హైదరాబాద్ ఒలింపిక్స్ కల… తెలంగాణ క్రీడా విప్లవంతోనే సాకారం

ప్రపంచంలో అత్యున్నత క్రీడా మహోత్సవమైన ఒలింపిక్స్‌కు హైదరాబాద్ ఆతిథ్యం ఇవ్వాలనే తెలంగాణ ప్రభుత్వ లక్ష్యం ఆశాజనకమే. ముఖ్యమంత్రి రేవంత్ రెడ్డి ప్రకటించిన ఈ సంకల్పం రాష్ట్రానికి కొత్త దిశను చూపుతోంది. అయితే ఒలింపిక్స్ నిర్వహించడం అనేది కేవలం ఒక స్టేడియం నిర్మాణంతో పూర్తయ్యే పని కాదు. ప్రపంచ ప్రమాణాలకు తగ్గ మౌలిక వసతులు, వేలాది అంతర్జాతీయ క్రీడాకారులను తీర్చిదిద్దే వ్యవస్థ, గ్రామీణ స్థాయి నుంచి ప్రతిభను వెలికితీసే విధానం, దీర్ఘకాలిక క్రీడా ప్రణాళిక—ఇవన్నీ కలిసి పనిచేస్తేనే ఆ కల సాకారం అవుతుంది.

ఒలింపిక్స్ నిర్వహణకు ఏం కావాలి?

ఒలింపిక్స్ నిర్వహించాలంటే వేల ఎకరాల విస్తీర్ణంలో ఆధునిక క్రీడా నగరం అవసరం. ప్రధాన ఒలింపిక్ స్టేడియం, అథ్లెటిక్స్ ట్రాక్, స్విమ్మింగ్ కాంప్లెక్స్, ఇండోర్ అరేనాలు, షూటింగ్ రేంజ్, వెలోడ్రోమ్, హాకీ, ఫుట్‌బాల్, టెన్నిస్, బాస్కెట్‌బాల్, జిమ్నాస్టిక్స్, రెజ్లింగ్, బాక్సింగ్ వంటి అన్ని క్రీడలకు అంతర్జాతీయ ప్రమాణాల మైదానాలు ఉండాలి. క్రీడాకారుల కోసం ఒలింపిక్ విలేజ్, వేలాది గదులతో వసతి, మెట్రో, రహదారులు, వైద్య కేంద్రాలు, భద్రతా వ్యవస్థ, మీడియా సెంటర్లు వంటి భారీ మౌలిక సదుపాయాలు అవసరం.

పర్మిషన్లు – అంతర్జాతీయ ప్రమాణాలు

ఒలింపిక్స్ నిర్వహించాలంటే అంతర్జాతీయ ఒలింపిక్ కమిటీ (IOC) నిర్దేశించిన ప్రమాణాలు తప్పనిసరి. కేంద్ర ప్రభుత్వ మద్దతు, అంతర్జాతీయ క్రీడా సమాఖ్యల అనుమతులు, పర్యావరణ అనుమతులు, భూసేకరణ, ట్రాఫిక్ ప్రణాళిక, భద్రతా వ్యవస్థ, అంతర్జాతీయ విమానాశ్రయ సామర్థ్యం వంటి అంశాల్లో సమగ్ర ప్రణాళిక అవసరం.

తెలంగాణ కొత్త క్రీడా విధానం ఎలా ఉండాలి?

“ప్రస్తుతం చాలా పాఠశాలల్లో క్రీడలకు ప్రాధాన్యం తక్కువ. స్వాతంత్య్ర  దినోత్సవం, గణతంత్ర దినోత్సవం వంటి సందర్భాల్లో మాత్రమే ఆటలు నిర్వహించడం వల్ల ప్రపంచ స్థాయి క్రీడాకారులు తయారుకారు. అందుకే ప్రతి పాఠశాలలో ప్రతిరోజూ కనీసం ఒక గంట క్రీడలకు కేటాయించడం తప్పనిసరి చేయాలి. పరీక్షలకు ఉన్న ప్రాధాన్యంతో పాటు శారీరక దారుఢ్యానికి సమాన ప్రాధాన్యం ఇవ్వాలి.“

