దీర్ఘకాలంగా కొనసాగుతున్న వర్షాభావం నేలలో తేమను తగ్గించి పంటల ఎదుగుదలను దెబ్బతీస్తోంది. పంటల కీలక దశల్లో ఏర్పడుతున్న అధిక ఉష్ణోగ్రతలు కాయల ఏర్పాటును, గింజల అభివృద్ధిని ప్రభావితం చేసి మొత్తం దిగుబడిని తగ్గిస్తున్నాయి. ఎల్ నినో సంవత్సరాల్లో పురుగుల ఉధృతి కూడా వేగంగా పెరుగుతుందని వ్యవసాయ శాస్త్రవేత్తలు పేర్కొంటున్నారు. వేడి, పొడి వాతావరణం వల్ల అఫిడ్స్, వైట్ఫ్లై వంటి రసం పీల్చే పురుగులు అధికంగా వ్యాపించి రైతులు పురుగుమందులపై ఎక్కువ ఖర్చు చేయాల్సి వస్తోంది. దీంతో సాగు వ్యయం పెరిగి రైతుల ఆదాయం తగ్గుతోంది.
“పామాయిల్ సాగు వేగంగా విస్తరించడం వల్ల అనేక ఉష్ణమండల దేశాల్లో అడవుల నరికివేత, జీవవైవిధ్యానికి నష్టం వాటిల్లుతున్నట్లు పర్యావరణ నిపుణులు పేర్కొంటున్నారు. పర్యావరణ హిత పద్ధతుల్లో ఉత్పత్తి చేసిన పామ్ ఆయిల్ను ప్రోత్సహించడంతో పాటు దేశీయ నూనెగింజల ఉత్పత్తిని పెంచి దిగుమతులపై ఆధారపడటాన్ని తగ్గించాలని వారు సూచిస్తున్నారు.”-డా. ముచ్చుకోట సురేష్ బాబు
దేశీయ నూనెగింజల ఉత్పత్తి తగ్గడం దేశ ఆర్థిక వ్యవస్థపై కూడా ప్రభావం చూపుతోంది. ఇప్పటికే భారతదేశం తన వంటనూనెల అవసరాల్లో పెద్ద భాగాన్ని దిగుమతుల ద్వారానే తీర్చుకుంటోంది. దేశీయ ఉత్పత్తి మరింత తగ్గితే దిగుమతి బిల్లు భారీగా పెరిగే అవకాశం ఉంది. గతంలో బలహీన రుతుపవనాల కారణంగా వంటనూనెల దిగుమతులు రికార్డు స్థాయికి చేరుకోవడంతో విదేశీ మారక నిల్వలపై ఒత్తిడి పెరిగి, అంతర్జాతీయ ధరల మార్పులు నేరుగా వినియోగదారులపై ప్రభావం చూపాయి. కేంద్ర, రాష్ట్ర ప్రభుత్వాలు మధ్య భారతదేశం, పశ్చిమ భారతదేశంలోని అనేక వర్షాధార జిల్లాలను వాతావరణ మార్పులకు అత్యంత సున్నిత ప్రాంతాలుగా గుర్తించాయి. సాగునీటి సదుపాయాల విస్తరణ, కరువు తట్టుకునే పంట రకాల ప్రోత్సాహం, నేలలో తేమ సంరక్షణ, వాతావరణ ఆధారిత వ్యవసాయ సలహా సేవల బలోపేతం, పంటల వైవిధ్యీకరణ వంటి చర్యలను వేగవంతం చేయాలని నిపుణులు సూచిస్తున్నారు.
వంటనూనెల ఎంపికలో జాగ్రత్త అవసరం
వంటనూనెల లభ్యతపై పెరుగుతున్న ఆందోళనల నేపథ్యంలో ఆరోగ్యకరమైన వంటనూనెలపై ప్రజల్లో ఆసక్తి పెరుగుతోంది. తక్కువ ధర, విస్తృత లభ్యత కారణంగా భారతదేశం దిగుమతి చేసుకునే వంటనూనెల్లో పామ్ ఆయిల్ మరియు పామోలిన్ ఆయిల్ ప్రధాన స్థానంలో ఉన్నాయి. పామ్ ఆయిల్ను ఆయిల్ పామ్ చెట్టు పండ్ల నుంచి నేరుగా సేకరిస్తారు. పామోలిన్ ఆయిల్ అనేది పామ్ ఆయిల్ శుద్ధి ప్రక్రియలో లభించే ద్రవరూప భాగం. అధిక ఉష్ణోగ్రతలను తట్టుకునే గుణం ఉండటంతో ఇది దీప్ ఫ్రై, రోజువారీ వంటలకు అనుకూలంగా ఉంటుంది. ఇందులో విటమిన్–ఈ తో పాటు సహజ యాంటీ ఆక్సిడెంట్లు కూడా ఉంటాయి.
అయితే పోషకాహార నిపుణులు పామోలిన్ వినియోగంలో మితి పాటించాలని సూచిస్తున్నారు. ఇందులో సుమారు 50 శాతం సంతృప్త కొవ్వు (సాచ్యురేటెడ్ ఫ్యాట్) ఉండటంతో అధికంగా తీసుకుంటే ఎల్డీఎల్ (“చెడు”) కొలెస్ట్రాల్ పెరిగి గుండె సంబంధిత వ్యాధుల ప్రమాదం అధికమవుతుంది. అందువల్ల ఆవనూనె, వేరుశెనగ నూనె, నువ్వుల నూనె, పొద్దుతిరుగుడు నూనె, రైస్ బ్రాన్ ఆయిల్, ఆలివ్ ఆయిల్ వంటి ఆరోగ్యకరమైన నూనెలను మారుస్తూ వినియోగించాలని ఆరోగ్య నిపుణులు సూచిస్తున్నారు. అదే నూనెను పదేపదే వేడి చేయకుండా ఉండాలని కూడా వారు హెచ్చరిస్తున్నారు. మళ్లీ మళ్లీ వేడి చేసిన నూనెలో హానికర రసాయనాలు ఏర్పడి దీర్ఘకాలంలో ఆరోగ్య సమస్యలకు దారితీసే అవకాశం ఉంది.
పోషకాహారం – పర్యావరణ పరిరక్షణ రెండూ అవసరమే
పామాయిల్ సాగు వేగంగా విస్తరించడం వల్ల అనేక ఉష్ణమండల దేశాల్లో అడవుల నరికివేత, జీవవైవిధ్యానికి నష్టం వాటిల్లుతున్నట్లు పర్యావరణ నిపుణులు పేర్కొంటున్నారు. పర్యావరణ హిత పద్ధతుల్లో ఉత్పత్తి చేసిన పామ్ ఆయిల్ను ప్రోత్సహించడంతో పాటు దేశీయ నూనెగింజల ఉత్పత్తిని పెంచి దిగుమతులపై ఆధారపడటాన్ని తగ్గించాలని వారు సూచిస్తున్నారు.
వాతావరణ మార్పులు భారత వ్యవసాయాన్ని నిరంతరం ప్రభావితం చేస్తున్న నేపథ్యంలో, వాతావరణానికి అనుగుణంగా వ్యవసాయ విధానాలను బలోపేతం చేయడం, రైతులకు సాంకేతిక సహాయం అందించడం, ప్రజల్లో ఆరోగ్యకరమైన ఆహారపు అలవాట్లపై అవగాహన పెంచడం ద్వారా మాత్రమే దేశ ఆహార భద్రత, ప్రజల ఆరోగ్యం, ఆర్థిక స్థిరత్వాన్ని కాపాడగలమని నిపుణులు అభిప్రాయపడుతున్నారు.
