– పెన్షన్ బకాయిలు తక్షణమే చెల్లించాలి
– కోర్టు తీర్పునూ బేఖాతరు చేసిన ప్రభుత్వం
– మా నిధులు సంక్షేమ కార్యక్రమాలకు తరలించడం అన్యాయం
– ప్రభుత్వం స్పందించకపోతే రిలే నిరాహారదీక్షలు
– రిటైర్డ్ ఉద్యోగుల సంఘం హెచ్చరిక
హైదరాబాద్, ప్రజాతంత్ర, అక్టోబర్ 16: పదవీ విరమణ బకాయిలను తక్షణమే చెల్లించకపోతే, రిలే నిరాహార దీక్షలతో రాష్ట్రవ్యాప్తంగా ఉద్యమాన్ని ఉధృతం చేస్తామని రిటైర్డ్ ప్రభుత్వ ఉద్యోగుల సంఘం ఆల్టిమేటం ఇచ్చింది. గత రెండు ఆర్థిక సంవత్సరాల కాలంలో (2023-24 మరియు 2024-25) పదవీ విరమణ పొందిన పెన్షనర్లందరికీ ప్రభుత్వం నుంచి రావాల్సిన రిటైర్మెంట్ బకాయిలు ఇప్పటికీ పెండింగ్లోనే ఉన్నాయి. పదవీ విరమణ చేసిన ఉద్యోగికి ఆర్థిక భద్రత కల్పించే కీలక ప్రయోజనాలైన గ్రాట్యుటీ, జనరల్ ప్రావిడెంట్ ఫండ్ , తెలంగాణ స్టేట్ గవర్నమెంట్ లైఫ్ ఇన్సూరెన్స్ , సరెండర్ లీవ్స్ (లీవ్ ఎన్క్యాష్మెంట్) వంటి మొత్తాలను ప్రభుత్వం ఒకేసారి చెల్లించాలి. ఉద్యోగుల స్థాయి, సర్వీసును బట్టి ఒక్కొక్కరికి రూ. 35 లక్షల నుంచి రూ. 75 లక్షల వరకు అందాల్సిన ఈ మొత్తం చెల్లింపుల్లో జరుగుతున్న జాప్యం వారి జీవితాలను అల్లకల్లోలం చేస్తోంది. రాష్ట్రవ్యాప్తంగా ఈ పెండింగ్ బకాయిల విలువ సుమారు ₹8,000 కోట్ల వరకు ఉంటుందని అంచనా, ఈ భారీ ఆర్థిక భారం, అలాగే పెన్షనర్లకు రావాల్సిన తమ సొంత సొమ్మును ఇవ్వకుండా ప్రభుత్వం చేస్తున్న నిర్లక్ష్యం తీవ్ర విమర్శలకు తావిస్తోంది. పదవీ విరమణ ప్రయోజనాలు సకాలంలో చేతికి అందక అనేక మంది పెన్షనర్ మిత్రులు అకాల మరణం పాలవుతున్నారని, సరైన వైద్యం చేయించుకోలేక జీవితాలను కోల్పోతున్నారని రిటైర్డ్ ఉద్యోగుల సంఘం నాయకులు ఆవేదన వ్యక్తం చేశారు. అంతకుమించి దారుణంగా, అప్పుల బాధలు, నిత్య జీవిత అవసరాల కోసం చేతిలో డబ్బు లేకపోవడంతో, కొందరు పెన్షనర్లు ఆత్మహత్యలకు కూడా పాల్పడుతున్నారన్నారు. పిల్లల పెళ్లిళ్లు, ఉన్నత విద్య, కుటుంబ సభ్యుల అనారోగ్య చికిత్సల వంటి అత్యవసర అవసరాలకు ప్రభుత్వం ఇచ్చిన హామీల ప్రకారం బకాయిలను తక్షణమే చెల్లించాలని సంఘం డిమాండ్ చేస్తోంది. సాధారణ రెగ్యులర్ పెన్షనర్లతో పాటు, పదవీ విరమణ పొందిన ప్రతి ఒక్కరికీ ఈ బకాయిలను వెంటనే విడుదల చేయాలని కోరింది. పెన్షనరీ బెనిఫిట్స్ సకాలంలో అందక మరణిస్తున్న, ఆత్మహత్యలకు పాల్పడుతున్న పెన్షనర్ల మరియు వారి కుటుంబ సభ్యుల సంక్షేమం దృష్ట్యా ప్రభుత్వం వెంటనే స్పందించాలని వారు కోరారు.
