నిజంగా రూపాయే బలహీనపడుతోందా?

ప్రతిరోజూ సాయంత్రం కాగానే, మన ఇళ్లలోని టెలివిజన్ తెరలపై ఒక నిశ్శబ్ద తుఫాను ప్రత్యక్షమవుతుంది. న్యూస్ ఛానెళ్లలో స్క్రోలింగ్ అవుతూ, బిజినెస్ బులెటిన్లలో హెడ్‌లైన్‌గా నిలుస్తూ ఒక నంబర్ మెరుస్తుంది .ఒక అమెరికన్ డాలర్‌కు ఇన్ని రూపాయలు. ఆ సంఖ్య కాస్త పైకి లేచినప్పుడల్లా, ఏ మాత్రం తడబడకుండా ఆర్థిక విశ్లేషకులు తమ గంభీరమైన గొంతులతో ఒకే మాట తేల్చేస్తారు, మన రూపాయి మళ్లీ బలహీనపడింది అని. కానీ, ఒక్క క్షణం ఆగి, మీ గుండె మీద చేయి వేసుకుని ఆలోచించండి. నిజంగా అక్కడ నలిగిపోతూ, బలహీనపడుతున్నది మన కరెన్సీ నోటేనా? లేక ఆ నోటు వెనుక కొండంత అండగా నిలబడాల్సిన మన దేశ ఆర్థిక వ్యవస్థ అంతర్గత నిర్మాణమా? ఇది కేవలం అంతర్జాతీయ మారకపు రేట్ల చుట్టూ తిరిగే సాంకేతిక సమస్య ఎంతమాత్రం కాదు. ఇది ప్రతి భారతీయుడి స్వావలంబనకు, ఈ దేశపు ఆత్మగౌరవానికి సంబంధించిన అత్యంత కీలకమైన ప్రశ్న.

    రూపాయి విలువ పడిపోతోందనే వార్త పత్రికల మొదటి పేజీల్లోకి రాగానే, వీధి చివర ఉండే కిరాణా దుకాణందారుడి నుండి సాఫ్ట్‌వేర్ ఉద్యోగి వరకు అందరి గుండెల్లో ఒక తెలియని దడ మొదలవుతుంది. అంతర్జాతీయ మార్కెట్లో పెట్రోల్ ధరలు మండుతాయి, విదేశాల్లో చదువుకోవాలనుకునే మధ్యతరగతి విద్యార్థుల కలల బడ్జెట్ తలకిందులవుతుంది. మనం నిత్య జీవితంలో వాడే విదేశీ వస్తువుల ధరలు ఆకాశాన్ని తాకుతాయి. అయితే, ఈ భయాందోళనలను నిజంగా సృష్టిస్తున్నది ఎవరు? మన రూపాయి స్వభావరీత్యా బలహీనమైనదా, లేక దాన్ని ఒక బలహీనమైన కరెన్సీగా చూడటమే ఒక అలవాటుగా మార్చుకున్నామా? ఆర్థిక శాస్త్ర గ్రంథాలు బోధించే సిద్ధాంతాలు ఒకలా ఉంటే, కళ్లముందు కనిపించే నిష్పాక్షిక వాస్తవాలు మరోలా ఉంటాయి. ఒక కరెన్సీ  అసలు సిసలైన బలం అనేది, కేవలం డాలర్‌తో పోల్చినప్పుడు వచ్చే అంకెలతో మాత్రమే కొలవబడదు.

