– పడిపోయిన భూగర్భ జలాలు
– తాగునీటి సమస్య జటిలం
– తుడిచిపెట్టిన వానాకాలం
– అడుగంటిన జలాశయాలు
హైదారాబాద్‌, ప్రజాతంత్ర, అక్టోబర్‌ 2: వానాకాలం వెళ్లిపోయింది. కానీ రాష్ట్రంలో నీటి టెన్షన్‌ మొదలైంది. ఎల్‌ నినో ప్రభావంతో ఈసారి వానలు ఆశించినంతగా పడలేదు. జూన్‌ నుంచి సెప్టెంబర్‌ వరకు రాష్ట్రంలో సాధారణంగా పడాల్సిన వానతో పోలిస్తే 17 శాతం లోటు నమోదైంది. 33 జిల్లాల్లో ఏకంగా 18 జిల్లాలు వర్షాభావం (water crisis)లోనే ముగిశాయి. దాదాపు 235 మండలాల్లో వర్షాభావ పరిస్థితులు కనిపిస్తున్నాయి.రాష్ట్రం మొత్తానికి లెక్క వేస్తే వాన కొంత పడినట్టే కనిపిస్తుంది. కానీ పల్లెకు వెళ్లి చూస్తే అసలు కథ తెలుస్తుంది. ఒక చోట వాన పడితే, మరోచోట చినుకు కూడా సరిగ్గా పడలేదు. ఒక్క చెట్టు నీడతో అడవి చల్లబడుతుందా అన్న తీరులో కొన్ని ప్రాంతాల్లో పడిన వాన రాష్ట్రం మొత్తం లోటును పూడ్చలేకపోయింది. 2023లో తెలంగాణలో 861 మి.మీ. వర్షం పడింది. అది సాధారణం కంటే 17 శాతం ఎక్కువ. ఇప్పుడు మాత్రం సాధారణ వర్షపాతం కంటే 17 శాతం లోటు నమోదైంది. రెండేళ్లలోనే వాన లెక్క తలకిందులైంది. ఇక అసలు చిక్కు నీళ్ల దగ్గర మొదలవుతుంది. సెప్టెంబర్‌ 30 నాటికి కృష్ణా, గోదావరి పరిధిలోని తెలంగాణ రిజర్వాయర్లలో కలిపి సుమారు 503 టీఎంసీల నీరు ఉంది. గత ఏడాది ఇదే సమయానికి ఈ నిల్వ 835 టీఎంసీలకు పైగా ఉంది. అంటే ఏడాదిలో దాదాపు 331 టీఎంసీల తేడా కనిపిస్తోంది. కృష్ణా బేసిన్‌లో ఈసారి 323 టీఎంసీలకు పైగా నీరు ఉంది. గత ఏడాది ఇదే సమయానికి 583 టీఎంసీలకు పైగా ఉంది. గోదావరి బేసిన్‌లోనూ ఈసారి సుమారు 180 టీఎంసీలు ఉంటే.. గత ఏడాది 252 టీఎంసీలకు పైగా నిల్వ ఉంది. శ్రీశైలం, నాగార్జునసాగర్‌ లెక్కలు చూస్తే నీటి కొరత మరింత స్పష్టంగా కనిపిస్తోంది. శ్రీశైలంలో గతేడాది 153.56 టీఎంసీలు ఉంటే.. ఈసారి 61.65 టీఎంసీలు మాత్రమే ఉన్నాయి. నాగార్జునసాగర్‌లో గతేడాది 174.25 టీఎంసీలు ఉంటే.. ఈసారి 44.89 టీఎంసీలకు పడిపోయింది.తెలంగాణలో దాదాపు 44 వేల చెరువులు ఉన్నాయి. వాటిలో దాదాపు 40 శాతం చెరువులు పావు వంతు కూడా నిండలేదని ప్రభుత్వం తెలిపింది. చెరువు నిండితే బోరుకు ఊపిరి. చెరువు ఎండితే పల్లెకు కష్టం. చెరువు నిండితే ఊరు నిండినట్టే అనే పాత మాట ఇప్పుడు మళ్లీ గుర్తుకొస్తోంది. చెరువుల్లో నీరు లేకపోతే భూగర్భ జలాలు కూడా పెరగవు. సెప్టెంబర్‌ చివరి నాటికి రాష్ట్రంలో భూగర్భ జలాల సగటు లోతు 11.24 