న్యూదిల్లీ , జూలై 23: దేశ రాజధాని న్యూదిల్లీ ప్రముఖ వాణిజ్య కేంద్రం కన్నాట్ ప్లేస్ పరిసరాల్లో నెలకొన్న క్లిష్ట పరిస్థితుల దృష్ట్యా అక్కడి అన్ని దుకాణాలు, కార్యాలయాలు, రెస్టారెంట్లు గురువారం (జూలై 23) సాయంత్రం 6.30 గంటలకే మూసివేయాలని న్యూదిల్లీ ట్రేడర్స్ అసోసియేషన్ (ఎన్డీటీఏ) అత్యవసర సలహా సర్క్యులర్ జారీ చేసింది. ఎన్డీఎంసీ (ఎన్డీఎంసీ) చైర్మన్, వైస్ చైర్మన్ సూచనల మేరకు ఈ నిర్ణయం తీసుకున్నట్లు సర్క్యులర్లో పేర్కొన్నారు. కన్నాట్ ప్లేస్ పరిసర ప్రాంతాల్లో నెలకొన్న క్లిష్ట పరిస్థితులను దృష్టిలో ఉంచుకుని ఈ ఆదేశాలను కచ్చితంగా పాటించాలని దుకాణ యజమానులు, కార్యాలయాల నిర్వాహకులు, రెస్టారెంట్ యాజమాన్యాలకు సూచించారు. ఆస్తి నష్టం, వ్యక్తిగత గాయాలు వంటి అవాంఛనీయ సంఘటనలు చోటుచేసుకోకుండా ఉండేందుకు సంబంధిత సంస్థలన్నీ అధికారుల ఆదేశాలకు పూర్తిగా సహకరించాలని ట్రేడర్స్ అసోసియేషన్ విజ్ఞప్తి చేసింది. ఈ మేరకు ఎన్డీటీఏ అధ్యక్షుడు అతుల్ భార్గవ జూలై 23 తేదీతో అత్యవసర అడ్వైజరీ సర్క్యులర్ విడుదల చేశారు. సర్క్యులర్లో “కన్నాట్ ప్లేస్ పరిసరాల్లో క్లిష్ట పరిస్థితి” అని మాత్రమే పేర్కొన్నారు. అయితే ఆ పరిస్థితికి గల నిర్దిష్ట కారణాన్ని సర్క్యులర్లో వెల్లడించలేదు. సంబంధిత అధికారుల నుంచి అధికారిక వివరణ రావాల్సి ఉంది.
