జంతర్‌మంతర్‌పై పోరాటం మరింత ఉధృతం!

– 16న జాతీయ పతాకాలతో భారీ నిరసనకు అభిజీత్ దీప్కే పిలుపు
– సౌరవ్ దాస్, అశుతోష్ రాంకాలకు ఐదు రోజుల జ్యుడిషియల్ కస్టడీ 
– నిరసన హక్కును తిరిగి సాధిస్తామన్న రాహుల్ గాంధీ 
– దిల్లీలో విద్యార్థి, యువజన సంఘాల ప్రదర్శనలు 
– 24 గంటల్లో ఉద్యమానికి సిద్ధంగా ఉండాలని ఇండియా కూటమికి పిలుపు
– హైదరాబాద్‌లో భారీ సభకు సన్నాహాలు 
– నిరసనలపై ఐక్యరాజ్యసమితి వ్యాఖ్యలను తిరస్కరించిన కేంద్రం

ప్రజాతంత్ర ప్రత్యేక వార్త | దిల్లీ | అక్టోబర్ 14 : ప్రధాన ఎన్నికల కమిషనర్ జ్ఞానేశ్ కుమార్ రాజీనామా, వోటర్ల జాబితాల ప్రత్యేక సమగ్ర సవరణ (ఎస్ఐఆర్) నిలిపివేత డిమాండ్లతో దేశవ్యాప్తంగా కొనసాగుతున్న నిరసనలు బుధవారం మరింత ఉధృతమయ్యాయి. దిల్లీలోని జంతర్‌మంతర్‌లో నిరసన చేపట్టిన కాక్రోచ్ జనతా పార్టీ (సీజేపీ) నాయకులు సౌరవ్ దాస్, అశుతోష్ రాంకాలకు ఐదు రోజుల జ్యుడిషియల్ కస్టడీ విధించడంపై ప్రతిపక్షాలు తీవ్రంగా స్పందించాయి. ఈ పరిణామాల మధ్య అక్టోబర్ 16న సాయంత్రం 5 గంటలకు దిల్లీలోని కన్నాట్ ప్లేస్ సెంట్రల్ పార్క్ వద్ద జాతీయ పతాకాలతో భారీ ప్రదర్శన నిర్వహించాలని సీజేపీ వ్యవస్థాపకుడు అభిజీత్ దీప్కే పిలుపునిచ్చారు.

జాతీయ పతాకంతో నిరసన నేరమా?

మంగ‌ళ‌వారంనాడు జంతర్‌మంతర్‌లోకి ప్రవేశించి నిరసన చేపట్టిన సౌరవ్ దాస్, అశుతోష్ రాంకా, అజింక్య షిండే సహా 14 మందిని పోలీసులు అదుపులోకి తీసుకున్నారు. వీరిలో దాస్, రాంకాలను బుధవారం ప్రత్యేక ఎగ్జిక్యూటివ్ మేజిస్ట్రేట్ ఎదుట హాజరుపరచగా, ఐదు రోజుల జ్యుడిషియల్ కస్టడీ విధించారు. అనంతరం తిహార్ జైలుకు తరలించారు. అజింక్య షిండేను ఆరు నెలలపాటు శాంతిభద్రతలకు విఘాతం కలిగించబోమన్న షరతుతో రూ.5,000 వ్యక్తిగత పూచీకత్తు, ష్యూరిటీపై విడుదల చేశారు. జంతర్‌మంతర్‌ను అధికారిక నిరసన స్థలాల జాబితా నుంచి తొలగించిన తర్వాత అనుమతి లేకుండా అక్కడికి ప్రవేశించారని పోలీసులు ఆరోపిస్తున్నారు. గతంలో ఇచ్చిన శాంతిభద్రతల పూచీకత్తు నిబంధనలను ఉల్లంఘించడంతోపాటు ప్రభుత్వ విధులకు ఆటంకం కలిగించారని పేర్కొన్నారు. ఈ ఘటనకు సంబంధించి కన్నాట్ ప్లేస్, పార్లమెంట్ స్ట్రీట్ పోలీస్ స్టేషన్లలో రెండు కేసులు నమోదయ్యాయి. అయితే నిరసనకారులు తాము శాంతియుతంగా జాతీయ పతాకాన్ని ప్రదర్శించామని చెబుతున్నారు.

