నేడు ‘ప్రపంచ పొగాకు వ్యతిరేక దినం’
పోగాకు ఉత్పత్తుల ప్యాకెట్ల మీద ‘పొగ త్రాగడం ఆరోగ్యానికి హానికరం’ అనే హెచ్చరిక పెద్ద అక్షరాల్లో ముద్రించబడి ఉంటుంది. మన అనుమతితోనే నెమ్మదిగా నెమ్మదిగా కొద్ది కొద్దిగా ప్రాణాలను లాగేసే పొగాకు ఉత్పత్తుల దుష్ప్రభావం పలు వ్యాధులకు కారణమై చివరకు మరణమే శరణ్యం అవుతుంది. అన్నీ తెలిసిన నవ మానవుడు చావు నోట్లో తల పెట్టడం విచారకరం. పొగాకు దురలవాటుతో ప్రపంచవ్యాప్తంగా సాలీన 8 మిలియన్ల ప్రాణాలు గాల్లో కలుస్తున్నాయి. ప్రతి ఏటా పరోక్షంగా ‘సెకండ్‌ హాండ్‌ స్మోకింగ్‌’ వల్ల ఒక మిలియన్‌ అమాయకులు చనిపోయడం జరుగుతున్నది. డబ్ల్యూహెచ్‌ఓ వివరాల ప్రకారం 20వ శతాబ్దంలో 100 మిలియన్ల మరణాలు పొగాకు కారణంగా జరిగాయని తేలింది. ప్రపంచ కాన్సర్‌ మరణాల్లో 25 శాతం పొగాకు వాడకంతోనే జరుగుతున్నాయి. ఈ ప్రాణాంతక దురలవాట్లకు బానిసలైన జనం నేడు కొరోనా వలలో పడితే, అనారోగ్య అగ్నికి ఆజ్యం పోసినట్లు, అతి ప్రమాదకరం కానుందని వైద్యులు సూచిస్తున్నారు.
పొగ తాగడంతో నేరుగా ఊపిరితిత్తులు బలహీణపడి, కోవిడ్‌-19 సోకిన వారిలో ఊపిరి అందక క్షణాల్లో కన్ను మూయడం చూస్తున్నాం. పొగాకు ఉత్పత్తుల్లో సిగరెట్‌, బీడి, చుట్ట, జర్దా, పొగాకు నమలడం, హీటెడ్‌ టొబాకో ప్రాడక్టస్, ముక్కు పొడి (నశం), టొబాకో క్రీమ్‌, పొగరాని పొగాకు, డోఖ, హుక్క, క్రెటెక్‌, రోలీస్‌, టొబాకో పైప్‌ లాంటివి అనేకం వస్తాయి. వీటిలో సిగరెట్‌, బీడీల దురలవాటు ఉన్న వారికి ప్రమాదం అధికంగా కనిపిస్తుంది. కొరోనా కల్లోల సమయంలోనైన పొగాకు వాడకాన్ని త్యజించి, పోషకాహారం తింటూ, వ్యాధినిరోధకశక్తిని పెంచుకోవాలని సూచిస్తున్నారు. పొగాకు అలవాటును త్యజించడం కొంత కష్టమే అయినా పట్టుదలతో క్రమంగా పొగాకుకు దూరం కావాలనే అవగాహన కల్పించుటకు ప్రతి ఏటా 31 మే రోజున ‘ప్రపంచ పొగాకు వ్యతిరేక దినం’ పాటించుట జరుగుతున్నది. ఈ వేదికగా సామాన్య ప్రజలకు, విద్యార్థినీవిద్యార్థులకు పొగాకు దురలవాటు పట్ల అవగాహన కల్పించడంతో పాటు ‘పొగాకు వ్యతిరేక ప్రతిజ్ఞ’ చేయించాలి. 1987లో ఐరాస మరియు డబ్ల్యూహెచ్‌ఓ లు సంయుక్తంగా 31 మే 1988 నుంచి ప్రపంచ పొగాకు వ్యతిరేక దినం నిర్వహించాలని తీర్మానించారు. ఈ ఏడాది నినాదంగా ‘కమిట్‌ టు క్విట్‌’ అనే అంశాన్ని తీసుకున్నారు.
