తగ్గుతున్న చలితో పెరుగుతున్న చింత

– పెరిగిన శీతాకాల ఉష్ణోగ్రతలతో రబీ పంటలకు ముప్పు
– నీటి లభ్యతపై ఆందోళన
-పెరుగుతున్న విద్యుత్ వినియోగం
– రైతు ఆదాయం.. ఆహార భద్రతకు ముప్పు
– వెచ్చని రాత్రుల్లో నిద్ర కరువు
– ఏటా 0.07 డిగ్రీలు పెరిగిన ఉష్ణోగ్రతలు

హైదరాబాద్, ప్రజాతంత్ర, అక్టోబరు 28 : అక్టోబర్ నెల  అంటే తెల్లవారుజామున మంచుతెరలు, వణికించే చలిగాలులు, సాయంత్రం కాగానే అలముకునే చల్లదనం. కానీ, నెల గడిచిపోయింది.. ఈ కాలచిత్రం క్రమంగా మారుతున్నది. శీతాకాలంలోనూ ఫ్యాన్లు తిరుగుతున్నాయి. కొన్ని ప్రాంతాల్లో ఏసీల వాడకం కొనసాగుతున్నది. చలి ఆలస్యంగా మొదలవడం, మధ్యలో ఉష్ణోగ్రతలు అనూహ్యంగా పెరగడం, కొన్నిసార్లు ఒక్కోసారి వేగంగా పడిపోవడం వంటి పరిణామాలు వాతావరణంలో వస్తున్న విస్తృత మార్పుల ప్రభావాన్ని సూచిస్తున్నాయి. ఇవి కాలానికి సంబంధించిన మార్పులు మాత్రమే కావు. దేశ ఆహార భద్రత, సాగునీరు, కుటుంబాల ఖర్చులు, ప్రజారోగ్యంతో ముడిపడిన అంశాలు. ఈ ఏడాది అక్టోబర్‌లో హైదరాబాద్‌లో వేడి స్పష్టంగా కనిపిస్తున్నది. అక్టోబర్‌ 1–25 మధ్య అందుబాటులో ఉన్న నమోదుల ప్రకారం సగటు ఉష్ణోగ్రత 28.1 డిగ్రీలు కాగా, రోజువారీ గరిష్ఠాల సగటు సుమారు 34 డిగ్రీలుగా ఉన్నది. ఈ కాలంలో వర్షపాతం సున్నాగా నమోదైంది. అసాధారణ స్థాయి ఎల్‌నినో ఏర్పడవచ్చన్న అంచనాలు ఈ ఆందోళనలను మరింత పెంచుతున్నాయి. ఎల్‌నినో ప్రభావం అన్ని ప్రాంతాల్లో, అన్ని సందర్భాల్లో ఒకేలా ఉండదు. దేశంలో పెరుగుతున్న శీతాకాల ఉష్ణోగ్రతలను పూర్తిగా దానికే ఆపాదించలేమన్నది దీర్ఘకాలిక గణాంకాలు స్పష్టంగా చెబుతున్నాయి.