16న కన్నాట్ ప్లేస్‌లో నిరసన

బుధవారం దిల్లీకి చేరుకున్న అభిజీత్ దీప్కే మీడియాతో మాట్లాడుతూ సహచరుల నిర్బంధాన్ని తీవ్రంగా ఖండించారు. దేశంలో జాతీయ పతాకాన్ని ఎగురవేయడం నేరంగా మారిందా అని ప్రశ్నించారు. బ్రిటిష్ పాలనలో స్వాతంత్య్ర సమరయోధులను నిర్బంధించిన పరిస్థితులతో ప్రస్తుత చర్యలను పోల్చారు. అక్టోబర్ 16న సాయంత్రం 5 గంటలకు కన్నాట్ ప్లేస్ సెంట్రల్ పార్క్‌కు జాతీయ పతాకాలతో రావాలని ప్రజలకు పిలుపునిచ్చారు. జాతీయ పతాకాన్ని ప్రదర్శించడం నేరం కాదనే సందేశాన్ని ఈ కార్యక్రమం ద్వారా తెలియజేస్తామని ప్రకటించారు. అయితే ఈ ప్రదర్శనకు పోలీసుల అనుమతి లభించిందా అన్న విషయం ఇంకా ధ్రువీకరణ కాలేదు. సీజేపీ స్వతంత్ర ప్రజా ఒత్తిడి సంఘంగానే కొనసాగుతుందని, రాజకీయ పార్టీగా నమోదు చేసుకునే ఆలోచన లేదని దీప్కే స్పష్టం చేశారు. ఇండియా కూటమితో కలిసి పనిచేసే అంశంలో ఉమ్మడి లక్ష్యాలు ఉన్నప్పటికీ తమ స్వతంత్రతను కొనసాగిస్తామని పేర్కొన్నారు.

24 గంటల్లో ఉద్యమానికి సిద్ధంగా ఉండండి: రాహుల్ గాంధీ

సీజేపీ నాయకుల నిర్బంధాన్ని లోక్‌సభ ప్రతిపక్ష నేత రాహుల్ గాంధీ బుధవారం తీవ్రంగా ఖండించారు. శాంతియుత నిరసన సందర్భంగా జాతీయ పతాకాన్ని ప్రదర్శించడం నేరం కాదన్నారు. యువతను జైలుకు పంపడం పిరికితనానికి నిదర్శనమని విమర్శించారు. విద్యార్థులు, యువత, జర్నలిస్టులు, ఇండియా కూటమి వేర్వేరు వేదికలపై పోరాడుతున్నప్పటికీ రాజ్యాంగ హక్కుల పరిరక్షణే అందరి ఉమ్మడి లక్ష్యమని ప్రకటించారు. జంతర్‌మంతర్ ప్రజలదేనని, నిరసన హక్కును తిరిగి సాధించుకుంటామని స్పష్టం చేశారు. దిల్లీలోని తన నివాసంలో నిర్వహించిన సమావేశంలో ఇండియా కూటమి నాయకులు, విద్యార్థి సంఘాల ప్రతినిధులు, పౌరసమాజ కార్యకర్తలు పాల్గొన్నారు. అవసరమైతే 24 గంటల్లో భారీ ఉద్యమానికి సిద్ధంగా ఉండాలని రాహుల్ గాంధీ పిలుపునిచ్చారు. జంతర్‌మంతర్‌ను అధికారిక నిరసన స్థలాల జాబితా నుంచి తొలగించిన నిర్ణయాన్ని న్యాయపరంగా సవాలు చేయాలని ప్రతిపక్షాలు నిర్ణయించాయి. మరో కార్యక్రమంలో పోలీసుల దాడులకు గురయ్యామని ఆరోపిస్తున్న నిరసనకారులతో కలిసి రాహుల్ గాంధీ మీడియాతో మాట్లాడారు. పోలీసు చర్యలకు సంబంధించిన వీడియో ఆధారాలను భద్రపరచి తనకు పంపించాలని కోరారు. బాధ్యులపై చర్యలు తీసుకునేందుకు ప్రయత్నిస్తామని పేర్కొన్నారు.

