నేటి యువతరానికి విలువల వికాసం అత్యవసరం

“నేటి యువతలో ఎక్కువ సమయం వాట్సాప్, ఇన్‌స్టాగ్రామ్, ఫేస్‌బుక్, యూట్యూబ్ వంటి సామాజిక మాధ్యమాలకే పరిమితమవుతోంది. సమాచార సేకరణకు ఉపయోగపడాల్సిన సాంకేతికత సమయాన్ని వృథా చేసే సాధనంగా మారుతోంది. సోషల్ మీడియా ప్రపంచంలో మునిగిపోవడం వల్ల సామాజిక స్పృహ, కుటుంబ అనుబంధాలు, సామాజిక బాధ్యతలు క్రమంగా తగ్గిపోతున్నాయి.”

“యువతకు విలువల వికాసం – వివేకానంద స్ఫూర్తి, కలాం కలలు, జపాన్ క్రమశిక్షణ”
ప్రపంచం సాంకేతికంగా ఎంతో అభివృద్ధి చెందుతున్న ఈ కాలంలో మానవ విలువలు క్రమంగా క్షీణిస్తున్నాయి. నేటి యువత విజ్ఞానంలో ముందంజలో ఉన్నప్పటికీ, విలువలు, నైతికత, సామాజిక బాధ్యత, దేశభక్తి వంటి అంశాలపై తగిన శ్రద్ధ చూపడం లేదు. భవిష్యత్తు భారతదేశ నిర్మాణంలో యువత కీలక పాత్ర పోషించ నున్నందున వారిలో విలువల వికాసం అత్యంత అవసరం.

పాఠ్యప్రణాళికలలో విలువల విద్య అవసరం
నేటి విద్యా వ్యవస్థ ప్రధానంగా మార్కులు, ఉద్యోగాలు, పోటీ పరీక్షలకే పరిమితమవుతోంది. కాలేజీలు, విశ్వవిద్యాలయాల్లో విలువల ఆధారిత విద్యకు తగిన ప్రాధాన్యం ఇవ్వడం లేదు. విద్యార్థులు కేవలం డిగ్రీలు సంపాదించడం కాకుండా మంచి పౌరులుగా ఎదగాలి. అందుకోసం పాఠ్యప్రణాళికలలో నైతిక విలువలు, వ్యక్తిత్వ వికాసం, సామాజిక బాధ్యత, పర్యావరణ పరిరక్షణ, భారతీయ సంస్కృతి వంటి అంశాలను తప్పనిసరిగా చేర్చాలి.

విలువలు లేని చదువులు సమాజానికి ప్రమాదం
నేటి విద్యార్థులు ఉన్నత విద్యను అభ్యసిస్తున్నప్పటికీ, మానవీయ విలువల పట్ల ఆసక్తి తగ్గుతోంది. విజ్ఞానం ఉన్నా వివేకం లేకపోతే అది సమాజానికి మేలు చేయదు. ఉద్యోగం సంపాదించడం మాత్రమే జీవిత లక్ష్యం కాదని, సమాజానికి ఉపయోగపడే వ్యక్తిగా ఎదగడం కూడా ముఖ్యమని విద్యార్థులకు తెలియజేయాలి.

సామాజిక రుగ్మతలు పెరుగుతున్నాయి
అవినీతి, హింస, మాదకద్రవ్యాల వినియోగం, అసహనం, కుటుంబ విలువల క్షీణత వంటి సామాజిక రుగ్మతలు నేటి సమాజాన్ని వేధిస్తున్నాయి. వీటి వెనుక ప్రధాన కారణం విలువల లోపమే. యువతలో క్రమశిక్షణ, బాధ్యత, సేవాభావం పెంపొందించినప్పుడే సమాజం ఆరోగ్యకరమైన దిశగా పయనిస్తుంది.

పర్యావరణ విధ్వంసం – యువత బాధ్యత
అభివృద్ధి పేరుతో ప్రకృతిని నాశనం చేయడం నేటి ప్రపంచానికి పెద్ద సవాలుగా మారింది. అడవుల నరికివేత, కాలుష్యం, నీటి వనరుల క్షీణత, వాతావరణ మార్పులు మానవాళి భవిష్యత్తును ప్రశ్నార్థకం చేస్తున్నాయి. పర్యావరణ పరిరక్షణ ప్రతి విద్యార్థి బాధ్యత అనే అవగాహన విద్యాసంస్థల ద్వారా కల్పించాలి.