శ్రీశైలం దూడం 

ప్రస్తుతం చాలా పాఠశాలల్లో క్రీడలకు ప్రాధాన్యం తక్కువ. స్వాతంత్య్ర  దినోత్సవం, గణతంత్ర దినోత్సవం వంటి సందర్భాల్లో మాత్రమే ఆటలు నిర్వహించడం వల్ల ప్రపంచ స్థాయి క్రీడాకారులు తయారుకారు. అందుకే ప్రతి పాఠశాలలో ప్రతిరోజూ కనీసం ఒక గంట క్రీడలకు కేటాయించడం తప్పనిసరి చేయాలి. పరీక్షలకు ఉన్న ప్రాధాన్యంతో పాటు శారీరక దారుఢ్యానికి సమాన ప్రాధాన్యం ఇవ్వాలి.

ప్రాథమిక పాఠశాల నుంచే ప్రతిభ గుర్తింపు

ఐదో తరగతి నుంచే విద్యార్థుల శారీరక సామర్థ్యాన్ని పరీక్షించి వారి ప్రతిభను నమోదు చేయాలి. ప్రతి ఆరు నెలలకు ఒకసారి ప్రతిభా పరీక్షలు నిర్వహించి ఉత్తమ క్రీడాకారులను ఎంపిక చేయాలి. వారికి ప్రత్యేక శిక్షణ, పోషకాహారం, కోచింగ్, వైద్య పరీక్షలు, క్రీడా సామగ్రి ఉచితంగా అందించాలి.

గ్రామం నుంచి ఒలింపిక్స్ వరకు

ప్రతి గ్రామంలో క్రీడా మైదానం ఉండాలి. గ్రామ స్థాయిలో ఎంపికైన వారిని మండల స్థాయికి, అక్కడి నుంచి జిల్లా, రాష్ట్ర, జాతీయ స్థాయిలకు శాస్త్రీయ పద్ధతిలో తీసుకెళ్లే వ్యవస్థ ఉండాలి. ప్రతి దశలో ప్రతిభను అంచనా వేసి అత్యుత్తమ క్రీడాకారులకు ప్రత్యేక అకాడమీల్లో శిక్షణ ఇవ్వాలి.

స్పోర్ట్స్ యూనివర్సిటీ అవసరం

తెలంగాణలో ఏర్పాటు చేయనున్న స్పోర్ట్స్ యూనివర్సిటీ కేవలం డిగ్రీలు ఇచ్చే విద్యాసంస్థ కాకూడదు. అంతర్జాతీయ కోచ్‌ల తయారీ, క్రీడా శాస్త్ర పరిశోధనలు, స్పోర్ట్స్ మెడిసిన్, ఫిజియోథెరపీ, బయోమెకానిక్స్, స్పోర్ట్స్ సైకాలజీ, న్యూట్రిషన్, డేటా అనలిటిక్స్ వంటి విభాగాలతో దేశంలోనే అత్యుత్తమ కేంద్రంగా ఎదగాలి.

గ్రామీణ క్రీడాకారులకు ప్రత్యేక అవకాశాలు

తెలంగాణ గ్రామాల్లో సహజసిద్ధమైన ప్రతిభ ఉంది. కానీ ఆర్థిక ఇబ్బందులు, సరైన శిక్షణ లేక చాలామంది మధ్యలోనే క్రీడలను వదిలేస్తున్నారు. అలాంటి వారికి నెలవారీ స్టైపెండ్, ఉచిత వసతి, ఆహారం, ప్రయాణ భత్యం, విద్యా సౌకర్యాలు కల్పించాలి. పేద కుటుంబాల పిల్లలకు ప్రత్యేక క్రీడా స్కాలర్‌షిప్‌లు ఇవ్వాలి.

ప్రత్యేక బడ్జెట్ అవసరం

రాష్ట్ర బడ్జెట్‌లో క్రీడలకు ప్రత్యేక నిధి ఏర్పాటు చేయాలి. ప్రతి ప్రభుత్వ పాఠశాలకు క్రీడా సామగ్రి కొనుగోలుకు ప్రత్యేక నిధులు కేటాయించాలి. ప్రతి మండలంలో ఒక మినీ స్పోర్ట్స్ కాంప్లెక్స్, ప్రతి జిల్లాలో అంతర్జాతీయ ప్రమాణాల స్టేడియం ఏర్పాటు చేయాలి.