దిల్లీలో విద్యార్థి, యువజన సంఘాల ప్రదర్శనలు

దిల్లీలో విద్యార్థి, యువజన సంఘాల నిరసనలు బుధవారం కొనసాగాయి. స్టూడెంట్స్ ఫెడరేషన్ ఆఫ్ ఇండియా (ఎస్ఎఫ్ఐ), డెమోక్రటిక్ యూత్ ఫెడరేషన్ ఆఫ్ ఇండియా (డీవైఎఫ్ఐ) సంయుక్తంగా ఫిరోజ్ షా రోడ్డు నుంచి జంతర్‌మంతర్ వైపు నిర్వహించిన ప్రదర్శనను పోలీసులు అడ్డుకున్నారు. ప్రధాన ఎన్నికల కమిషనర్ రాజీనామా చేయాలని, ఎస్ఐఆర్ ప్రక్రియలో జరిగినట్లు ఆరోపిస్తున్న అవకతవకలపై విచారణ జరిపించాలని సంఘాల నాయకులు డిమాండ్ చేశారు. ఇండియన్ యూత్ కాంగ్రెస్ కార్యకర్తలు కూడా మధ్యాహ్నం పటేల్ చౌక్ మెట్రో స్టేషన్ నుంచి జంతర్‌మంతర్ వైపు ప్రదర్శన నిర్వహించారు. మరోవైపు ఎన్‌ఎస్‌యూఐ నాయకులు పోలీసులపై ఫిర్యాదు చేసేందుకు పార్లమెంట్ స్ట్రీట్ పోలీస్ స్టేషన్‌కు వెళ్లినట్లు ఇండియన్ ఎక్స్‌ప్రెస్ నివేదించింది.

సీజేపీకి విస్తరిస్తున్న ప్రతిపక్షాల మద్దతు

సౌరవ్ దాస్, అశుతోష్ రాంకాల నిర్బంధాన్ని రాహుల్ గాంధీతోపాటు ఆమ్ ఆద్మీ పార్టీ అధినేత అరవింద్ కేజ్రీవాల్, తమిళనాడు మాజీ ముఖ్యమంత్రి ఎం.కె.స్టాలిన్, తృణమూల్ కాంగ్రెస్ నాయకుడు అభిషేక్ బెనర్జీ, శివసేన(యూబీటీ) నాయకుడు ఆదిత్య ఠాక్రే తదితరులు ఖండించారు. జాతీయ పతాకాన్ని ప్రదర్శించినందుకు నిర్బంధించడం సమంజసం కాదని కేజ్రీవాల్ వ్యాఖ్యానించారు. నిర్బంధితులకు న్యాయ సహాయం అందించేందుకు డీఎంకే సిద్ధంగా ఉందని స్టాలిన్ ప్రకటించారు.ఈ మద్దతుపై అభిజీత్ దీప్కే ప్రతిపక్ష నాయకులకు కృతజ్ఞతలు తెలిపారు. అయితే సీజేపీ ఇండియా కూటమిలో అధికారికంగా చేరినట్లు ఎలాంటి ప్రకటన వెలువడలేదు.

హైదరాబాద్‌లో భారీ సభకు సన్నాహాలు

తెలంగాణలోనూ నిరసనలను మరింత విస్తరించేందుకు ఇండియా కూటమి సన్నాహాలు చేస్తోంది. దసరా తర్వాత హైదరాబాద్‌తోపాటు దేశంలోని ప్రధాన నగరాల్లో భారీ ప్రదర్శనలు నిర్వహించాలని నిర్ణయించినట్లు టీపీసీసీ అధ్యక్షుడు బి.మహేష్ కుమార్ గౌడ్ వెల్లడించారు. నవంబర్ 1న దిల్లీలోని రామ్‌లీలా మైదాన్‌లో భారీ బహిరంగ సభ నిర్వహించే అవకాశం ఉందని తెలిపారు. హైదరాబాద్‌లో జరగనున్న కార్యక్రమానికి రాహుల్ గాంధీతోపాటు ఇండియా కూటమి అగ్రనేతలు హాజరయ్యే అవకాశం ఉందన్నారు. అయితే హైదరాబాద్ సభ తేదీ, వేదిక ఇంకా ఖరారు కాలేదు.కాంగ్రెస్ ఎంపీ మల్లు రవి జంతర్‌మంతర్‌పై ఆంక్షలను విమర్శించారు. ఒక నిరసన స్థలాన్ని తొలగిస్తే దేశవ్యాప్తంగా వందలాది నిరసన కేంద్రాలు ఏర్పడతాయని వ్యాఖ్యానించారు.

