తమిళనాడులో కొత్త రాజకీయ యుగం ప్రారంభమవుతోందా?

“బీజేపీ గత పన్నెండేళ్లలో దక్షిణ భారతదేశంలో స్వతంత్ర రాజకీయ బలాన్ని నిర్మించడంలో పరిమిత విజయాలే సాధించింది. కర్ణాటక మినహా ఇతర రాష్ట్రాల్లో అది ప్రధాన ప్రత్యామ్నాయంగా ఎదగలేకపోయింది.దీనికి ప్రధాన కారణం దక్షిణ భారత రాజకీయ-సాంస్కృతిక వాస్తవాలు. తమిళనాడులో దేవాలయాలు, ఆధ్యాత్మిక సంప్రదాయాలు, మత విశ్వాసాలు బలంగా ఉన్నప్పటికీ, ఉత్తర భారత సాంస్కృతిక-రాజకీయ నమూనాలను ప్రజలు యథాతథంగా అంగీకరించరు..”

తమిళనాడు రాజకీయాలు ప్రస్తుతం ఒక చారిత్రక మలుపు వద్ద నిలిచాయి. 1967లో అన్నాదురై నాయకత్వంలో కాంగ్రెస్ పార్టీని ఓడించి ద్రావిడ రాజకీయాలు అధికారంలోకి వచ్చిన తర్వాత దాదాపు ఆరు దశాబ్దాల పాటు డీఎంకే, ఏఐఏడీఎంకే రాష్ట్ర రాజకీయాలను శాసించాయి. భాషా స్వాభిమానం, సామాజిక న్యాయం, కేంద్రాధిపత్య వ్యతిరేకత, ప్రాంతీయ గుర్తింపు వంటి అంశాలపై నిర్మితమైన ఈ రాజకీయ నమూనా దేశంలోనే ప్రత్యేకమైనది.

అయితే 2026 ఎన్నికల ముందు పరిస్థితులు వేగంగా మారుతున్నాయి. నటుడు విజయ్ రాజకీయ ప్రవేశం, అన్నామలై చుట్టూ జరుగుతున్న రాజకీయ ఊహాగానాలు, బీజేపీ దక్షిణ భారత వ్యూహాలలో వస్తున్న మార్పులు, డీఎంకే-ఏఐఏడీఎంకే ఎదుర్కొంటున్న నాయకత్వ సంక్షోభాలు కలిసి తమిళనాడులో కొత్త రాజకీయ సమీకరణాలకు దారితీసే సూచనలు కనిపిస్తున్నాయి.

 అన్నామలై రాజీనామా వెనుక రాజకీయ వ్యూహం ఉందా?

అన్నామలై బీజేపీకి తమిళనాడులో ఒక కొత్త ముఖచిత్రాన్ని తీసుకొచ్చిన నాయకుడు. మాజీ ఐపీఎస్ అధికారి, దూకుడైన వక్త, యువ నాయకుడు, సామాజిక మాధ్యమాల్లో ప్రభావవంతమైన వ్యక్తిగా ఆయన రాష్ట్రవ్యాప్తంగా గుర్తింపు పొందారు.ప్రత్యేకంగా పశ్చిమ తమిళనాడులో ప్రభావవంతమైన కొంగు వెల్లాల గౌండర్ సామాజిక వర్గానికి చెందిన ఆయన, ఏఐఏడీఎంకే సంప్రదాయ ఓటు బ్యాంకులో చొచ్చుకుపోయే స్థాయికి ఎదిగారు.అదే సామాజిక వర్గానికి చెందిన పళనిస్వామి, సెంగొట్టైయన్, ఎస్.పి. వేలుమణి, తంగమణి వంటి నాయకులు ఏఐఏడీఎంకేలో కీలక స్థానాల్లో ఉన్నారు. అందువల్ల అన్నామలై ఎదుగుదల కేవలం బీజేపీ ఎదుగుదల కాదు. అది గౌండర్ రాజకీయ నాయకత్వంపై ఆధిపత్య పోటీ కూడా.

రాజకీయ వర్గాల్లో వినిపిస్తున్న కథనాల ప్రకారం, ఏఐఏడీఎంకేతో పొత్తును అన్నామలై మొదటి నుంచీ వ్యతిరేకించారు. కానీ బీజేపీ కేంద్ర నాయకత్వం మాత్రం తమిళనాడులో స్వతంత్రంగా అధికారంలోకి రావడం కష్టమని భావించి పొత్తు రాజకీయాల వైపే మొగ్గుచూపింది. ఈ వ్యూహాత్మక భేదాభిప్రాయాలే  ప్రస్తుతం కనిపిస్తున్న పరిణామాలకు కారణమయ్యాయనే అభిప్రాయం ఉంది.