శతాబ్దానికి పైగా పెరుగుతున్న వేడి

భారత వాతావరణ విభాగం గణాంకాలను ప్రజా సమాచార వేదిక ‘డేటా ఫర్‌ ఇండియా’ విశ్లేషించిన ప్రకారం 1901 నుంచి 2024 మధ్య దేశంలో శీతాకాల ఉష్ణోగ్రతలు ప్రతి దశాబ్దానికి సుమారు 0.07 డిగ్రీల సెల్సియస్‌ చొప్పున పెరిగాయి. మార్పు స్వల్పంగా  కనిపించినప్పటికీ, దశాబ్దాలపాటు కొనసాగిన ఈ పెరుగుదల కాలానుగుణ వాతావరణంలో గణనీయమైన మార్పును సూచిస్తున్నది. ఒక ఏడాది చలి ఎక్కువగా వుందన్న కారణంగా ష్ణోగ్రతల్లో దీర్ఘకాలిక పెరుగుదలను కొట్టిపారేయలేము. అలాగే, ఒక వెచ్చని శీతాకాలాన్ని మాత్రమే ఆధారంగా చేసుకొని మొత్తం ధోరణిని నిర్ణయించలేం.ఈ శతాబ్దం ప్రారంభమైన తరువాత సాధారణం కంటే వెచ్చని శీతాకాలాలు మరింత తరచుగా నమోదవుతున్నట్లు విశ్లేషణ వెల్లడిస్తున్నది. అదే సమయంలో ఉష్ణోగ్రతల ఊగిసలాట కూడా పెరిగింది. కొన్ని సంవత్సరాల్లో అసాధారణమైన వేడి, మరికొన్ని సంవత్సరాల్లో తీవ్రమైన చలి కనిపిస్తున్నాయి. అంటే, సగటు ఉష్ణోగ్రతల పెరుగుదలతోపాటు కాలాల స్థిరత్వం కూడా దెబ్బతింటున్నది. రైతులు, విద్యుత్‌ సంస్థలు, నీటి సరఫరా వ్యవస్థలు గత అనుభవాల ఆధారంగా చేసుకునే ప్రణాళికలకు ఈ అనిశ్చితి కొత్త సవాళ్లు విసురుతున్నది.

రబీ పంటలపై అనిశ్చితి నీడ

శీతాకాలపు ఉష్ణోగ్రతలు పంటల పెరుగుదలలో కీలక పాత్ర పోషిస్తాయి. విత్తనం వేసే సమయం నుంచి పూత, గింజ అభివృద్ధి, పంట కోత వరకు వాతావరణం అనుకూలంగా ఉండాలి. చలి ఆలస్యమైతే రైతు సాగు సమయాన్ని మార్చుకోవాల్సి రావొచ్చు. పంట పెరుగుతున్న దశలో వేడి పెరిగి, నీటి లభ్యత తగ్గితే శీతాకాల పంటల సాగు కష్టమవుతుంది. చల్లని వాతావరణం అవసరమయ్యే రబీ పంటలు (ముఖ్యంగా గోధుమలు, శనగలు, ఆవాలు మరియు కొన్ని కూరగాయలు) వేడి వాతావరణం వల్ల దెబ్బతింటాయి. ఉష్ణోగ్రత పెరిగితే పంట కాలం తగ్గి, గింజ సరిగ్గా గిట్టక దిగుబడి గణనీయంగా తగ్గుతుంది.చలి తక్కువగా ఉండటం వల్ల చీడపీడలు, పురుగులు మరియు రసం పీల్చే పురుగుల ఉధృతి పెరుగుతుంది. వీటి నివారణకు రైతులు క్రిమిసంహారకాలపై అదనపు ఖర్చు చేయాల్సి వస్తుంది.ఎండ తీవ్రత పెరగడం వల్ల భూమిలో తేమ త్వరగా ఆవిరైపోతుంది, దీనివల్ల పంటలు నీటి ఒత్తిడికి గురవుతాయి. ప్రభావం పంటను బట్టి, ప్రాంతాన్ని బట్టి మారుతుంది. అందువల్ల దేశవ్యాప్తంగా ఒకే సాగు సూచన ఇవ్వడం కంటే స్థానిక పరిస్థితులకు తగిన సలహాలు అవసరం.నీటి కొరత ఈ సమస్యను మరింత జటిలం చేస్తుంది. వర్షాకాలంలో ఆశించిన స్థాయిలో నీరు చేరకపోతే జలాశయాలు, చెరువులు, భూగర్భజలాలపై ఆధారపడే రబీ సాగుకు ఇబ్బందులు ఎదురవుతాయి. వెచ్చని వాతావరణంలో నేల తేమను కాపాడుకోవడం కూడా కీలకమవుతుంది. అదనపు నీటి తడులు అవసరమైతే పంపుసెట్ల వినియోగం, సాగు ఖర్చులు పెరిగే అవకాశం ఉంటుంది. ఇప్పటికే పెట్టుబడుల భారంతో సతమతమవుతున్న చిన్న రైతుకు ఈ అదనపు వ్యయం ఆదాయాన్ని మరింత అనిశ్చితిలోకి నెట్టవొచ్చు.పంట దిగుబడి తగ్గడం ఒక్క రైతు కుటుంబానికే పరిమితమయ్యే సమస్య కాదు. వ్యవసాయ కూలీల ఉపాధి, గ్రామీణ కొనుగోలు శక్తి, మార్కెట్లకు వొచ్చే సరకు పరిమాణం మీద కూడా ప్రభావం పడవొచ్చు. సరఫరాలో అంతరాయం ఏర్పడితే ఆహార ధరలపై ఒత్తిడి పెరిగే అవకాశం ఉంటుంది. అందుకే శీతాకాల వాతావరణ మార్పులను వ్యవసాయ శాఖ పరిధిలోని అంశంగానే చూడలేము. గ్రామీణాభివృద్ధి, ఆహార సరఫరా, నీటిపారుదల శాఖలు సమన్వయంతో స్పందించాల్సిన అవసరం ఉన్నది.

