- 8 డిజిటల్ టీవీలు, 200 బ్యాగుల పంపిణీ
- ప్రభుత్వ పాఠశాలల విద్యాభివృద్ధికి సహకారం కొనసాగిస్తాం: వంగ రాజిరెడ్డి
హనుమకొండ, ప్రజాతంత్ర సెప్టెంబర్, 3 : ప్రభుత్వ పాఠశాలల్లోని విద్యార్థులకు ఆధునిక విద్యా సదుపాయాలను అందించి, వారి విద్యాభివృద్ధికి చేయూతనందించాలనే లక్ష్యంతో రోటరీ క్లబ్ ఆఫ్ హనుమకొండ (Rotary Club of Hanumkonda) ఆధ్వర్యంలో గురువారం హసన్పర్తి మండలం జయగిరి ప్రభుత్వ ప్రాథమిక పాఠశాలలో భారీ వితరణ కార్యక్రమాన్ని నిర్వహించారు. రోటరీ సభ్యులు పైళ్ల మహిపాల్ రెడ్డి ఆర్థిక సహకారంతో పాఠశాలకు 8 డిజిటల్ టీవీలు, విద్యార్థులకు 200 స్కూల్ బ్యాగులను పంపిణీ చేశారు.
ఈ సందర్భంగా రోటరీ క్లబ్ ఆఫ్ హనుమకొండ అధ్యక్షులు వంగ రాజిరెడ్డి మాట్లాడుతూ ప్రభుత్వ పాఠశాలల్లో చదువుతున్న విద్యార్థులకు అవసరమైన సదుపాయాలు కల్పిస్తూ వారి విద్యాభివృద్ధికి ప్రోత్సాహిస్తున్నామని తెలిపారు. ఆర్థిక పరిస్థితులు, వనరుల కొరత కారణంగా ప్రభుత్వ పాఠశాల విద్యార్థులు ఆధునిక విద్యకు దూరం కాకూడదని పేర్కొన్నారు. వారికి మెరుగైన విద్యా వాతావరణాన్ని కల్పించేందుకు రోటరీ క్లబ్ తన వంతు బాధ్యతగా సేవా కార్యక్రమాలను చేపడుతోందని తెలిపారు. మారుతున్న కాలానికి అనుగుణంగా విద్యాబోధనలో డిజిటల్ సాంకేతిక పరిజ్ఞానం కీలకంగా మారిందన్నారు. డిజిటల్ టీవీల ద్వారా పాఠ్యాంశాలను దృశ్యరూపంలో బోధించడం వల్ల విద్యార్థులు విషయాలను సులభంగా అర్థం చేసుకోవడంతో పాటు చదువుపై ఆసక్తిని పెంపొందించుకునే అవకాశం ఉంటుందని చెప్పారు. జయగిరి ప్రభుత్వ ప్రాథమిక పాఠశాలకు ఒకేసారి 8 డిజిటల్ టీవీలు అందుబాటులోకి రావడం ద్వారా డిజిటల్ బోధనకు మరింత అవకాశం ఏర్పడుతుందని ఆశాభావం వ్యక్తం చేశారు.
అదేవిధంగా విద్యార్థులకు 200 స్కూల్ బ్యాగులను అందించడం వారి రోజువారీ విద్యా అవసరాలకు ఉపయోగపడుతుందని తెలిపారు. ప్రభుత్వ పాఠశాలల అభివృద్ధికి ప్రభుత్వం చేస్తున్న కృషికి స్వచ్ఛంద సంస్థలు, దాతలు కూడా తమ వంతు సహకారం అందిస్తే విద్యార్థులకు మరిన్ని మెరుగైన అవకాశాలు లభిస్తాయని పేర్కొన్నారు.
విద్య, వైద్యం, పర్యావరణ పరిరక్షణతో పాటు సమాజంలోని అవసరమైన వర్గాలకు చేయూతనందించేందుకు రోటరీ క్లబ్ ఆఫ్ హనుమకొండ నిరంతరం కార్యక్రమాలు చేపడుతోందని వంగ రాజిరెడ్డి తెలిపారు. రానున్న రోజుల్లో మరిన్ని ప్రభుత్వ పాఠశాలలను గుర్తించి, విద్యార్థుల అవసరాలకు అనుగుణంగా దాతల సహకారంతో సేవా కార్యక్రమాలను విస్తృతంగా నిర్వహిస్తామని చెప్పారు.
ఈ పాఠశాలకు ఆర్థిక సహకారం అందించిన రోటరీ సభ్యులు పైళ్ల మహిపాల్ రెడ్డికి క్లబ్ సభ్యులు ప్రత్యేక కృతజ్ఞతలు తెలిపారు. ప్రభుత్వ పాఠశాల విద్యార్థుల అవసరాలను గుర్తించి డిజిటల్ టీవీలు, స్కూల్ బ్యాగుల పంపిణీకి సహకరించడం అభినందనీయమని పేర్కొన్నారు. రోటరీ క్లబ్ చేపట్టిన కార్యక్రమంపై పాఠశాల ప్రధానోపాధ్యాయులు, ఉపాధ్యాయులు, గ్రామస్తులు హర్షం వ్యక్తం చేశారు.
కార్యక్రమంలో సర్పంచ్, పాఠశాల ప్రధానోపాధ్యాయులు, ఉపాధ్యాయులు, రోటరీ క్లబ్ ఆఫ్ హనుమకొండ కోశాధికారి బైగోని కుమారస్వామి, క్లబ్ డైరెక్టర్లు, సభ్యులు, విద్యార్థులు, గ్రామ ప్రజలు పాల్గొన్నారు.
