– నేరగాళ్ల టెక్నాలజీ సవాల్‌గా మారింది
– దేశంలో పటిష్టంగా తెలంగాణ పోలీసింగ్
– డ్రగ్స్ నియంత్రణకు మరిన్ని కఠన చర్యలు
– డీజీపీగా సీవీ ఆనంద్ బాధ్యతల స్వీకరణ
హైదరాబాద్, ప్రజాతంత్ర, మే 1: తెలంగాణ డీజీపీగా సీనియర్ ఐపీఎస్ అధికారి సీవీ ఆనంద్ శుక్రవారం బాధ్యతలు స్వీకరించారు. డీజీపీ కార్యాలయానికి చేరుకున్న ఆయనకు పోలీసు ఉన్నతాధికారులు సాదరంగా స్వాగతం పలకగా కార్యాలయ ఆవరణలో పోలీసుల నుంచి గౌరవ వందనం స్వీకరించారు. అనంతరం పండితుల వేద ఆశీర్వచనాల మధ్య పదవీ బాధ్యతలు చేపట్టారు. ఈ సందర్భంగా పలువురు ప్రజా ప్రతినిధులు, పోలీసు అధికారులు నూతన డీజీపీని కలిసి శుభాకాంక్షలు తెలియజేశారు. ఈ సందర్భంగా ఆయన విలేకరులతో మాట్లాడుతూ ప్రభుత్వ ఆశయాలు, ఆకాంక్షలు నెరవేరేలా కృషి చేస్తానన్నారు. శాంతిభద్రతల కోసం అహర్నిశలూ శ్రమిస్తానని చెప్పారు. శాంతిభద్రతల పరిరక్షణ, నేరాల దర్యాప్తు పోలీసుల ప్రాథమిక విధులే అయినా మారుతున్న కాలానికి అనుగుణంగా సాంకేతికతను జోడించి మరింత సమర్థంగా పనిచేస్తామన్నారు. రాష్ట్ర పోలీస్ శాఖలో విప్లవాత్మక మార్పులకు శ్రీకారం చుడుతున్నట్లు పేర్కొన్న డీజీపీ¾ ప్రధానంగా నేరం జరిగిన తర్వాత స్పందించడం కంటే జరగకముందే వచ్చే సంకేతాలను పసిగట్టి అప్రమత్తంగా ఉండటంపై దృష్టి సారిస్తామన్నారు. చిన్న సమస్యలను నిర్లక్ష్యం చేస్తే అవి జఠిలమవుతాయని, అందుకే ముందస్తు నిఘా వ్యవస్థను పటిష్టం చేస్తామని చెప్పారు. ముఖ్యంగా మహిళల భద్రత, బాలల అక్రమ రవాణా నియంత్రణ వంటి అంశాలపై రాజీ లేని పోరాటం చేస్తామని ప్రకటించారు. నేటి తరం సైబర్ నేరాలు, డ్రగ్స్ ముప్పును ఎదుర్కొంటోందని ఆందోళన వ్యక్తం చేసిన డీజీపీ వీటిని అరికట్టడానికి సైబర్ సెక్యూరిటీ బ్యూరోను శక్తివంతం చేస్తామన్నారు. విద్యా సంస్థల్లో యాంటీ డ్రగ్స్ కమిటీలను ఏర్పాటు చేసి యువతను ఈ మహమ్మారి నుండి కాపాడతామన్నారు. రోడ్డు ప్రమాదాల నివారణకు రాష్ట్రవ్యాప్తంగా ఒకే విధమైన నిబంధనలు అమలు చేసేందుకు ప్రత్యేకంగా ‘ట్రాఫిక్ మేనేజ్‌మెంట్ అండ్ రోడ్ సేఫ్టీ బ్యూరో’ను ఏర్పాటు చేయాలని నిర్ణయించారు. కేవలం దొంగతనాలే కాకుండా ఆహార కల్తీ, రియల్ ఎస్టేట్ మోసాలు, బెట్టింగ్, స్మగ్లింగ్ వంటి వ్యవస్థీకృత నేరాలపై ఉక్కుపాదం మోపుతామని హెచ్చరించారు.
