శేరిలింగంపల్లి, ప్రజాతంత్ర, జులై 11 మాదాపూర్లోని ప్రముఖ టాటా మోటార్స్ షోరూమ్లో శనివారం ఉదయం భారీ అగ్నిప్రమాదం సంభవించింది. ఈ ఘటనలో షోరూమ్లోని పలు కొత్త కార్లు, ఫర్నిచర్తో పాటు విలువైన ఎలక్ట్రానిక్ పరికరాలు పూర్తిగా దగ్ధమయ్యాయి. ప్రమాదంలో కోట్ల రూపాయల ఆస్తి నష్టం జరిగినట్లు ప్రాథమికంగా అంచనా వేస్తున్నారు. అయితే ప్రమాద సమయంలో షోరూమ్లో సిబ్బంది ఎవరూ లేకపోవడంతో పెను ప్రాణనష్టం తప్పింది. మాదాపూర్ మెయిన్ రోడ్డులో ఉన్న ఈ షోరూమ్లో ఉదయం ఒక్కసారిగా మంటలు చెలరేగాయి. క్షణాల్లోనే మంటలు భారీగా ఎగిసిపడ్డాయి. దట్టమైన పొగలు ఆకాశానికి అంటడంతో చుట్టుపక్కల వాణిజ్య సముదాయాల్లోని వారు, స్థానికులు భయాందోళనకు గురయ్యారు. వెంటనే సమాచారం అందుకున్న అగ్నిమాపక శాఖ సిబ్బంది బహుళ ఫైర్ ఇంజన్లతో ఘటనా స్థలానికి చేరుకున్నారు. దాదాపు గంటపాటు అధికారులు శ్రమించి మంటలను అదుపులోకి తెచ్చారు.
షార్ట్ సర్క్యూట్ వల్ల అని అనుమానం
ప్రమాదానికి గల కారణాలపై పోలీసులు, అగ్నిమాపక అధికారులు దర్యాప్తు చేపట్టారు. ప్రాథమికంగా విద్యుత్ షార్ట్ సర్క్యూట్ కారణంగానే మంటలు చెలరేగి ఉండవచ్చని అధికారులు అనుమానిస్తున్నారు. అయితే ఖచ్చితమైన కారణాలు తెలియాలంటే పూర్తి స్థాయిలో విచారణ జరగాల్సి ఉందని తెలిపారు. ఘటనా స్థలాన్ని సైబరాబాద్ పోలీసులు, ఫైర్ అధికారులు సంయుక్తంగా పరిశీలించారు. ఈ మేరకు కేసు నమోదు చేసి నష్టం వివరాలను సేకరిస్తున్నారు. మంటలను వేగంగా అదుపులోకి తీసుకురావడం వల్ల ప్రక్కనే ఉన్న ఇతర దుకాణాలకు నష్టం తప్పిందని అగ్నిమాపక అధికారులు వెల్లడించారు. ఆస్తి నష్టంపై పూర్తి నివేదిక సిద్ధం చేస్తున్నామని, బీమా సంస్థలతో మాట్లాడుతున్నామని షోరూమ్ యాజమాన్యం తెలిపింది.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్సైట్ ను సందర్శించండి. తాజా అప్డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
