చెరువు కట్ట మీద కూర్చుని
చెర్ల నీళ్ళని చూస్తూ సముద్రమని మురిసితిని
చెర్ల చేపలు తారాడుతుంటే
సార్క్ ని చూసిన సంబురం
గట్టు మీది ఈదులను ఒడిసిపట్టి
ముంతలోకి ఒంచిన
కల్లు గుటకేస్తూ మైమరిచితిని
ఈతగెలలు గడ్డివాముల్లో మాగబెట్టి
ఈ నేల ఖర్జూరమని తింటిని
చెరువుమట్టి గడ్డపారతో పెకిలించి
వెదురుతట్టతో తడికల బండి నింపి
కొస పొలంలో కుప్పలు పోసి
పొలం నిండా చల్లి నేల సారం పెంచి
పైరుకి దన్ను నిచ్చిన సంతృప్తి నాలో
అలుగు పోస్తున్న చెరువు దుంకుతుంటే
ఆ ధారల కింద జలకాలాడుతూ
అదే జలపాతమని తలచితిని
తూముల్ల నీరు గలగల పారుతూ
ఒక్కోమడి తడుపుకుంటూ చివరంటా మళ్ళల్లో
వరి వయ్యారంగా నాట్యం చేయ
సమిష్టి చేతనం ఈ నేలన
చెర్ల బంక మట్టితో బొమ్మలు బండ్లు
సృజనాత్మకతకి తొలి మైలురాయి చోటు
ఆటపాటల విడిది
మా పెచ్చెరువు