శాఖ పునర్వ్యవస్థీకరణ
గతంలో నక్సల్స్ నియంత్రణ కోసం గ్రే హౌండ్స్, ఎసఐబి విభాగాలను ఏర్పాటు చేసి కేటాయించిన సిబ్బందిని ప్రస్తుతం అవసరమైన సైబర్, నార్కోటిక్స్ విభాగాలకు బదిలీ చేస్తామని, అలాగే సుమారు 19 వేల పోలీసు ఖాళీలను భర్తీ చేసేందుకు ప్రభుత్వం సిద్ధంగా ఉందని, అందులో ఇప్పటికే ఐదు వేల నియామకాలకు ఆమోదం లభించిందని తెలిపారు. ఏసీబీ, సీఐడీ వంటి కీలక విభాగాలకు పూర్వవైభవం తీసుకురావడంతోపాటు, వివిధ ప్రభుత్వ విభాగాలతో పోలీస్ పరిధిని అనుసంధానించి సమన్వయం పెంచుతామన్నారు. సాంకేతికత వినియోగంలో భాగంగా ఆర్టిఫిషియల్ ఇంటెలిజెన్స్ టూల్స్, డ్రోన్ల వినియోగాన్ని పెంచుతామన్నారు. ముఖ్యంగా ట్రాఫిక్ సిగ్నల్స్ సింక్రనైజేషన్ కోసం గూగుల్ వంటి సంస్థల సహకారం తీసుకుంటామని, విపత్తు సమయాల్లో హైడ్రా, ఫైర్ డిపార్ట్‌మెంట్లతో కలిసి ఫస్ట్ రెస్పాండర్‌గా పనిచేసేలా సిబ్బందికి శిక్షణ ఇస్తామన్నారు. రాష్ట్రవ్యాప్తంగా పాడైపోయిన సీసీ కెమెరాల మరమ్మతుల కోసం ప్రత్యేక డ్రైవ్ చేపడతామని, దర్యాప్తులో సాంకేతిక లోపాల వల్ల నేరస్తులు తప్పించుకోకుండా ఆర్టిఫిషియల్ ఇంటెలిజెన్స్ ద్వారా డాక్యుమెంటేషన్‌ను పక్కాగా చేస్తామని చెప్పారు. రాష్ట్రంలో నక్సలిజం దాదాపు తుడిచిపెట్టుకుపోయిందని, మిగిలి ఉన్న వారు కూడా పునరావాస పాలసీ ప్రకారం జనజీవన స్రవంతిలో కలవాలని కోరారు. ఫోన్ ట్యాపింగ్ కేసు దర్యాప్తు తుది దశలో ఉందని, త్వరలోనే సమీక్షించి దానికి అనుగుణంగా చార్జ్‌షీట్ వేస్తామని తెలిపారు. సోషల్ మీడియాలో వ్యక్తిగత దూషణలకు దిగితే కఠిన చర్యలు ఉంటాయని హెచ్చరిస్తూనే రాజ్యాంగబద్ధమైన భావప్రకటనా స్వేచ్ఛను గౌరవిస్తామన్నారు. తాను మెక్రో మేనేజ్‌మెంట్ విధానాన్ని అనుసరిస్తానని, క్షేత్రస్థాయి అధికారులకు పూర్తి స్వేచ్ఛనిస్తూనే క్రైమ్ మీటింగ్స్ ద్వారా వారి పనితీరును పర్యవేక్షిస్తానని ఆనంద్ స్పష్టం చేశారు. సమావేశంలో శాంతిభద్రతల డీజీ మహేష్ ఎం భగవత్, టీఎసఎల్పీఆర్బీ చైర్మన్ వివి శ్రీనివాసరావు, ఎస్పీఎఫ్ డీజీ స్వాతి లక్రా, హైదరాబాద్ పోలీస్ కమిషనర్ వి.సి.సజ్జనార్, సిఐడి డీజీ చారు సిన్హా, గ్రేహౌండ్స్, ఆక్టోపస్ డీజీ అనిల్ కుమార్ తదితరులు సమావేశంలో పాల్గొన్నారు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్‌సైట్ ను సందర్శించండి. తాజా అప్‌డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