     జపాన్ కరెన్సీ అయిన యెన్ విలువ డాలర్‌తో పోల్చి చూస్తే చాలా తక్కువగా కనిపిస్తుంది. కానీ అంత మాత్రాన జపాన్ వెనుకబడిందా? ప్రపంచంలోనే అత్యంత శక్తివంతమైన, సాంకేతికంగా ముందంజలో ఉన్న ఆర్థిక వ్యవస్థల్లో అది ఒకటి. చైనా తన కరెన్సీ యువాన్ విలువను అంతర్జాతీయ మార్కెట్లో ఉద్దేశపూర్వకంగానే తక్కువగా ఉంచుతుంది. దీనివల్ల వారి ఎగుమతులు చౌకగా మారి, ప్రపంచ వాణిజ్యాన్ని వారు శాసించగలుగుతున్నారు. కాబట్టి, టెలివిజన్ తెరలపై మారే సంఖ్యల హెచ్చుతగ్గులు మాత్రమే ఒక దేశ ఆర్థిక బలానికి నికరమైన కొలమానాలు కావు. ఇక్కడ మనం వేసుకోవాల్సిన అసలు ప్రశ్న ఏమిటంటే, ఆ కరెన్సీ వెనుక ఉన్న దేశీయ ఉత్పాదకత ఎంత? ఆ దేశం తన పౌరుల కనీస అవసరాలను తానే సొంతంగా తీర్చుకోగలుగుతోందా, లేక ప్రతి చిన్న విషయానికి విదేశాల వైపు చేతులు చాచి నిలబడుతోందా? నిజం మాట్లాడుకుంటే, మన నిజమైన బలహీనత దాగి ఉన్నది మన దిగుమతుల అలవాట్లలోనే. మనం మనకు కావలసిన ముడి చమురును విదేశాల నుండి తెచ్చుకుంటాం, నిత్యం వాడే ఎలక్ట్రానిక్స్ గ్యాడ్జెట్లను దిగుమతి చేసుకుంటాం, దేశ రక్షణకు అవసరమైన అత్యాధునిక రక్షణ సామగ్రి కోసం ఇతర దేశాలపై ఆధారపడతాం.

ఇక్కడితో ఆగితే బాగుండేది, కానీ చివరికి చిన్న పిల్లలు ఆడుకునే ప్లాస్టిక్ బొమ్మలు, మనం పూజించే దేవుళ్ల విగ్రహాలు కూడా విదేశీ  ఓడరేవుల నుంచే మన దేశంలోకి వస్తున్నాయి! ఈ రకమైన పరాధీనత కలిగి ఉన్న ఆర్థిక వలయంలో చిక్కుకున్నప్పుడు, రూపాయి అంతర్గతంగా ఎంత బలంగా ఉన్నా, బాహ్య ప్రపంచానికి అది బలహీనంగానే కనిపిస్తుంది. ఎందుకంటే మనం చేసే ప్రతి అంతర్జాతీయ కొనుగోలుకూ డాలర్ల రూపంలోనే భారీగా మూల్యం చెల్లించాల్సి వస్తోంది. మనం ఒక్కసారి చరిత్ర పుటలను వెనక్కి తిప్పితే ఒక ఆశ్చర్యకరమైన విషయం కనిపిస్తుంది. దశాబ్దాల క్రితం, మన దేశానికి స్వాతంత్ర్యం వచ్చిన తొలినాళ్లలో ఒక అమెరికన్ డాలర్‌కు కేవలం నాలుగు రూపాయలు మాత్రమే ఉండేవి.

కానీ నేడు ఆ సంఖ్య ఎనభై దాటి సరికొత్త రికార్డులను తాకుతోంది. ఈ సుదీర్ఘమైన ప్రయాణంలో అసలు ఏం జరిగింది? మన జనాభా విపరీతంగా పెరిగింది, దాంతోపాటు మన అవసరాల పరిధి కూడా విస్తరించింది. కానీ దురదృష్టవశాత్తూ, అదే నిష్పత్తిలో మన దేశీయ ఉత్పాదక సామర్థ్యం మాత్రం పెరగలేదు. మనం సుదీర్ఘకాలం పాటు కేవలం సాంప్రదాయ వ్యవసాయ ఆధారిత దేశంగానే ఉండిపోయాం. ప్రపంచ పారిశ్రామిక విప్లవంలో మనం అందుకోవాల్సిన వేగాన్ని అందుకోలేక వెనుకబడిపోయాం. ఇతర అగ్రరాజ్యాలు తయారీ రంగంలో దూసుకుపోతుంటే, మనం మాత్రం సేవా రంగంపై, ముఖ్యంగా సాఫ్ట్‌వేర్ ఎగుమతులపై ఎక్కువగా ఆధారపడ్డాం. ఐటీ రంగంలో మన ప్రతిభ గర్వకారణమే అయినప్పటికీ, అది మాత్రమే ఒక దేశ కరెన్సీని అంతర్జాతీయ మార్కెట్లో శాశ్వతంగా బలంగా నిలబెట్టలేదు.