కొంతమంది విశ్లేషకులు మరింత ముందుకు వెళ్లి, అన్నామలై భవిష్యత్తులో కొత్త రాజకీయ వేదికను నిర్మించే అవకాశాలను పరిశీలిస్తున్నారు. అధికారికంగా ఎలాంటి ప్రకటన లేకపోయినా, ఆయన ఇటీవల దిల్లీలో అమిత్ షా, పార్టీ జాతీయ నాయకత్వంతో సమావేశాలు జరపడం, అదే సమయంలో తమిళనాడు బీజేపీ నాయకత్వంపై చర్చలు జరగడం అనేక ఊహాగానాలకు దారితీసింది.

 ఉత్తర భారత హిందూత్వం కాదు, ‘తమిళ సనాతనత’నా?

బీజేపీ గత పన్నెండేళ్లలో దక్షిణ భారతదేశంలో స్వతంత్ర రాజకీయ బలాన్ని నిర్మించడంలో పరిమిత విజయాలే సాధించింది. కర్ణాటక మినహా ఇతర రాష్ట్రాల్లో అది ప్రధాన ప్రత్యామ్నాయంగా ఎదగలేకపోయింది.దీనికి ప్రధాన కారణం దక్షిణ భారత రాజకీయ-సాంస్కృతిక వాస్తవాలు. తమిళనాడులో దేవాలయాలు, ఆధ్యాత్మిక సంప్రదాయాలు, మత విశ్వాసాలు బలంగా ఉన్నప్పటికీ, ఉత్తర భారత సాంస్కృతిక-రాజకీయ నమూనాలను ప్రజలు యథాతథంగా అంగీకరించరు. తమిళ భాష, తమిళ చరిత్ర, తమిళ నాగరికత పట్ల గాఢమైన గర్వభావం ఉంది. ఈ వాస్తవాన్ని గుర్తించిన బీజేపీ, ఇకపై “హిందూత్వం” అనే ఒకే రాజకీయ నినాదం కంటే, “తమిళ సంస్కృతి + ఆధ్యాత్మికత + ప్రాంతీయ గర్వం” కలిపిన కొత్త కథనాన్ని నిర్మించే ప్రయత్నం చేయవచ్చనే అభిప్రాయం రాజకీయ వర్గాల్లో వినిపిస్తోంది.అన్నామలై ఆ కథనానికి సరిపోయే నాయకుడిగా కనిపిస్తున్నారు.

విజయ్: ద్రావిడ రాజకీయాలకు వచ్చిన తొలి నిజమైన సవాలు

ఇప్పటి వరకు డీఎంకే, ఏఐఏడీఎంకే వెలుపల నుంచి వచ్చిన అనేక రాజకీయ ప్రయత్నాలు విఫలమయ్యాయి. కానీ విజయ్ పరిస్థితి భిన్నంగా ఉంది. ఆయనకు సినీ అభిమానులు మాత్రమే కాదు, యువత, పట్టణ మధ్యతరగతి, మొదటిసారి ఓటర్లు, రాజకీయ వ్యవస్థ పట్ల విసుగు చెందిన వర్గాలలో కూడా ఆదరణ ఉంది. ముఖ్యంగా విజయ్ ఒక కులం, మతం లేదా ప్రాంతానికి పరిమితమైన నాయకుడిగా కనిపించడం లేదు. ఇది ఆయన అతిపెద్ద బలం. డీఎంకే, ఏఐఏడీఎంకే, బీజేపీ అన్నీ తమ సంప్రదాయ సామాజిక వర్గాలపై ఆధారపడితే, విజయ్ మాత్రం “తమిళ యువత” అనే కొత్త రాజకీయ వర్గాన్ని నిర్మించే ప్రయత్నం చేస్తున్నారు. కానీ ద్రావిడ రాజకీయాలు శాశ్వతమనే భావనను ఆయన ఇప్పటికే ప్రశ్నించారు.

కుల రాజకీయాల పునర్వ్యవస్థీకరణ

తమిళనాడులో కుల రాజకీయాలు కనిపించవు అనుకోవడం పొరపాటు. గౌండర్లు, వన్నియార్లు, దేవర్లు, నాడార్లు, ముదళియార్లు, దళిత వర్గాలు ఇప్పటికీ ఎన్నికల ఫలితాలను ప్రభావితం చేసే ప్రధాన సామాజిక శక్తులు.

• పశ్చిమ తమిళనాడులో గౌండర్లు
• ఉత్తర జిల్లాల్లో వన్నియార్లు
• దక్షిణ జిల్లాల్లో దేవర్లు
• కొన్ని ప్రాంతాల్లో నాడార్లు

రాజకీయంగా ప్రభావవంతమైన వర్గాలు. ఏఐఏడీఎంకే సంప్రదాయంగా దేవర్-గౌండర్ మద్దతుపై ఆధారపడగా, డీఎంకే విస్తృత సామాజిక కూటమిని నిర్మించింది.