మీటర్లకు చేరింది. నెల మొదట్లో అది 7.52 మీటర్లుగా ఉంది. అంటే నెల రోజుల్లోనే నీటి మట్టం గణనీయంగా దిగింది. బోరు లోతు పెరిగితే మోటారు ఖర్చు పెరుగుతుంది. డీజిల్‌తో నీళ్లు తోడితే రైతు ఖర్చు మరింత పెరుగుతుంది. వాన కోసం ఆకాశం వైపు, నీళ్ల కోసం బోరు వైపు చూస్తున్న పరిస్థితి ఏర్పడింది. ఈ ఏడాది ఖరీఫ్‌లో సుమారు 123.74 లక్షల ఎకరాల్లో సాగు జరిగింది. గత ఏడాది ఇదే సమయంలో 139.29 లక్షల ఎకరాల్లో సాగు జరిగింది. అంటే దాదాపు 15.55 లక్షల ఎకరాలు తగ్గాయి. వరి సాగు కూడా గత ఏడాదితో పోలిస్తే దాదాపు 18 శాతం తగ్గింది. నీరు పుష్కలంగా ఉండే పంటల నుంచి తక్కువ నీటితో పండే పంటల వైపు వెళ్లాలని రైతులకు సూచిస్తున్నారు. రైతు పరిస్థితి మాత్రం లెక్కల్లో కనిపించినంత తేలిక కాదు. విత్తనం వేసి పంట పెంచాడు. మధ్యలో వాన ముఖం చాటేస్తే పెట్టుబడి పోతుంది. బోరు నీటితో కాపాడాలంటే మరో ఖర్చు. నీరు అందకపోతే దిగుబడి తగ్గుతుంది. పంట చేతికి రాకపోతే రైతు చేతిలో మిగిలేది అప్పే. ఇక తాగునీటి లెక్క కూడా ఇప్పుడు కీలకంగా మారింది. హైదరాబాద్‌కు నీరు అందించే సింగూర్‌ వంటి వనరులపై ఒత్తిడి పెరుగుతోంది. సరఫరా కొనసాగుతున్నా రాబోయే నెలల్లో నిల్వలు తగ్గితే ఒత్తిడి పెరిగే అవకాశం ఉంది. అంటే సమస్య రైతు పొలంలోనే కాదు. ఇంటి కుండ దగ్గర కూడా ఉంది. సాగుకు నీళ్లు కావాలి. పల్లెకు తాగునీరు కావాలి. పట్టణాలకు నీరు కావాలి. నీరు తగ్గినప్పుడు ముందు ఎవరి అవసరం తీరాలి అన్నదే అసలు సవాల్‌.ఇం‌దుకే ప్రభుత్వం ఇప్పుడు ఆల్‌పార్టీ సమావేశానికి సిద్ధమవుతోంది. ఎల్‌నినో ప్రభావం, వర్షాల లోటు, కరువు పరిస్థితులపై అన్ని పార్టీల సలహాలు తీసుకోనుంది. కేబినెట్‌ సబ్‌కమిటీ కూడా పరిస్థితిని అధ్యయనం చేయనుంది. కానీ పల్లెకు కావాల్సింది సమావేశాలు కాదు. నీళ్లు. రైతుకు కావాల్సింది మాటలు కాదు. పంటకు నీరు. ఇంటికి కుళాయి వస్తుందన్న నమ్మకం కావాలి. బోరు ఎండిపోతుందేమో అన్న భయం పోవాలి. ముందు జాగ్రత్తే మేలు అన్న తీరులో ఇప్పుడు నీటి లెక్క ముందే వేసుకోవాల్సిన సమయం. వానాకాలం ముగిసింది. రిజర్వాయర్లలో నీళ్లు గత ఏడాదికంటే చాలా తక్కువగా ఉన్నాయి. చెరువుల్లో నిల్వలు తగ్గాయి. భూగర్భ జలాలు దిగుతున్నాయి. సాగు విస్తీర్ణం తగ్గింది. వాన తగ్గింది. నీళ్లు తగ్గాయి. ఇప్పుడు ప్రభుత్వానికి అసలు పరీక్ష మొదలైంది. కరువు తలుపు తడుతోందా అన్న ప్రశ్నకు లెక్కలు మాత్రం గట్టిగానే హెచ్చరిస్తున్నాయి.