క్రీడాకారులకు రాయితీలు

జాతీయ, అంతర్జాతీయ స్థాయిలో రాణించే క్రీడాకారులకు ప్రభుత్వ ఉద్యోగాల్లో రిజర్వేషన్, ఉన్నత విద్యలో ప్రత్యేక కోటా, ఉచిత వైద్యం, ప్రమాద బీమా, గృహ స్థలాలు, నగదు ప్రోత్సాహకాలు, జీవితాంతం పెన్షన్ వంటి సంక్షేమ పథకాలు అమలు చేయాలి. అప్పుడు మాత్రమే యువత క్రీడలను కెరీర్‌గా ఎంచుకుంటారు.

ప్రభుత్వం ఎదుర్కొనే సవాళ్లు

భూసేకరణ, భారీ నిధుల సమీకరణ, అంతర్జాతీయ ప్రమాణాల నిర్మాణాలు, నాణ్యమైన కోచ్‌ల కొరత, గ్రామీణ ప్రాంతాల్లో మౌలిక వసతుల లోపం, శిక్షణా వ్యవస్థ బలోపేతం వంటి అనేక సవాళ్లు ఉన్నాయి. వీటిని అధిగమించడానికి దీర్ఘకాలిక ప్రణాళిక, రాజకీయ సంకల్పం, పరిపాలనా సామర్థ్యం అవసరం.

నిపుణుల సూచనలు

క్రీడా రంగాన్ని విద్యలో భాగంగా మార్చాలి. ప్రతి పాఠశాలలో ఫిజికల్ ఎడ్యుకేషన్ టీచర్‌ను తప్పనిసరి చేయాలి. జిల్లా స్థాయిలో స్పోర్ట్స్ సైన్స్ సెంటర్లు ఏర్పాటు చేయాలి. విదేశీ కోచ్‌ల సేవలు వినియోగించాలి. ప్రతిభను రాజకీయాలకు అతీతంగా ఎంపిక చేయాలి. ప్రతి సంవత్సరం రాష్ట్ర క్రీడా పనితీరుపై శ్వేతపత్రం విడుదల చేయాలి.

ఒలింపిక్స్ లక్ష్యం ఎంతవరకు సాధ్యం?

దృఢ సంకల్పం, నిరంతర ప్రణాళిక, భారీ పెట్టుబడులు, గ్రామీణ స్థాయి నుంచి ప్రతిభను తీర్చిదిద్దే వ్యవస్థ ఉంటే హైదరాబాద్ భవిష్యత్తులో ఒలింపిక్స్ నిర్వహించే నగరంగా ఎదగడం అసాధ్యం కాదు. కానీ మైదానాలు నిర్మించడం మాత్రమే కాదు… పతకాలు సాధించే క్రీడాకారులను తయారు చేయడమే అసలు విజయానికి కొలమానం.

“పల్లెలో పరిగెత్తే బాలుడే రేపటి ఒలింపియన్. ప్రభుత్వ పాఠశాలలో ఆడే బాలికే రేపటి ప్రపంచ విజేత. క్రీడలను ఉత్సవాలకే పరిమితం చేయకుండా జీవితంలో భాగం చేస్తేనే తెలంగాణ ఒలింపిక్స్ కల సాకారం అవుతుంది.”

శ్రీశైలం దూడం 

క్రీడా విప్లవం పల్లె నుంచి ప్రారంభమైతేనే… హైదరాబాద్ ఒలింపిక్స్ ఆతిథ్య నగరంగా ప్రపంచ పటంలో నిలుస్తుంది.ఫోటో : గురువారం , జూలై 09 న “గచ్చిబౌలి స్పోర్ట్స్ డిస్ట్రిక్ట్, “యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీ (YIPESU)” ప్రారంభోత్సవ కార్యక్రమంలో ముఖ్యమంత్రి రేవంత్ రెడ్డి, భారత ఒలింపిక్ సంఘం అధ్యక్షులు, రాజ్యసభ సభ్యురాలు పీటీ ఉష, మంత్రి వాకిటి శ్రీహరి, SATG చైర్మన్ శివసేనా రెడ్డి.