కార్పొరేట్ దురాశ, మానవ విలువలు
ఆర్థికాభివృద్ధి అవసరమే అయినప్పటికీ, లాభాల కోసం మానవ విలువలను త్యాగం చేయడం సమాజానికి హానికరం. ధనం సంపాదించడం ఎంత ముఖ్యమో, సమాజం పట్ల బాధ్యత కలిగి ఉండటం కూడా అంతే ముఖ్యమని యువత గ్రహించాలి.

సామాజిక మాధ్యమాల వ్యసనం
నేటి యువతలో ఎక్కువ సమయం వాట్సాప్, ఇన్‌స్టాగ్రామ్, ఫేస్‌బుక్, యూట్యూబ్ వంటి సామాజిక మాధ్యమాలకే పరిమితమవుతోంది. సమాచార సేకరణకు ఉపయోగపడాల్సిన సాంకేతికత సమయాన్ని వృథా చేసే సాధనంగా మారుతోంది. సోషల్ మీడియా ప్రపంచంలో మునిగిపోవడం వల్ల సామాజిక స్పృహ, కుటుంబ అనుబంధాలు, సామాజిక బాధ్యతలు క్రమంగా తగ్గిపోతున్నాయి.

పుస్తక పఠన సంస్కృతి తగ్గిపోతోంది
ఒకప్పుడు యువతలో పుస్తక పఠనం ఒక అలవాటుగా ఉండేది. నేడు వెయ్యి మందిలో ఒకరు కూడా పుస్తకాలు చదవడం లేదని చెప్పడం అతిశయోక్తి కాదు. మంచి పుస్తకాలు వ్యక్తిత్వాన్ని తీర్చిదిద్దుతాయి, ఆలోచనా శక్తిని పెంచుతాయి, జీవితానికి దిశానిర్దేశం చేస్తాయి. ప్రతి విద్యార్థి రోజూ కొంత సమయం పుస్తక పఠనానికి కేటాయించే అలవాటు పెంపొందించుకోవాలి.

ఆధ్యాత్మిక సాధన అవసరం
మానసిక ప్రశాంతత, ఏకాగ్రత, ఆత్మవిశ్వాసం కోసం ఆధ్యాత్మిక సాధన ఎంతో అవసరం. యోగా, ధ్యానం, ప్రార్థన, మంచి ఆలోచనలు మనిషిని ఉన్నత వ్యక్తిత్వం వైపు నడిపిస్తాయి. భౌతిక అభివృద్ధితో పాటు ఆధ్యాత్మిక వికాసం కూడా సమానంగా అవసరమని యువత గ్రహించాలి.

స్వామి వివేకానంద, డాక్టర్ ఏ.పి.జె. అబ్దుల్ కలాం ఆదర్శం
నేటి యువతకు స్వామి వివేకానంద మరియు డాక్టర్ ఏ.పి.జె. అబ్దుల్ కలాం జీవితాలు గొప్ప ఆదర్శాలు. స్వామి వివేకానంద యువతలో ఆత్మవిశ్వాసం, దేశభక్తి, సేవాభావాన్ని పెంపొందించారు. డాక్టర్ అబ్దుల్ కలాం క్రమశిక్షణ, కృషి, వినయం, దేశాభివృద్ధి పట్ల అంకితభావానికి ప్రతీకగా నిలిచారు. యువత వీరి జీవితాలను అధ్యయనం చేసి ఆదర్శంగా తీసుకోవాలి.

భారతదేశ ఔన్నత్యాన్ని అర్థం చేసుకోవాలి
భారతదేశం ప్రపంచానికి జ్ఞానం, సంస్కృతి, ఆధ్యాత్మికతను అందించిన మహోన్నత దేశం. మన చరిత్ర, సంప్రదాయాలు, స్వాతంత్య్ర‌ సమరయోధుల త్యాగాలు, శాస్త్రవేత్తల విజయాలు యువతకు తెలియజేయాలి. భారతీయతపై గర్వం, దేశభక్తి, జాతీయ బాధ్యతాభావం పెంపొందినప్పుడే దేశం మరింత అభివృద్ధి చెందుతుంది.

