– నీటిని 20 శాతం పొదుపు చేస్తే రోజుకు 80 ఎంజీడీల నీరు ఆదా
– నీటి పొదుపుపై 60 రోజులపాటు ప్రజా చైతన్య కార్యక్రమాలు
– మల్లన్నసాగర్ నుంచి అదనంగా 20 ఎంజీడీల నీటికి ఏర్పాట్లు
– సీఎస్ సంజయ్ జాజు
హైదరాబాద్, ప్రజాతంత్ర, అక్టోబర్ 13: ఎల్-నినో పరిస్థితుల నేపథ్యంలో తాగునీటి సరఫరాకు ఎలాంటి అంతరాయం కలగకుండా హైదరాబాద్ కోర్ ఏరియాలో అన్ని ముందస్తు చర్యలు చేపట్టామని ప్రభుత్వ ప్రధాన కార్యదర్శి సంజయ్ జాజు తెలిపారు. అందుబాటులో ఉన్న నీటిని పొదుపుగా వినియోగించుకుంటూ ప్రభుత్వ చర్యలకు ప్రజలందరూ సహకరించాలని విజ్ఞప్తి చేశారు. ముఖ్యమంత్రి ఆదేశాల మేరకు జీహెచ్‌ఎంసీ, మల్కాజిగిరి(ఎంఎంసీ), సైబరాబాద్(సీఎంసీ) మున్సిపల్ కార్పొరేషన్లలో తాగునీటి సరఫరా సన్నద్ధతపై ప్రభుత్వ ప్రధాన కార్యదర్శి సంజయ్ జాజు సచివాలయంలో మంగళవారం సమీక్షా సమావేశం నిర్వహించారు. ఈ సందర్భంగా ఆయన మాట్లాడుతూ ఎల్-నినో ప్రభావంతో రిజర్వాయర్లలో నీటి లభ్యత తగ్గినప్పటికీ అందుబాటులో ఉన్న నీటి వనరులను సమర్థవంతంగా వినియోగిస్తూ నగర ప్రజలకు తాగునీటి సరఫరాలో ఇబ్బందులు తలెత్తకుండా చర్యలు తీసుకోవాలని అధికారులను ఆదేశించారు. నగరానికి అదనంగా 60 ఎంజీడీల నీటి వినియోగానికి ప్రణాళిక హైదరాబాద్ కోర్ ఏరియాకు ప్రధానంగా ఉస్మాన్‌సాగర్, హిమాయత్‌సాగర్, మంజీరా, కృష్ణా, గోదావరి నదుల ద్వారా నీటిని సరఫరా చేస్తున్నామని, ఈ నీటి వనరుల పరిధిలో ప్రస్తుతం 560 ఎంజీడీల నీటి లభ్యత ఉందని వివరించారు. నగర తాగునీటి అవసరాలను తీర్చేందుకు కృష్ణా నది నుంచి అదనంగా 15 ఎంజీడీలు, మిషన్ భగీరథ ద్వారా 20 ఎంజీడీలతోపాటు అదనంగా మరో 20 ఎంజీడీలు, ఉస్మాన్‌సాగర్, హిమాయత్‌సాగర్‌ల నుంచి మరో 5 ఎంజీడీల చొప్పున మొత్తం 60 ఎంజీడీల అదనపు నీటిని వినియోగించుకునేలా ప్రణాళిక రూపొందించినట్లు తెలిపారు. మల్లన్నసాగర్‌లో 5 టీఎంసీల నీరు అందుబాటులో ఉందని, అక్కడినుంచి నగరానికి నీటిని తరలించే పైప్‌లైన్ నిర్మాణం నవంబర్‌లో పూర్తికానున్నందున దానినుంచి అదనంగా 20 ఎంజీడీల నీటిని వినియోగించుకునే అవకాశం ఉంటుందని అధికారులు వివరించారు. గత ఏడాదితో పోలిస్తే రెండుమూడు నెలలుగా నగరంలో భూగర్భ జలమట్టాలు గణనీయంగా పడిపోయాయని, ఫలితంగా నీటి ట్యాంకర్లకు డిమాండ్ పెరిగిందని చెప్పారు. శుద్ధి చేసిన నీటిని గృహేతర అవసరాలకు వినియోగించాలి నగరంలోని గేటెడ్ కమ్యూనిటీలు, అపార్టుమెంట్లలో ఏర్పాటు చేసిన మురుగునీటి శుద్ధి ప్లాంట్లు(ఎస్‌టీపీలు) పూర్తి స్థాయిలో పనిచేసేలా చర్యలు తీసుకోవాలని సీఎస్ సూచించారు. శుద్ధి చేసిన నీటిని గార్డెనింగ్ నిర్వహణ, వాహనాల శుభ్రత, ఇతర గృహేతర అవసరాలకు వినియోగించేలా ప్రజల్లో అవగాహన కల్పించాలని ఆదేశించారు. శుద్ధి చేసిన నీటిని వినియోగించేందుకు ప్రత్యేకంగా గ్రీన్ ట్యాంకర్లను ఏర్పాటు చేస్తున్నట్లు జలమండలి అధికారులు వివరించారు.