ఒకేసారి అందాల్సిన రిటైర్మెంట్ బకాయిలతో పాటు, ప్రతి నెలా పెన్షన్తో పాటు జీవన వ్యయానికి అనుగుణంగా అందాల్సిన డియర్నెస్ రిలీఫ్ (డీఆర్/ డీఏ) బకాయిలను సైతం ప్రభుత్వం సకాలంలో విడుదల చేయడం లేదు. ఈ కరువు భత్యం చెల్లింపులో జాప్యం జరగడం వల్ల పెన్షనర్లు నిత్యం పెరుగుతున్న ఖర్చులతో తీవ్ర ఆర్థిక భారాన్ని మోయాల్సి వస్తోంది. ఇది కూడా పెన్షనర్ల ఆందోళనకు ఒక ప్రధాన కారణం. తాము ప్రభుత్వానికి ఎన్నో సంవత్సరాలు సేవ చేసినందుకు ప్రతిఫలంగా ఈ ప్రయోజనాలను హక్కుగా అడుగుతున్నామని, దీన్ని భిక్షగా భావించి ప్రభుత్వం జాప్యం చేయకూడదని సంఘం స్పష్టం చేసింది. తమకు రావాలసిన మొత్తాలను చెల్లించకుండా, ఇతర సంక్షేమ పథకాలకు నిధులు మళ్లించడం ఆర్థిక క్రమశిక్షణారాహిత్యమని రిటైర్డ్ ఉద్యోగులు తీవ్ర ఆవేదన వ్యక్తం చేస్తున్నారు.
గతంలో రిటైర్మెంట్ బెనిఫిట్స్ చెల్లించడంలో జరుగుతున్న జాప్యంపై అనేకమంది పెన్షనర్లు న్యాయస్థానాన్ని ఆశ్రయించారు. దీనిపై విచారణ జరిపిన హైకోర్టు, రిటైర్డ్ ఉద్యోగులకు రావాల్సిన అన్ని ఆర్థిక ప్రయోజనాలను నిర్ణీత గడువులోగా వడ్డీతో సహా చెల్లించాలని ప్రభుత్వాన్ని స్పష్టంగా ఆదేశించింది. అయినప్పటికీ, ఆ ఆదేశాలను కూడా రాష్ట్ర ప్రభుత్వం పూర్తిగా లెక్కచేయకుండా, ఉద్దేశపూర్వకంగా జాప్యం చేస్తోందని పెన్షనరీ సంఘాలు ఆరోపిస్తున్నాయి. కోర్టు తీర్పునకు ప్రభుత్వం స్పందించకపోవడం దారుణమని పెన్షనర్లు వాపోతున్నారు. తెలంగాణ రాష్ట్ర ప్రభుత్వం ఇంకా నిమ్మకు నీరెత్తినట్లు వ్యవహరిస్తే, ఈ సమస్యను రాష్ట్ర నాయకత్వం దృష్టికి తీసుకెళ్తామని రిటైర్డ్ ఉద్యోగుల సంఘం ప్రకటించింది. పెండింగ్ బకాయిలతో పాటు ఇతర పెన్షనరీ సమస్యలపై రిలే నిరాహార దీక్షలకు సిద్ధమవుతామని స్పష్టం చేసింది. పెన్షనర్లందరూ అధైర్య పడకుండా, ప్రభుత్వంపై పోరాటానికి సన్నద్ధం కావాలని సంఘం పిలుపునిచ్చింది. నిధులు లేవనే సాకుతో సాకులు చెప్పకుండా, ప్రజల ఆరోగ్య భద్రతకు, పెన్షనర్ల గౌరవానికి ప్రాధాన్యత ఇవ్వాలని వారు కోరుతున్నారు. పారదర్శకతతో కూడిన పాలనను ఆశిస్తున్న తమకు, ఈ జాప్యం తీవ్ర నిరాశను మిగులుస్తోందని పెన్షనరీ సంఘాలు ఆవేదన వ్యక్తం చేశాయి.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్సైట్ ను సందర్శించండి. తాజా అప్డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
