“రాష్ట్రంలో ప్రస్తుతం ఎమ్మెల్సీ ఎన్నికలతోపాటు వరుసగా అనేక ఎన్నికలు జరుగనున్నాయి. ఈ ఎన్నికల్లో బిఆర్‌ఎస్‌ తన పరువును నిలబెట్టుకోవడమన్నది ఇప్పుడు ఆ పార్టీకి ప్రధానమైన అంశం. ఒక విధంగా రానున్న అన్ని ఎన్నికలు ఆ పార్టీకి ప్రతిష్టాత్మకమే. తమ శక్తియుక్తులన్నీ కేంద్రీకరించాల్సిన తరుణంలో మళ్ళీ జాతీయ రాజకీయాలవైపు చూడడమన్నది నేల విడిచి సాము చేయడమేనంటున్నారు రాజకీయ విశ్లేషకులు. ముందుగా సొంత ఇల్లు చక్కదిద్దుకోవాల్సిన అవసరం ఆ పార్టీకి ఉందన్న విషయాన్ని మర్చిపోతే 2023 నాటి ఫలితాలే పునరావృతం అవకపోవు..”
జాతీయ రాజకీయాల్లోకి మాజీ ముఖ్యమంత్రి, బిఆర్‌ఎస్‌, అధినేత కల్వకుంట్ల చంద్రశేఖర్‌రావు రాబోతున్నారా.. ఇదే ఇప్పుడు రాష్ట్ర వ్యాప్తంగా ప్రధాన చర్చ కొనసాగుతున్నది. గత ఎన్నికల్లో అధికారం కోల్పోయినప్పటినుండి దాదాపు ఫామ్‌హౌస్‌కే పరిమితమైన కెసిఆర్‌ నిజంగానే ఏదో మాస్టర్‌ప్లాన్‌తోనే మళ్ళీ యాక్టివ్‌ రాజకీయాల్లోకి వచ్చే ఆలోచన చేస్తున్నట్లు దీనివల్ల అర్థమవుతున్నది. బిఆర్‌ఎస్‌ వర్కింగ్‌ ప్రెసిడెంట్ , మాజీ మంత్రి కెటిఆర్‌ తాజాగా కెసిఆర్‌ విషయంలో చేసిన ప్రకటన ఒక విధంగా తెలంగాణ రాజకీయాల్లో దుమారాన్ని లేపేదిగా ఉంది. రాష్ట్రంలో మూడేళ్ళుగా అధికారంలోఉన్న కాంగ్రెస్‌, పాలనావిషయంలో విఫలమైందన్న భావన ప్రజల్లో ఏర్పడింది. దీంతో కెసిఆర్‌ తిరిగి ముఖ్యమంత్రిగా రావాలంటూ పార్టీ వర్గాలతోపాటు వివిధ వర్గాలవారు ప్రసార మాధ్యమాల ద్వారా విజ్ఞప్తులు చేస్తున్న క్రమంలో కెటిఆర్‌ చేసిన ప్రకటన ఆ వర్గాల్లో ఉత్సాహాన్ని కలిగిస్తున్నప్పటికీ, కెసిఆర్‌ మళ్ళీ అ పొరపాటు చేస్తారా అన్న అనుమానాలుకూడా వ్యక్తమవుతున్నాయి.దేశంలో అధికారంలో ఉన్న బిజెపి సంకీర్ణకూటమిపై ఆధారపడి ఉండటం వల్ల పాలనా విషయంలో బలమైన నిర్ణయాలు తీసుకోలేకపోతున్నది. బలమైన పార్టీ బలహీనంగా మారుతున్నది. ‘ఇండీ’ కూటమికి నేతృత్వం వహిస్తున్న కాంగ్రెస్‌ పార్టీ ప్రతిపక్ష పాత్రను సమర్ధవంతంగా పోషించలేకపోతున్నది. అంతేకాకుండా ఈ కూటమిలో సమన్వయలోపం ఆ పార్టీని ఎప్పుడూ వెనక్కి లాగుతున్నది. కూటమినుండి ఒక్కొక్కరుగా బయటికి వెళుతున్నారు. కాబట్టి మరో కొత్త కూటమి ఏర్పాటుకు ఇది మంచి సమయని బిఆర్‌ఎస్‌ ఆలోచిస్తున్నట్లు కెటిఆర్‌ మాటలవల్ల తెలుస్తున్నది. రాష్ట్రంలో ప్రస్తుతం ఎమ్మెల్సీ ఎన్నికలతోపాటు వరుసగా అనేక ఎన్నికలు జరుగనున్నాయి. ఈ ఎన్నికల్లో బిఆర్‌ఎస్‌ తన పరువును నిలబెట్టుకోవడమన్నది ఇప్పుడు ఆ పార్టీకి ప్రధానమైన అంశం. ఒక విధంగా రానున్న అన్ని ఎన్నికలు ఆ పార్టీకి ప్రతిష్టాత్మకమే. తమ శక్తియుక్తులన్నీ కేంద్రీకరించాల్సిన తరుణంలో మళ్ళీ జాతీయ రాజకీయాలవైపు చూడడమన్నది నేల విడిచి సాము చేయడమేనంటున్నారు రాజకీయ విశ్లేషకులు. ముందుగా సొంత ఇల్లు చక్కదిద్దుకోవాల్సిన అవసరం ఆ పార్టీకి ఉందన్న విషయాన్ని మర్చిపోతే 2023 నాటి ఫలితాలే పునరావృతం అవకపోవు.