మంజీరా, సింగూరు పరిధిలోని జిల్లాలకు ప్రత్యామ్నాయ ఏర్పాట్లు
మంజీరా, సింగూరు రిజర్వాయర్ల ద్వారా నీటిని పొందుతున్న మెదక్, నిజామాబాద్, కామారెడ్డి, సంగారెడ్డి జిల్లాల్లో నీటి లభ్యతను దృష్టిలో ఉంచుకుని ప్రత్యామ్నాయ ప్రణాళికను అమలు చేయనున్నట్లు సీఎస్ తెలిపారు. ఆయా జిల్లాల్లో ఇప్పటికే బోరు బావులు, ఇతర నీటి వనరులను గుర్తించామన్నారు. తాగునీటి సరఫరాకు ప్రభుత్వం అత్యధిక ప్రాధాన్యత ఇస్తోందని, నిధులకు ఎలాంటి కొరత లేదని స్పష్టం చేశారు.
20 శాతం నీటి పొదుపుతో రోజుకు 80 ఎంజీడీల ఆదా
మూడు కార్పొరేషన్లలో ప్రజలు కేవలం 20 శాతం నీటిని పొదుపుగా వినియోగించినా రోజుకు 80 ఎంజీడీల నీటిని ఆదా చేయవచ్చని ప్రధాన కార్యదర్శి తెలిపారు. జలమండలి సరఫరా చేసే తాగునీటితో వాహనాలను కడగడం, నీటిని వృథా చేయడం వంటి చర్యలను కట్టడి చేయాలని అధికారులను ఆదేశించారు. నీటి పొదుపు, వృథా నివారణపై ప్రజల్లో అవగాహన పెంచేందుకు 60 రోజులపాటు విస్తృత ప్రచార, ప్రజా చైతన్య కార్యక్రమాలు నిర్వహించాలని సూచించారు. ప్రతి నీటి చుక్కను విలువైన వనరుగా భావించి పొదుపుగా వాడáడం ద్వారా ఎల్-నినో పరిస్థితులను సమర్థవంతంగా ఎదుర్కొనవచ్చని, ఈ ప్రయత్నంలో ప్రజలందరూ భాగస్వాములు కావాలని ప్రధాన కార్యదర్శి పిలుపునిచ్చారు. సమావేశంలో పంచాయతీరాజ్, గ్రామీణ తాగునీటి సరఫరా శాఖ స్పెషల్ సిఎస్ దాన కిషోర్, జలమండలి ఎండీ అశోక్ రెడ్డి, జీహెచ్‌ఎంసీ, మల్కాజిగిరి, సైబరాబాద్ కార్పొరేషన్ల కమిషనర్లు ఆర్.వి.కర్ణన్, వినయ్ కృష్ణారెడ్డి, సృజన, నీటిపారుదల, గ్రామీణ నీటి సరఫరా శాఖల ఉన్నతాధికారులు పాల్గొన్నారు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