జపాన్ నుండి నేర్చుకోవాల్సిన పాఠాలు
ప్రపంచంలోని అభివృద్ధి చెందిన దేశాలలో జపాన్ ఒకటి. రెండవ ప్రపంచ యుద్ధం తరువాత తీవ్ర విధ్వంసాన్ని ఎదుర్కొన్నప్పటికీ, క్రమశిక్షణ, కృషి, విద్య, విలువల ఆధారంగా ప్రపంచానికి ఆదర్శ దేశంగా ఎదిగింది. జపాన్ విద్యా వ్యవస్థలో విద్యార్థులకు కేవలం పాఠ్యాంశాలనే కాకుండా బాధ్యత, పరిశుభ్రత, సమయపాలన, పరస్పర గౌరవం, సామాజిక బాధ్యత వంటి విలువలను చిన్ననాటి నుంచే బోధిస్తారు. జపాన్ పాఠశాలల్లో విద్యార్థులే తమ తరగతి గదులను శుభ్రం చేసుకుంటారు. ఇది వారిలో శ్రమకు గౌరవం, బాధ్యతాయుతమైన ప్రవర్తనను పెంపొందిస్తుంది. అక్కడ పుస్తక పఠన సంస్కృతి ఎంతో బలంగా ఉంటుంది. రైలు ప్రయాణాల్లో కూడా చాలామంది పుస్తకాలు చదువుతూ కనిపిస్తారు. విద్య అంటే కేవలం పరీక్షల్లో ఉత్తీర్ణత సాధించడం కాదని, వ్యక్తిత్వ నిర్మాణానికి సాధనమని జపాన్ సమాజం నిరూపించింది. దీనికి విరుద్ధంగా నేటి యువతలో మొబైల్ ఫోన్లు, వాట్సాప్, సోషల్ మీడియా వినియోగం అధికమై పుస్తక పఠనం తగ్గిపోతోంది. విద్యార్థులు జపాన్ యువతను ఆదర్శంగా తీసుకొని చదువు సంస్కృతి, క్రమశిక్షణ, సమయపాలన, దేశభక్తి, సామాజిక బాధ్యతలను అలవరచుకోవాలి. జపాన్ అభివృద్ధి వెనుక ఉన్న విలువలే భారత యువతకు కూడా మార్గదర్శకంగా నిలవగలవు.

“స్వామి వివేకానంద యువతకు ఆత్మవిశ్వాసాన్ని నేర్పారు. డాక్టర్ ఏ.పి.జె. అబ్దుల్ కలాం కలలను లక్ష్యాలుగా మార్చుకోవాలని ప్రేరేపించారు. జపాన్ దేశం క్రమశిక్షణ, బాధ్యత, పుస్తక పఠన సంస్కృతిని చూపించింది. ఈ మూడు ఆదర్శాలను అనుసరించినప్పుడే భారత యువత విలువలతో కూడిన శక్తివంతమైన జాతి నిర్మాణంలో భాగస్వాములు కాగలరు.” యువత దేశ భవిష్యత్తు. వారి చేతుల్లోనే రేపటి భారతదేశం ఉంది. కేవలం ఉద్యోగాలు, సంపద, సాంకేతిక నైపుణ్యాలు మాత్రమే కాకుండా విలువలు, నైతికత, సామాజిక బాధ్యత, పుస్తక పఠనం, ఆధ్యాత్మిక సాధన, దేశభక్తి కూడా సమానంగా అవసరం. విద్యాసంస్థలు, తల్లిదండ్రులు, సమాజం కలిసి యువతలో విలువల వికాసానికి కృషి చేసినప్పుడే బలమైన, బాధ్యతాయుతమైన, సుసంస్కృత భారతదేశం నిర్మాణం సాధ్యమవుతుంది.

డాక్టర్ కోమల్ల ఇంద్రసేనారెడ్డి, లైబ్రేరియన్,
కాకతీయ ఇన్‌స్టిట్యూట్ ఆఫ్ టెక్నాలజీ అండ్ సైన్స్, వరంగల్.
సెల్‌. 9849375829