పొగాకు వాడకాన్ని మానేసిన ఉత్తముల్లో హార్ట్ రేట్‌ తగ్గుతూ, రక్తంలో కార్బన్‌ మోనాక్సైడ్‌ స్థాయి పడిపోతూ, రక్త ప్రసరణ పెరిగి ఊపిరితిత్తులు చురుకుగా పని చేస్తాయి. దీనితో దగ్గు, శ్వాస ఇబ్బందులు తొలగి పోతాయి. పొగాకు వినియోగానికి సెలవు పలికితే గుండె జబ్బులు, స్ట్రోక్‌లు మరియు లంగ్‌ కాన్సర్‌ అవకాశాలు తగ్గుతాయి. పొగాకు అలవాటుతో దంత సమస్యలు, చర్మం ముడతలు, దుర్వాసనలు, సొరియాసిస్‌, చర్మం/పెదవులపై మచ్చలు, కంటి జబ్బులు, వినికిడి లోపం, మానసిక క్షీణత, అల్జీమర్స్ వ్యాధి, మహిళల్లో రుతుస్రావ సమస్యలు, శరీర కణజాలానికి ఆక్సీజన్‌ కొరత, జీర్ణనాళ సమస్యలు, ఎముకల బలహీనత, వ్యాధి నిరోధకశక్తి తగ్గడం లాంటి రోగ లక్షణాలు కనిపిస్తాయి. పొగాకులో నికోటిన్‌ ఆక్కలాయిడ్‌ లాంటి 70కి పైగా ప్రమాదకర రసాయనాలు దుష్ప్రభావాలను కలుగిస్తున్నాయి. ఫస్ట్ అం‌డ్‌ సెకండ్‌ హాండ్‌ స్మోకింగ్‌ వల్ల టిబి మరియు టైప్‌-2 డయాబెటిస్‌ వచ్చే అవకాశం పెరుగుతుంది. ఈ-సిగరెట్ల వాడకంతో కౌమార దశ యువత మరియు పిల్లలు అనారోగ్యాల పాలు అవుతున్నారు. పొగాకు దురలవాటుతో ఆరోగ్యానికే కాకుండా ఆర్థిక స్థితికి కూడా నష్టం కలుగుతూ, సమాజంలో చిన్న చూపుకు లోనవుతారు. ఆరోగ్యానికి అతి హానికరమని ప్రకటనలు చేస్తున్న ప్రభుత్వాలు పొగాకు, ఆల్కహాల్‌, మాదకద్రవ్యాలను నిషేధిస్తే బాగుంటుందని బాధ్యతగల పౌరులు సూచిస్తున్నారు. అందరికి సులభంగా అందుబాటులో ఉన్నపుడు దురలవాటును మానడం అతి కష్టం.
ఒక సగటు వ్యక్తి తన జీవితకాలంలో పొగాకు వాడకంతో వ్యక్తిగత ధనం, వైద్య ఖర్చులు, పనిలో శ్రద్ద తగ్గడం, కార్యదక్షత తగ్గడం లాంటి కారణాలతో 1.4 మిలియన్ల డాలర్ల ధననష్టం మరియు 10 ఏండ్ల జీవిత కాలం తగ్గుతుందని అంచనా వేయబడింది. పొగాకు అలవాటుతో పేదరికం పెరుగుతూ, నిత్యావసరాలకు లోటు కలుగుతుంది. పురుషుల్లో పొగాకు అలవాటుతో సంతానం కలగడం కష్టం కావచ్చు. స్త్రీలలో పొగాకు అలవాటుతో సంతానలేమి జరుగుతుంది. పొగాకు దురవాటుకు లోనైన వారిలో 50 శాతం మందిలో జీవితకాలం తగ్గుతుంది. పొగాకును నోట్లో పెట్టుకుని నమిలే దురలవాటు ఉన్న వారిలో నోటి కాన్సర్‌, దంతాలు బలహీనపడడం, దంతాలు రంగు మారడం, చిగురు జబ్బులు, పెదవుల మచ్చలు మరియు తెల్ల మచ్చలు కనిపిస్తాయి. పొగాకు వాడకం పెరిగిన కొద్దీ దేశ పేదరికం కూడా పెరుగుతుంది. సిగరెట్‌ తాగిన తరువాత వదిలే పీకలతో ఆర్సినిక్‌, లెడ్‌, నికోటిన్‌, ఫార్మాల్డిహైడ్‌ లాంటి ప్రమాదకర రసాయనాలు మరియు పొగతో కార్బన్‌ మోనాక్సైడ్‌, నైట్రస్‌ ఆక్సైడ్‌ మరియు మీథేన్‌లు విడుదలై పర్యావరణానికి హాని కలుగుతుంది. విశ్వవ్యాప్తంగా సాలీన 6 ట్రిలియన్ల సిగరెట్లు త్రాగడానికి వాడుకునే 3 ట్రిలియన్ల అగ్గి పెట్టలు తయారు చేయడానికి 9 మిలియన్ల చెట్లు నరకడం జరుగుతున్నది. ప్రపంచవ్యాప్తంగా ఏడాదికి 2 లక్షల హెక్టార్లలో పొగాకు పంట పండుతూ, కొన్ని ప్రదేశాల్లో అడవులు నరికివేస్తూ పొగాకు పంట పండించడం జరుగుతున్నది. పొగాకు దురలవాటుకు తిలోదకాలిచ్చి, కుటుంబ సౌభాగ్యాలకు పునాదులు వేసుకోవడానికి తక్షణమే కంకణబద్దులం అవుదాం.