నీటి కొరత

వర్షాకాలం ముగిసిన వెంటనే ఎండలు పెరగడం వల్ల చెరువులు, కుంటలు, మరియు జలాశయాల్లోని నీరు వేగంగా ఆవిరైపోతుంది. తెలంగాణలో ఇప్పటికే కొన్ని ప్రాంతాల్లో వర్షపాత లోటు ఉండటంతో రాబోయే వేసవి నాటికి తాగునీటి ఎద్దడి ముందే వచ్చే ప్రమాదం ఉంది. జలాశయాల్లో నీటి నిల్వలు తగ్గడం వల్ల రబీ (యాసంగి) పంటలకు సకాలంలో సాగునీరు అందించడం కష్టతరంగా మారుతుంది.

వేడి రాత్రులు.. పెరిగే బిల్లులు 

వేసవి నుంచి శీతాకాలానికి మారే మధ్యకాలంలో పగటి ఉష్ణోగ్రతల కంటే రాత్రి ఉష్ణోగ్రతలు వేగంగా పెరిగినట్లు ఈ విశ్లేషణ సూచిస్తున్నది. పగలంతా వేడిని ఎదుర్కొన్న తరువాత రాత్రివేళ లభించే చల్లదనం తగ్గిపోవడం ప్రజల దైనందిన జీవితాన్ని ప్రభావితం చేయవొచ్చు. ముఖ్యంగా సహజ గాలివెలుతురు తక్కువగా ఉండే ఇళ్లలో నివసించేవారికి అసౌకర్యం ఎక్కువగా ఉంటుంది . చల్లబరిచే పరికరాలు అందుబాటులో లేని కుటుంబాలపై ఈ మార్పు ఎలా పనిచేస్తున్నదో ప్రత్యేకంగా అధ్యయనం చేయాలి.

