అన్ని అంశాల స‌మ‌న్వ‌యంతో మౌలిక స‌దుపాయాల అభివృద్ధి

– రహదారుల పరిశోధన, మూసీ పునరుజ్జీవంపై చ‌ర్చ‌లు
– డిజిటల్ పోర్టల్, భవిష్యత్ రహదారి మాస్టర్ ప్లాన్‌పై నిపుణుల సూచనలు
– 13, 14 సెష‌న్ల ఐఆర్‌సీ స‌మావేశాలు

హైదరాబాద్, ప్ర‌జాతంత్ర‌, న‌వంబ‌ర్ 21 : ఇండియన్ రోడ్స్ కాంగ్రెస్ (ఐఆర్‌సీ) 85వ వార్షిక సమావేశంలో భాగంగా నిర్వహించిన రెండు సాంకేతిక సెషన్లలో రహదారుల పరిశోధన, పర్యావరణహిత నిర్మాణ సామగ్రి, డిజిటల్ మౌలిక సదుపాయాలు, నదుల పునరుజ్జీవ, భవిష్యత్ రవాణా ప్రణాళికలపై విస్తృత చర్చలు జరిగాయి. సాంకేతిక ఆవిష్కరణలు, సంప్రదాయ నిర్మాణ పరిజ్ఞానం, దీర్ఘకాలిక ప్రణాళికలను సమన్వయం చేస్తూ మౌలిక సదుపాయాలను అభివృద్ధి చేయాల్సిన అవసరాన్ని నిపుణులు స్పష్టం చేశారు.సెషన్ 13లో జాతీయ రహదారుల పరిశోధన, సుస్థిర రహదారి నిర్మాణం, డిజిటల్ మౌలిక సదుపాయాల నిర్వహణ గురించి చ‌ర్చించారు. ఐఆర్‌సీ, సీఎస్ ఐఆర్‌–సెంట్రల్ రోడ్ రీసెర్చ్ ఇన్‌స్టిట్యూట్ (సీఎస్ ఐఆర్‌-సీఆర్ఆర్ఐ) సంయుక్తంగా రూపొందించిన రహదారుల పరిశోధనా నివేదిక ఆధారంగా ఈ సెషన్ నిర్వహించారు. ఇందులో డిజిటల్ పరిశోధనా వేదికలు, పర్యావరణహిత నిర్మాణ పదార్థాలు, వంతెనల ఇంజినీరింగ్, రహదారి భద్రత, కృత్రిమ మేధస్సు, ఆధునిక రహదారి ప్రణాళికలపై చర్చించారు. వార్షిక నివేదికల ప్రచురణలో జాప్యాన్ని నివారించేందుకు సీఎస్ ఐఆర్‌-సీఆర్ ఆర్‌ క్లౌడ్ ఆధారిత డిజిటల్ పోర్టల్‌ను అభివృద్ధి చేసింది. దీని ద్వారా విద్యాసంస్థలు, నిర్మాణ సంస్థలు, కాంట్రాక్టర్లు తమ ప్రాజెక్టులు, పరిశోధనా పత్రాలు, థీసిస్‌లను 5 నుంచి 10 నిమిషాల్లో అప్‌లోడ్ చేయవచ్చు. ఇప్పటికే 100కు పైగా పైలట్ ప్రాజెక్టులను చేర్చగా భవిష్యత్తులో ఏడాదికి 1–2 లక్షల పరిశోధనా రికార్డులను సేకరించాలని లక్ష్యంగా పెట్టుకున్నారు. ఐఐ ఆధారిత లార్జ్ లాంగ్వేజ్ మోడల్స్ (ఎల్ ఎల్ ఎంఎస్‌) ద్వారా పరిశోధనలను విశ్లేషించి ప్రెజెంటేషన్లు, పీడీఎఫ్ నివేదికలను ఆటోమేటిక్‌గా రూపొందించే సదుపాయాన్ని కూడా కల్పించారు. దేశ‌ బిటుమెన్ అవసరాల్లో సుమారు 40 శాతం దిగుమతి చేసుకుంటున్న నేపథ్యంలో వ్యవసాయ వ్యర్థాల నుంచి బయో-బైండర్ల తయారీపై పరిశోధనలు చేపట్టారు. బిటుమెన్‌లో 20–30 శాతం వరకు బయో-ఆయిల్‌ను ప్రత్యామ్నాయంగా ఉపయోగించవచ్చని, పుదుచ్చేరిలో వాణిజ్య ఉత్పత్తి ప్లాంట్ ప్రారంభమైందని తెలిపారు. అలాగే, రీసైకిల్డ్ ఆస్ఫాల్ట్ పేవ్‌మెంట్ ను 35–45 శాతం వరకు ఉపయోగించే ప్రయోగాలు విజయవంతమయ్యాయి. స్టీల్ స్లాగ్‌ను కంకర రాళ్లకు ప్రత్యామ్నాయంగా వాడటంతోపాటు ఆంధ్రప్రదేశ్‌లో 6,000 కి.మీకు పైగా ఫుల్ డెప్త్ రిక్లమేషన్ (ఎఫ్డీఆర్‌) పనులు చేపట్టారు. ఐఆర్‌సీ 37 సవరణలో భాగంగా మెకానిస్టిక్-ఎంపిరికల్ డిజైన్ విధానాన్ని ప్రవేశపెట్టనున్నారు.

కాంట్రాక్టు నిర్వహణ, భూసాంకేతిక, వంతెనల ఇంజినీరింగ్

దేశవ్యాప్తంగా పెండింగ్‌లో ఉన్న కాంట్రాక్టు మధ్యవర్తిత్వ వివాదాల విలువ సుమారు రూ.లక్ష కోట్లకు చేరింది. 225 మంది క్లయింట్లు, కాంట్రాక్టర్లు, కన్సల్టెంట్ల సమాచారంతో 49 రకాల ప్రమాద కారకాలను విశ్లేషించారు. నిబంధనల కంటే అమలులోని విధానపరమైన లోపాలే వివాదాలకు ప్రధాన కారణమని గుర్తించి వాటిని ముందుగానే పసిగట్టేందుకు ఏఐ ఆధారిత హెచ్చరిక వ్యవస్థను ప్రతిపాదించారు. వంతెనల అనుసంధాన మార్గాల్లో కుంగుబాటు నియంత్రణకు ప్రత్యేక అప్రోచ్ స్లాబ్‌లను అభివృద్ధి చేశారు. హిమాచల్ ప్రదేశ్‌లో కొండచరియలు విరిగిపడే ప్రాంతాలను గుర్తించగా పీఎంజీఎస్‌వై రహదారుల్లో జియోటెక్స్టైల్ సాంకేతికతను వినియోగించారు. సిగ్నేచర్ బ్రిడ్జి పర్యవేక్షణలో 90 శాతానికి పైగా సెన్సార్ ఫలితాలు డిజైన్ అంచనాలకు సరిపోలాయి.

పట్టణ రవాణా రహదారి భద్రత

పట్టణాల్లో సరుకు రవాణా మెరుగుదలకు రింగ్ రోడ్లు, సరుకు సమీకరణ కేంద్రాలు, ఎలక్ట్రిక్ ఫ్రైట్ కారిడార్లతో కూడిన 11 చర్యలను ప్రతిపాదించారు. ఎంవోఆర్ టీహెచ్‌ అధ్యయనం ప్రకారం బహుళ లేన్ల ఎక్స్‌ప్రెస్‌వేలపై గంటకు 80 కి.మీ, పట్టణ ప్రధాన రహదారులపై గంటకు 35–50 కి.మీవేగ పరిమితిని సిఫారసు చేశారు. అమరావతి రహదారి భద్రతా ఆడిట్‌లో ఎత్తైన నిలువు కాలిబాటల స్థానంలో మౌంటబుల్ కర్బ్‌లను ఏర్పాటు చేయాలని సూచించారు. పూర్తి స్థాయి క్రాష్ బ్యారియర్ పరీక్షా కేంద్రం లేకపోవడం వల్ల విదేశీ ధ్రువీకరణపై ఆధారపడాల్సి వస్తోందని పేర్కొన్నారు. తమిళనాడు పరిశోధకులు రూపొందించిన పైథాన్ ఆధారిత వెబ్ ప్లాట్‌ఫామ్ ద్వారా 80.88 కి.మీ రహదారి మార్గంలో 81 నీటి ప్రవాహాల దాటవేత ప్రాంతాలను గుర్తించి మట్టి తవ్వకం-నింపకం పరిమాణాలను నిమిషాల్లోనే అంచనా వేశారు. సమావేశ అధ్యక్షుడు డాక్టర్ చలమూరి రామచంద్ర, సహాధ్యక్షుడు డాక్టర్ పి.లంగా బయో-బైండర్లు, స్టీల్ స్లాగ్‌లను ఐ ఆర్‌సీ ప్ర‌మాణాల్లో చేర్చడం, ఏఐ కాంట్రాక్టు నిర్వహణ, వంతెనల నిరంతర పర్యవేక్షణ, అన్ని రాష్ట్రాల పీడ‌బ్ల్యూడీల్లో జాతీయ పోర్టల్ విస్తరణను ప్రధాన ప్రాధాన్యతలుగా సూచించారు.

నదుల పునరుజ్జీవం, ప్రాచీన విజ్ఞానం, భవిష్యత్ రహదారి నెట్‌వర్క్(సెష‌న్ 14)

ఈ సెషన్‌లో నదుల పునరుజ్జీవం, ప్రాచీన నిర్మాణ పరిజ్ఞానం, తెలంగాణలో ప్రభుత్వ భవనాల మౌలిక సదుపాయాలు, జియోపాథిక్ స్ట్రెస్‌పై భావనాత్మక అధ్యయనం, భవిష్యత్ రహదారి నెట్‌వర్క్ ప్రణాళికలపై ఐదు ప్రధాన అంశాలను చర్చించారు. మూసీ నది 55 కి,మీ పట్టణ పరిధిని పునరుజ్జీవింపజేసే ప్రణాళికను వివరించారు. మురుగునీరు నదిలో కలవకుండా ట్రంక్ సీవర్ లైన్లు, మళ్లింపు నిర్మాణాలు, మురుగునీటి శుద్ధి కేంద్రాలు (ఎస్టీపీలు) ఏర్పాటు చేయనున్నారు. పట్టణ ప్రాంతాన్ని ఐదు జోన్లుగా విభజించి నీటి నిర్వహణ, పచ్చదనం, భూవినియోగం, మౌలిక సదుపాయాలు, ఆర్థిక అంశాలపై సమగ్ర మాస్టర్ ప్లాన్లు రూపొందిస్తున్నారు. వందేళ్ల‌ వరద పరిస్థితులను అధ్యయనం చేయగా తొలి దశలో పూడిక తొలగింపు, నదీగర్భ ఆకృతి మెరుగుదల, వరద రక్షణ గోడలు, ఒడ్డు బలోపేతం, ఎస్టీపీలు, రివర్‌ఫ్రంట్ అభివృద్ధి చేపట్టనున్నారు. వంతెనల పునాదుల వద్ద మట్టి కోత, స్థిరత్వాన్ని పరిగణనలోకి తీసుకోవాలని నిపుణులు సూచించారు. ప్రాచీన విజ్ఞానం-ఆధునిక ఇంజినీరింగ్‌లో ప్రాముఖ్యత: దేవాలయాల ప్రణాళిక, నిర్మాణం, విడదీయడం, పునర్నిర్మాణంలో స్థపతులు, శిల్పుల పాత్రను వివరించారు. కాకతీయుల కాలం నాటి వేయి స్తంభాల గుడి, రామప్ప దేవాలయం, తోరణాలు, స్తంభాలను ఉదాహరణలుగా చూపారు. స్థల ఎంపిక, నిర్మాణ సామగ్రి, కొలతలు, నీటి నిర్వహణ, శిల్పకళలోని సంప్రదాయ పరిజ్ఞానాన్ని నమోదు చేసి, ఆధునిక ఇంజినీరింగ్ ప్రమాణాలు, శాస్త్రీయ పరీక్షలకు తోడ్పడేలా సమన్వయం చేయాలని సూచించారు. ప్రభుత్వ భవనాల మౌలిక సదుపాయాల్లో తెలంగాణ అభివృద్ధి
తెలంగాణ రాష్ట్రం ఏర్పడిన తర్వాత ప్రభుత్వ భవనాల మౌలిక సదుపాయాలు విస్తరించాయని రోడ్లు, భవనాల శాఖ తెలిపింది. రాష్ట్ర విభజన సమయంలో సుమారు 70 లక్షల చదరపు అడుగులుగా ఉన్న భవన విస్తీర్ణం, ప్రస్తుతం దాదాపు 839 లక్షల చదరపు అడుగులకు పెరిగింది. కొత్త జిల్లాల ఏర్పాటు, టెండర్ సంస్కరణలు, మాడ్యులర్ ప్రణాళిక, ఐఐటీలు-విశ్వవిద్యాలయాల సాంకేతిక సమీక్షలు, కోవిడ్ వైద్య అవసరాలు ఇందుకు దోహదపడ్డాయి. కలెక్టరేట్లు, న్యాయ భవనాలు, ఆసుపత్రులు, వైద్య–నర్సింగ్ కళాశాలలు, విద్యాసంస్థలు, దేవాలయాలు, స్మారక నిర్మాణాలతో పాటు మాడ్యులర్ రూపకల్పన వల్ల వ్యయం, నిర్మాణ సమయం తగ్గాయని పేర్కొన్నారు.

జియోపాథిక్ స్ట్రెస్- రహదారి భద్రతపై అధ్యయనం

భూగర్భ భౌగోళిక పరిస్థితులు, ప్రతిపాదిత విద్యుదయస్కాంత ప్రభావాలు, ఒకేచోట పునరావృతమయ్యే ప్రమాదాల మధ్య సంబంధంపై భావనాత్మక అంశాన్ని సమర్పించారు. ఇది ప్రస్తుతం ఐఆర్‌సీ కోడ్‌లు లేదా భద్రతా మార్గదర్శకాలలో లేదని స్పష్టం చేశారు. నిర్మల్ జిల్లాలోని ప్రమాదకర ప్రాంతాల కేస్ స్టడీని ప్రస్తావిస్తూ క్షేత్రస్థాయి పరిశీలనతోపాటు గ్రౌండ్ పెనెట్రేటింగ్ రాడార్, ఎలక్ట్రికల్ రెసిస్టివిటీ పద్ధతుల ద్వారా శాస్త్రీయంగా అధ్యయనం చేయాలని సూచించారు. ‘తెలంగాణ రైజింగ్ విజన్ 2047’కు అనుగుణంగా రాష్ట్రవ్యాప్త రహదారి నెట్‌వర్క్ మాస్టర్ ప్లాన్‌ను రూపొందిస్తున్నారు. రాష్ట్రంలోని సుమారు 34,000 కి.మీ\ రహదారి నెట్‌వర్క్‌ను బలోపేతం చేస్తూ ప్రస్తుత-భవిష్యత్ ప్రయాణికుల, సరుకు రవాణా డిమాండ్, జనాభా పెరుగుదల, ప్రయాణ సమయాలను పరిగణనలోకి తీసుకుంటున్నారు. రాజధాని నుంచి జిల్లాలకు, జిల్లా కేంద్రాల మధ్య, మండల కేంద్రాల మధ్య నిర్దిష్ట సమయాల్లో ప్రయాణించేలా రహదారి సామర్థ్యం, లేన్-కిలోమీటర్లను గణనీయంగా పెంచాలని లక్ష్యంగా నిర్దేశించారు. వారసత్వ పరిరక్షణ, పర్యావరణ స్థిరత్వం, ప్రభుత్వ మౌలిక సదుపాయాలు, రహదారి భద్రత, దీర్ఘకాలిక రవాణా ప్రణాళికలను సమన్వయం చేస్తూ—సంప్రదాయ జ్ఞానం నుంచి పాఠాలు తీసుకుంటూనే కొత్త ఆలోచనలను శాస్త్రీయంగా నిర్ధారించుకుని ముందుకు సాగాలన్నదే ఈ రెండు సెషన్ల ప్రధాన సందేశంగా నిలిచింది.


తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్  కోసం  మా  X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి..  మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు

 

Leave a Reply

Your email address will not be published. Required fields are marked *