బడి సదువులు బాగు పడేదెలా!?

ప్రభుత్వ విద్య అభివృద్ధి పై కాంగ్రెస్ సర్కారు కురిపిస్తున్న అభిమానంలో నిజాయితీ ఉందనే  భ్రమలలోంచి తెలంగాణ సమాజం తేరుకోవాలి. ఆలోచనలో కపట ప్రేమ, అమలు చేసే పథకాల డొల్లతనం, ఆచరణలో వైఫల్యాలు, పాఠశాల నిర్వహణలో లోపాలను గమనించాలి. బడిబాట నిర్ధేశించిన లక్ష్యాలను చేరుకోలేక పోవటానికి గల వాస్తవ కారణాలను ఆవగతం చేసుకోవాలి. మండుటెండలలో బడిబాట నిర్వహించినా కూడా నమోదు శాతం లక్ష్యాన్ని ఎంతో కొంతైనా కూడా అధిగమించలేక పోతున్నాం. ఇప్పటికే ఉన్న నమోదును కాపాడుకోలేక పోతున్నాం. పాఠశాల విద్య నిర్వహణ మార్గదర్శకాలను ప్రభుత్వం నిర్ధేశించాలి.అధికారులు అమలు చేయాలి. కానీ అధికారులే విద్యా నిర్వహణ మార్గదర్శకాలు రూపొందించే పేరిట ప్రభుత్వాన్ని తప్పుదారి పట్టిస్తే విద్యాభివృద్ధి కునారిల్లి పోతుంది. ఆ ఫలితాల మేరకు మూడు, నాలుగు సెక్షన్లతో ఉండేటి   వందల ప్రభుత్వ పాఠశాలలు నమోదు శాతం పడిపోవటంపట్ల, జీరో నమోదు పాఠశాలలుగా మారుతున్నాయి.ఇందుకు ప్రభుత్వానికి ప్రభుత్వ విద్యాభారం మోసేందుకు గల విముఖతయే కారణమనాలి. ఒక వైపు విద్యార్థుల నమోదు ఉన్న  బడిలోనే  మౌలిక సదుపాయాలు, సిబ్బందిని ఏర్పాటు చేస్తామని ప్రభుత్వం అంటుంది . మరొక వైపు మౌలిక సదుపాయాలు,చాలినంత సిబ్బంది ఉన్న  బడులకే పిల్లలను పంపే ఉద్దేశంతో తల్లిదండ్రులున్నారు .. ఈ డోలాయమాన పరిస్థితులు కొంత కాలంగా కనిపిస్తున్నాయి. అంతిమంగా ఈ ధోరణులు పాఠశాలల మూసివేతకు దోహదపడుతున్నాయి.

“ఒక వైపు విద్యార్థుల నమోదు ఉన్న  బడిలోనే  మౌలిక సదుపాయాలు, సిబ్బందిని ఏర్పాటు చేస్తామని ప్రభుత్వం అంటుంది . మరొక వైపు మౌలిక సదుపాయాలు,చాలినంత సిబ్బంది ఉన్న  బడులకే పిల్లలను పంపే ఉద్దేశంతో తల్లిదండ్రులున్నారు .. ఈ డోలాయమాన పరిస్థితులు కొంత కాలంగా కనిపిస్తున్నాయి. అంతిమంగా ఈ ధోరణులు పాఠశాలల మూసివేతకు దోహదపడుతున్నాయి.”