మరోవైపు హైదరాబాద్‌లో పరిస్థితి మరింత ఆందోళనకరంగా ఉంది. గతేడాది సెప్టెంబరులో జిల్లా సగటు 3.57 మీటర్లు ఉండగా, ఈ ఏడాది 10.01 మీటర్లకు పడిపోయింది. మేడ్చల్‌-మల్కాజిగిరిలో 11.64 మీటర్లు, వికారాబాద్‌లో 11.96 మీటర్లు, రంగారెడ్డిలో 11.74 మీటర్లు, మహబూబ్‌నగర్‌లో 10.51 మీటర్లు, సంగారెడ్డిలో 11.21 మీటర్ల లోతుకు నీటి మట్టం పడిపోయింది . బోర్లు ఇప్పటికే చుక్క నీరు రాకుండా మారుతున్న ప్రాంతాలు ఉన్నాయి . నగరాల్లోనూ, పల్లెల్లోనూ తాగునీటికి తీవ్ర ఇబ్బందులు మొదలయ్యాయి. ఎల్‌నినో ప్రభావంతో రుతుపవనాలు ఆలస్యం కావడం, వర్షపాతం తగ్గడం ఇందుకు ప్రధాన కారణం. రాష్ట్ర సగటు వర్షపాతం 18 శాతం లోటుతో నమోదైంది. నల్గొండ, నిర్మల్‌, హైదరాబాద్‌, ఆదిలాబాద్‌, మహబూబ్‌నగర్‌, రంగారెడ్డి, సంగారెడ్డి, వికారాబాద్‌ తదితర 19 జిల్లాల్లో తీవ్ర వర్షపాత లోటు నమోదైంది. ఈ ప్రాంతాల్లో భూగర్భ జలాలు అధికంగా అడుగంటాయి. పెద్దపల్లి, మంచిర్యాల, కుమురంభీం ఆసిఫాబాద్‌, జగిత్యాల వంటి కొన్ని జిల్లాల్లో మాత్రమే కొంత మెరుగైన పరిస్థితి కనిపిస్తోంది. అయినా మొత్తంగా రాష్ట్ర పరిస్థితి ఆశాజనకంగా లేదు. వాతావరణ శాఖ ప్రకారం ఇకపై పెద్దగా వర్షాలు రావు. అంటే నేలలోకి ఇంకే నీరు మరింత తగ్గుతుంది. అక్టోబరు నుంచి వచ్చే ఏడాది మే నెల వరకు తాగునీటి సమస్య కొనసాగే అవకాశం ఉందని అధికారులు అంటున్నారు. భూగర్భ జలవనరుల శాఖ డైరెక్టర్‌ కె.లక్ష్మారెడ్డి మాట్లాడుతూ, నీటిని ప్రతి ఒక్కరు బాధ్యతగా, పొదుపుగా వాడుకోవాలి. వృథాను అరికట్టడం ప్రతి ఒక్కరి కర్తవ్యం అని స్పష్టం చేశారు. జలాశయాలు నిండకపోవడం, చెరువులు ఎండిపోవడం, బోర్లు వట్టిపోవడం ఇవన్నీ కలిసి రాష్ట్రంలో తీవ్ర జల సంక్షోభం ముంచుకొస్తోందని, కనుక నీళ్ళను ఇప్పటి నుండే పొదుపుగా వాడాల్సిన అవసరం స్పష్టమవుతోంది. ప్రజలు, ప్రభుత్వం కలిసి నీటి పొదుపు చర్యలు తీసుకోకపోతే పరిస్థితి మరింత దిగజారే ప్రమాదం ఉంది.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్‌సైట్ ను సందర్శించండి. తాజా అప్‌ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
