడ అని సోనియా గాంధీ ఆరోపించారు. అంటే, నేరం చేశారనే అపోహను సృష్టించి, ఆరోపణలు ఎదుర్కొంటున్న వారిని ఒత్తిడికి లొంగిపోయేలా చేయడం లేదా తన భర్త రాజీవ్ గాంధీ విషయంలో జరిగినట్లుగా, ఆ విషయాన్ని చట్టపరమైన పరిష్కారానికి తీసుకురాకుండా అపరిష్కృతంగా వదిలేయడం అని ఆమె పేర్కొన్నారు
గత కొన్నేళ్లుగా రాహుల్పై ఎనిమిది రాష్ట్రాల్లో కనీసం 30 కేసులు దాఖలయ్యాయి. అవన్నీ రాజకీయ ప్రేరేపితమైనవే. అతడిని న్యాయవాదులతో తీరిక లేకుండా కోర్టుల చుట్టూ తిరిగేలా చేయాలనే స్పష్టమైన ఉద్దేశంతోనే ఆ కేసులు పెట్టారు. కానీ, ఒకవేళ వారు ఆయనను రాజకీయంగా నిర్వీర్యం చేయాలనుకున్నా, చివరకు వారికి నిరాశే ఎదురైవుంటుందన్నారు.
మూడేళ్ల క్రితం ఒక రాజకీయ ర్యాలీలో, మోదీ అనే ఇంటిపేరుతో దేశాన్ని భారీ ప్రజాధనంతో పోషించిన పలువురు మోసగాళ్ల పేర్లను ఆయన ప్రస్తావించారన్న ఆరోపణలపై 2023లో ‘క్రిమినల్ పరువు నష్టం’ కింద ఒక కేసు నమోదైందని ఆమె గుర్తుచేశారు. “తద్వారా అతను మోదీ అనే పేరున్న పౌరులందరినీ అపఖ్యాతి పాలు చేశారన్న వింత ఆరోపణలపై, గుజరాత్ హైకోర్టు ఆయనకు రెండేళ్ల జైలు శిక్ష విధించి, పార్లమెంటు నుండి బహిష్కరించి, ఎంపీ నివాసాన్ని ఖాళీ చేయించింది. ఏడాది తర్వాత జరగబోయే సార్వత్రిక ఎన్నికలు కూడా ఈ శిక్షకు ఒక కారణమై ఉండవచ్చు: ఎందుకంటే అది రాహుల్ను పోటీ చేయకుండా అనర్హుడిని చేస్తుంది. అయితే, కోర్టు ఆయనకు బెయిల్ మంజూరు చేయడంతో, సుప్రీంకోర్టులో అప్పీల్ చేసుకున్నారు,” అని ఆమె పేర్కొన్నారు. ప్రియాంక పక్కనే ఉండగా, రాహుల్ ప్రశాంతంగా ఇంటి తాళాలను అప్పగిస్తూ, సిబ్బందికి వీడ్కోలు పలుకుతూ ఒక్కొక్కరితో కరచాలనం చేయడాన్ని తాను భారమైన హృదయంతో చూశానని సోనియా గాంధీ అన్నారు.”బ్రిటిష్ పాలనకు వ్యతిరేకంగా జరిగిన జాతీయ ఉద్యమానికి ఒక స్వతంత్ర వేదికగా 1938లో జవహర్‌లాల్ నెహ్రూ లక్నోలో స్థాపించిన ‘నేషనల్ హెరాల్డ్’ పత్రికను పునరుద్ధరించడానికి మేము ప్రయత్నించినప్పుడు, ఒక కేసులో రాహుల్తో పాటు నా పేరు కూడా ప్రస్తావించబడింది. దశాబ్దాల తర్వాత ఆ పత్రిక నాణ్యత, పాఠకుల సంఖ్య రెండింటిలోనూ పడిపోయింది. దాని పునరుద్ధరణ తప్పనిసరి అని మేము భావించాం. ప్రధాన స్రవంతి పత్రికలు, టీవీ ఛానెళ్లు ఇప్పుడు ఎక్కువగా కాంగ్రెస్‌కు వ్యతిరేకమైన కార్పొరేట్ల నియంత్రణలో ఉన్నాయి,” అని ఆమె రాశారు.
“2010లో, ప్రఖ్యాత అకౌంటింగ్, న్యాయ నిపుణుల సలహా తీసుకున్న తర్వాత, ఒక కొత్త ‘లాభాపేక్ష లేని’ సంస్థ ప్రాతిపదికన ‘నేషనల్ హెరాల్డ్’ను పునరుద్ధరించి, ఆధునీకరించడానికి మేము పూనుకున్నాం,” అని సోనియా గాంధీ చెప్పారు. “ఈ అధికారిక హోదా ఏ వాటాదారుడికి గానీ, డైరెక్టర్‌కు గానీ ఎలాంటి ఆర్థిక ప్రయోజనం పొందేందుకు వీలు కల్పించదు. దాని బోర్డులోని డైరెక్టర్లలో ఎవరూ, రాహుల్ గానీ, నేను గానీ, లేదా ఈ పునరుద్ధరణ ప్రక్రియతో సంబంధం ఉన్న ఇతరులు గానీ, ఈ సంస్థ నుండి ఒక్క పైసా కూడా ఎప్పుడూ అందుకోలేదు. అయినప్పటికీ మాపై ‘నేరపూరిత కుట్ర’ కేసును బనాయించారు.2015, డిసెంబర్లో మేము బెయిల్ కోసం కోర్టు ముందు హాజరయ్యాం,” అని ఆమె అన్నారు.నాలుగేళ్ల తర్వాత, ప్రభుత్వ ఆదేశాల మేరకు ఈడీ సమాంతర విచారణను ప్రారంభించిందని ఆమె పేర్కొన్నారు.”అది అనేక ‘విచారణలు’ నిర్వహించింది, అందులో మమ్మల్ని వారి కార్యాలయానికి పిలిపించి రోజుల తరబడి విచారించారు. పన్నెండేళ్లకు పైగా సాగిన ఈ విషయం ఇప్పటికీ కోర్టులో విచారణలో ఉంది,” అని సోనియా గాంధీ గుర్తుచేసుకున్నారు.2014లో ప్రియాంక వ్యాపారవేత్త భర్త రాబర్ట్‌పై వచ్చిన ఆరోపణల విషయంలో కూడా ఇలాగే జరిగిందని ఆమె తెలిపారు.పదేళ్ల ‘విచారణ’ తర్వాత — ప్రభుత్వ ఏజెన్సీల నుండి ఎప్పటికప్పుడు వచ్చే సమన్లు, అరెస్టు చేస్తామనే బెదిరింపులు, విపరీతంగా పెంచిన పన్ను జరిమానాలు వంటి వాటి నడుమ, అతనిపై దాఖలైన అనేక కేసులలో ఒకదానిలో ప్రభుత్వ ఏజెన్సీలు అభియోగాలు మోపాయని సోనియా గాంధీ అన్నారు. ఇన్ని కష్టాలు ఉన్నప్పటికీ, ప్రియాంక కుటుంబం ఐకమత్యంగానే ఉందని, వాస్తవానికి వారు ఎదుర్కొన్న వాటన్నిటి వల్ల మరింత బలపడిందని ఆమె అన్నారు.హార్పర్‌కాలిన్స్ ఇండియా ప్రచురించిన “బిలాంగింగ్: ఎ జర్నీ ఆఫ్ లవ్” పుస్తకం మంగళవారం మార్కెట్లోకి వచ్చింది.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