కానీ ఇప్పుడు ఈ సామాజిక సమీకరణాలు మారుతున్నాయి. గౌండర్ వర్గంలో అన్నామలై ప్రభావం, వన్నియార్ రాజకీయాల్లో స్థబ్దత, యువతలో కొత్త ప్రత్యామ్నాయాల కోసం వెతుకులాట రాష్ట్ర రాజకీయాల్లో కొత్త సమీకరణాలకు దారితీస్తున్నాయి.

దళిత రాజకీయాలు – నిర్ణయాత్మక పాత్ర

తమిళనాడులో భవిష్యత్తు రాజకీయాలను నిర్ణయించే ప్రధాన అంశాల్లో దళిత రాజకీయాలు ఒకటి. ద్రావిడ రాజకీయాలు సామాజిక న్యాయం గురించి మాట్లాడినా, దళిత నాయకత్వానికి తగిన స్థానం కల్పించలేదనే విమర్శ చాలా కాలంగా ఉంది.విదుతలై చిరుతైగల్ వంటి పార్టీలు దళిత రాజకీయాలకు స్వరమిచ్చినా, దళిత వోటు పూర్తిగా ఒకే దిశలో లేదు. కొత్త తరం దళిత యువత సామాజిక న్యాయంతో పాటు ఆర్థిక అవకాశాలు, విద్య, ఉద్యోగాలు, రాజకీయ ప్రతినిధిత్వం కోరుతోంది. ఈ వర్గాన్ని ఆకర్షించగలిగిన పార్టీ భవిష్యత్తులో పెద్ద రాజకీయ లాభం పొందవచ్చు.

ముస్లిం, క్రైస్తవ రాజకీయాలు ఎటు?

తమిళనాడులో ముస్లింలు, క్రైస్తవులు కలిపి గణనీయమైన వోటు శక్తి. ఇప్పటి వరకు వీరిలో అధిక భాగం డీఎంకే కూటమి వైపే మొగ్గు చూపింది. కానీ విజయ్ రాజకీయ ప్రవేశం తరువాత ఈ సమీకరణాలు కొంత మారే అవకాశం ఉంది. విజయ్ క్రైస్తవ నేపథ్యం నుంచి వచ్చినప్పటికీ, తన రాజకీయాలను మత పరిమితుల్లో బంధించకుండా “తమిళ గుర్తింపు” చుట్టూ నిర్మిస్తున్నారు. దీంతో ముస్లింలు, క్రైస్తవులు, దళితులు, పట్టణ యువత, మధ్యతరగతి వర్గాలు ఒక కొత్త రాజకీయ వేదికపై కలిసే అవకాశం ఉందని కొందరు విశ్లేషకులు భావిస్తున్నారు.

కాంగ్రెస్, చిన్న కుల పార్టీల భవిష్యత్తు

తమిళనాడులో కాంగ్రెస్‌కు ఇప్పటికీ సుమారు 10-12 శాతం వరకు సంప్రదాయ వోటు బ్యాంకు ఉందని రాజకీయ విశ్లేషణలు సూచిస్తున్నాయి.అయితే భవిష్యత్తులో అది డీఎంకేతోనే కొనసాగుతుందా? లేక విజయ్ వంటి కొత్త శక్తులతో కలిసి ప్రయాణిస్తుందా? అన్నది ఆసక్తికర ప్రశ్న. ఇక పీఎంకే, ఎండీఎంకే,  విదుతలై చిరుతైగల్   , ఇతర ప్రాంతీయ-కుల పార్టీలు నాలుగు లేదా ఐదు ధ్రువాల పోటీ ఏర్పడితే తమ ప్రాధాన్యాన్ని తిరిగి నిర్వచించుకోవాల్సి వస్తుంది.

తమిళనాడు మాత్రమే కాదు, దక్షిణ భారత రాజకీయాల ప్రయోగశాల

అన్నామలై, విజయ్, బీజేపీ వ్యూహాలు, ద్రావిడ రాజకీయాల మార్పు — ఇవన్నీ తమిళనాడుకే పరిమితం కావు.ఆంధ్రప్రదేశ్‌లో పవన్ కళ్యాణ్, తెలంగాణలో కొత్త రాజకీయ సమీకరణాల ప్రయత్నాలు, కేరళలో ప్రత్యామ్నాయ సామాజిక వర్గాల అన్వేషణ – ఇవన్నీ కలిపి చూస్తే బీజేపీ దక్షిణ భారతదేశంలో ప్రాంతీయ ముఖచిత్రాల ద్వారా ముందుకు రావాలని చూస్తోందనే విశ్లేషణలు ఉన్నాయి. అంటే, దిల్లీ నుంచి నడిచే రాజకీయాల కంటే, స్థానిక నాయకులు, స్థానిక గుర్తింపులు, స్థానిక సంస్కృతిని ముందుకు తెచ్చే వ్యూహం వైపు అడుగులు పడుతున్నట్లు కనిపిస్తోంది.