ప్రజల ఆరోగ్యంపై ప్రభావం

వెచ్చని రాత్రులు నిద్ర నాణ్యతను దెబ్బతీసే అవకాశం ఉన్నది. నిద్ర పట్టకపోవడం, మధ్యలో మెలకువ రావడం వంటి సమస్యలు రోజువారీ పనితీరుపై ప్రభావం పడుతుంది. వృద్ధులు, చిన్నారులు, దీర్ఘకాలిక అనారోగ్య సమస్యలున్నవారి అవసరాలను ప్రజారోగ్య ప్రణాళికల్లో పరిగణనలోకి తీసుకోవాలి. పగలు ఎండ, రాత్రి ఉక్కపోత లేదా అకస్మాత్తుగా ఉష్ణోగ్రతల్లో వచ్చే మార్పుల వల్ల రోగనిరోధక శక్తి తగ్గి ప్రజలు సీజనల్ వ్యాధుల (డెంగ్యూ, మలేరియా, టైఫాయిడ్, వైరల్ జ్వరాలు మరియు శ్వాసకోశ సమస్యలు) బారిన పడుతున్నారు శీతాకాలంలో కూడా రాత్రిపూట ఉక్కపోత (ముఖ్యంగా హైదరాబాద్, వరంగల్ లాంటి నగరాల్లో) కొనసాగడం వల్ల ప్రజలు ప్రశాంతమైన నిద్రను కోల్పోతున్నారు. దీనివల్ల మానసిక ఒత్తిడి, గుండె సంబంధిత సమస్యలు పెరుగుతాయి. చలి ఆలస్యమైతే ఫ్యాన్లు, ఏసీలు ఎక్కువకాలం ఉపయోగించాల్సి వొస్తుంది. ఫలితంగా కుటుంబాల విద్యుత్‌ వినియోగ ఖర్చు పెరుగుతుంది. శీతాకాలంలో వినియోగం తగ్గుతుందన్న అంచనాతో ప్రణాళికలు రూపొందించే విద్యుత్‌ సంస్థలకు కూడా పెరుగుతున్న డిమాండ్‌ సవాలు విసురుతోంది. ముఖ్యంగా పట్టణాల్లో భవనాల రూపకల్పన, గాలి ప్రసరణ, నీడ, పచ్చదనం వంటి అంశాలకు ప్రాధాన్యం ఇవ్వడం ద్వారా చల్లబరిచే పరికరాలపై ఆధారాన్ని కొంత తగ్గించేందుకు ప్రయత్నించవొచ్చు.

పర్యావరణంపై ప్రభావం

పొడి వాతావరణం మరియు పెరిగిన ఉష్ణోగ్రతల వల్ల తెలంగాణలోని అటవీ ప్రాంతాల్లో (ఉదాహరణకు ఉమ్మడి ఆదిలాబాద్, ఖమ్మం జిల్లాలు) అడవుల కార్చిచ్చు ప్రమాదాలు పెరుగుతాయి.వలస పక్షుల రాక తగ్గడం, జలాశయాల్లో ఉష్ణోగ్రత పెరిగి చేపలు చనిపోవడం వంటి పర్యావరణ అసమతుల్యతలు ఏర్పడతాయి. ఈ నేపథ్యంలో దేశంలో వాతావరణ మార్పుల చర్చ ప్రధానంగా వేసవి వడగాడ్పులు, రుతుపవనాల అస్థిరత, అతివృష్టి చుట్టూనే సాగుతున్నది. శీతాకాలంలో జరుగుతున్న మార్పులు కూడా అంతే శ్రద్ధకు అర్హమైనవి. వ్యవసాయ విశ్వవిద్యాలయాలు స్థానిక పంటలపై అధ్యయనాలు చేపట్టాలి. జిల్లా స్థాయిలో ఉష్ణోగ్రతలు, నేల తేమ, నీటి నిల్వల సమాచారాన్ని సమన్వయం చేసి రైతులకు సమయానుకూల సూచనలు అందించాలి. వాతావరణ అంచనాల్లో ఉన్న అనిశ్చితిని కూడా స్పష్టంగా వివరించాలి. తెలంగాణలో యాసంగి సాగు ప్రణాళికలను అందుబాటులో ఉన్న నీటి వనరులతో అనుసంధానించడం అవసరం. పంట ఎంపిక, విత్తనాలు నాటే  సమయం, నీటి వినియోగంపై మండల స్థాయిలో ఆచరణ సాధ్యమైన మార్గదర్శకత్వం అందాలి. రైతుకు మార్పు సూచిస్తే దానికి అవసరమైన విత్తనాలు, మార్కెట్‌ అవకాశాలు, ఆర్థిక తోడ్పాటు కూడా కల్పించాలి. ప్రజారోగ్యం, విద్యుత్‌ సరఫరా, పట్టణ ప్రణాళికల్లో శీతాకాలపు వేడెక్కుదలకు చోటివ్వాలి. తగ్గుతున్న చలి మన జీవన వ్యవస్థల్లో పెరుగుతున్న ఒత్తిడికి సంకేతం. ఆ సంకేతాన్ని ముందుగానే గుర్తించి స్పందించడమే రాబోయే నష్టాలను తగ్గించే మార్గం.