    అయితే, ఈ నాణేనికి మరో అద్భుతమైన కోణం కూడా ఉంది. ప్రస్తుతం మన దేశ విదేశీ మారక నిల్వలు రికార్డు స్థాయిలో ఉన్నాయి. మన దేశీయ డిజిటల్ విప్లవానికి ప్రతీక అయిన ‘యూపీఐ’ లావాదేవీల నమూనా నేడు ప్రపంచ దేశాలకే ఆదర్శంగా నిలిచింది. ప్రపంచంలోనే మూడవ అతిపెద్ద స్టార్టప్ వ్యవస్థ మన భారతదేశంలోనే రూపుదిద్దుకుంది. కాబట్టి రూపాయి సంపూర్ణంగా పతనమైపోయిందని లేదా బలహీనపడిందని అనడం తీవ్రమైన అన్యాయమే అవుతుంది. ఇక్కడి అసలు నిజం ఏమిటంటే మన రూపాయి బలహీనమైనది కాదు, కానీ దానిలో దాగి ఉన్న పూర్తి స్థాయి శక్తి సామర్థ్యాలను మనం ఇంకా సంపూర్ణంగా ఆవిష్కరించుకోలేదు.ఈ వ్యాసం కేవలం పొడిపొడి ఆర్థిక గణాంకాలను విశ్లేషించడానికి రాసింది కాదు. ఇది ప్రతి భారతీయుడి గుండెను తట్టి లేపే ఒక ఆలోచనాత్మక ప్రశ్న. మీరు మార్కెట్లో కొనే ప్రతి విదేశీ బ్రాండ్ వస్తువు, విలాసాల కోసం మీరు చేసే ప్రతి అనవసరమైన దిగుమతి కొనుగోలు, మన రూపాయి ఆత్మవిశ్వాసంపై ఒక గాటు పెడుతుందని మర్చిపోకండి.

      మేడ్ ఇన్ ఇండియా అనేది కేవలం ప్రభుత్వ ప్రకటనలకో, గోడల మీది నినాదాలకో పరిమితం కాకూడదు. అది ప్రతి పౌరుడి దైనందిన జీవనశైలిగా మారాలి. మనం స్వదేశంలో ఉత్పత్తి చేయని ప్రతి వస్తువుకూ, మనం నిర్లక్ష్యం చేసిన ప్రతి ఎగుమతి అవకాశానికీ మన రూపాయి అంతర్జాతీయ వేదికపై భారీగా మూల్యం చెల్లించుకుంటోంది. రూపాయిని అంతర్జాతీయంగా బలోపేతం చేయడం అనేది కేవలం కేంద్ర ప్రభుత్వానికో లేక రిజర్వ్ బ్యాంక్‌కో సంబంధించిన బాధ్యత మాత్రమే కాదు. ఇందులో ప్రతి వ్యాపారవేత్త, ప్రతి శాస్త్రవేత్త, దేశానికి వెన్నెముకైన ప్రతి రైతు మరియు రేపటి పౌరుడైన ప్రతి విద్యార్థి భాగస్వాములు కావాలి. మనం విదేశీ దిగుమతులపై ఆధారపడటం తగ్గించుకుని, స్వదేశీ ఉత్పత్తులను గుండెలకు హత్తుకున్నప్పుడు, పరిశోధన మరియు అభివృద్ధి రంగాలలో పెట్టుబడులను పెద్ద ఎత్తున పెంచినప్పుడు, తయారీ రంగాన్ని ఒక ఉద్యమంలా బలోపేతం చేసినప్పుడు మాత్రమే మన రూపాయి తన నిజమైన విశ్వరూపాన్ని చూపిస్తుంది.

   ఇకనైనా మనం డాలర్‌తో పోల్చి మన రూపాయిని కించపరిచే ధోరణిని పూర్తిగా మానుకోవాలి. దానికి బదులుగా, మన రూపాయి వెనుక కొండంత అండగా నిలబడే దేశీయ ఆర్థిక శక్తిని , స్థిరమైన ఉత్పాదకతను, సంపూర్ణ స్వావలంబనను పటిష్టం చేసుకోవాలి. ఒక స్వతంత్ర జాతి కరెన్సీ  అసలైన బలం అనేది దాని ప్రజల శ్రమ స్వేదం నుండి, వారి మేధో సంపత్తి నుండి, వారి అచంచలమైన స్వాభిమానం నుండి మాత్రమే పుడుతుంది,అరువు తెచ్చుకున్న విదేశీ సాంకేతికత నుండి కాదు. రాబోయే రోజుల్లో రూపాయి బలమైనదా లేక బలహీనమైనదా అనే ప్రశ్నకు సమాధానం మన భవిష్యత్తు చరిత్రే నిర్ణయిస్తుంది. మరి ఆ సువర్ణ చరిత్రను మన చేతులతో మనమే రాస్తామా, లేక ప్రేక్షకులుగా అలా చూస్తూ ఉండిపోతామా? ముమ్మాటికీ మీదే!