ఐక్యరాజ్యసమితి వ్యాఖ్యలను తిరస్కరించిన కేంద్రం

దిల్లీలో నిరసనకారుల సామూహిక నిర్బంధాలపై ఐక్యరాజ్యసమితి మానవ హక్కుల విభాగం వ్యక్తం చేసిన ఆందోళనలను భారత విదేశాంగ మంత్రిత్వ శాఖ బుధవారం తిరస్కరించింది. విదేశాంగ శాఖ అధికార ప్రతినిధి రణధీర్ జైస్వాల్ మాట్లాడుతూ ఆ వ్యాఖ్యలు అనుచితమైనవని, భారత అంతర్గత వ్యవహారాల్లో జోక్యంగా పరిగణిస్తున్నామని తెలిపారు. ఇతర దేశాల్లో జరిగే నిరసనలపై ఇదే విధంగా స్పందించకుండా భారతదేశాన్ని ప్రత్యేకంగా విమర్శించడం పక్షపాత వైఖరికి నిదర్శనమని పేర్కొన్నారు.

నిరసనలతో వ్యాపారానికి నష్టం: వర్తక సంఘాలు

దిల్లీలో నిరసనలు, పోలీసుల బారికేడ్లు, ట్రాఫిక్ ఆంక్షల కారణంగా వ్యాపార కార్యకలాపాలు తీవ్రంగా దెబ్బతింటున్నాయని పలు వర్తక సంఘాలు ఆందోళన వ్యక్తం చేశాయి. ఖాన్ మార్కెట్ వర్తక సంఘం అధ్యక్షుడు సంజీవ్ మెహ్రా ప్రకారం, కొన్ని ప్రాంతాల్లో సాధారణ వ్యాపారంతో పోలిస్తే అమ్మకాలు 80 నుంచి 90 శాతం వరకు తగ్గాయి. ప్రధాని నరేంద్ర మోదీ, ప్రతిపక్ష నేత రాహుల్ గాంధీ, సుప్రీంకోర్టు ప్రధాన న్యాయమూర్తికి పలు సంఘాలు వినతిపత్రాలు సమర్పించాయి. శాంతియుత నిరసన హక్కును గౌరవిస్తూనే చిన్న వ్యాపారులు, రోజువారీ కూలీల జీవనోపాధిని కాపాడాలని కోరాయి.

రేపు సుప్రీంకోర్టు విచారణ కీలకం

ఈనెల‌ 10 నుంచి జరిగిన నిరసనల సందర్భంగా పోలీసుల చర్యలు, నిర్బంధాలు, రవాణా ఆంక్షలు, మహిళా జర్నలిస్టులపై దాడుల ఆరోపణలకు సంబంధించిన పిటిషన్లు సుప్రీంకోర్టు ముందున్నాయి. మహిళా జర్నలిస్టులపై దాడుల ఆరోపణలకు సంబంధించి సీనియర్ దిల్లీ పోలీసు అధికారి వివరణ ఇవ్వాలని ప్రధాన న్యాయమూర్తి జస్టిస్ సూర్యకాంత్ ఇప్పటికే కోరారు. అక్టోబర్ 15న ఈ అంశంపై తదుపరి విచారణ జరగాల్సి ఉంది. ఆమ్ ఆద్మీ పార్టీ కూడా దిల్లీలో గురువారంనిరసన, నిరాహార దీక్ష కార్యక్రమాలకు పిలుపునిచ్చింది. జ్ఞానేశ్ కుమార్ రాజీనామా చేసే వరకు ఆందోళనలు కొనసాగిస్తామని పార్టీ నాయకులు ప్రకటించారు.

తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్  కోసం  మా  X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి..  మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు