Take a fresh look at your lifestyle.

హైదరాబాద్‌లో హై అలర్ట్!

  • టెక్కీకి కరోనా సోకడంతో బాధితుని సన్నిహితులను గుర్తించే పనిలో సర్కార్‌
  • ‌పారిశుద్ధ్య పనులు చేపట్టిన మున్సిపల్‌ అధికారులు

ప్రపంచాన్ని గడగడలాడిస్తున్న కరోనా వైరస్‌.. ‌హైదరాబాద్‌కూ పాకడంతో జంటనగరాల్లో కలకలం రేపుతోంది. హైదరాబాద్‌లో కరోనా వైరస్‌ ‌పాజిటివ్‌ ‌కేసు నమోదు కావడం ఒక్కసారిగా ప్రజలను కుదిపేసింది. సికింద్రాబాద్‌లోని మహేంద్రా హిల్స్‌కు చెందిన సాప్ట్‌వేర్‌ ఇం‌జినీర్‌కు కరోనా పాజిటివ్‌ అని తేలడంతో జంటనగరాలు భయం గుప్పిట్లో చేరిపోయాయి. ఇక ఈ ప్రాంత వాసుల్లో భయం తీవ్రం అయ్యింది. ప్రస్తుతం ఆ యువకుడు ప్రస్తుతం గాంధీ ఆసుపత్రిలో చికిత్స పొందుతున్నాడు. మహేంద్ర హిల్స్‌కు చెందిన 24 ఏళ్ల సాప్ట్‌వేర్‌ ఇం‌జనీర్‌.. ‌కరోనా వైరస్‌ ‌బారిన పడ్డారు. బెంగళూరులో ఓ కంపెనీలో పనిచేస్తున్న ఆయన.. ఇటీవలే దుబాయ్‌ ‌వెళ్లొచ్చారు. అక్కడ హాంకాంగ్‌కు చెందినవారితో కలిసి పనిచేశారు. ఫిబ్రవరి 20న బెంగళూరుకు తిరిగొచ్చారు. అక్కడి నుంచి బస్సులో ఫిబ్రవరి 22న హైదరాబాద్‌కు చేరుకున్నారు. ఇక్కడికి వచ్చాక.. వైరస్‌ ‌సోకిన లక్షణాలు కనపడడంతో తొలుత సికింద్రాబాద్‌లోని ఒక ప్రైవేటు ఆస్పత్రిలో ఔట్‌ ‌పేషెంట్‌గా చికిత్స తీసుకున్నారు.ఈ క్రమంలో ఆయన సికింద్రాబాద్‌లో పలు ప్రాంతాల్లో తిరిగినట్టు సమాచారం. జ్వరంతగ్గకపోవడంతో ఫిబ్రవరి 27న ఆ ఆస్పత్రిలో ఇన్‌పేషెంట్‌గా చేరారు.

ఎంతకీ జ్వరం తగ్గకపోవడంతో.. ఆ ఆస్పత్రిలోని వైద్యులకు అనుమానం వచ్చి ఆయన్ను గాంధీ ఆస్పత్రికి పంపారు. మార్చి 1న గాంధీలో చేరిన ఆయన రక్త నమూనాలను పుణెలోని వైరాలజీ ల్యాబ్‌కు పంపగా.. కరోనా పాజిటివ్‌ ‌వచ్చింది. ఈ విషయాన్ని కేంద్రం సోమవారం అధికారికంగా ప్రకటించింది. తెలంగాణ రాష్టాన్ని్ర కూడా అప్రమత్తం చేసింది. దీంతో రాష్ట్ర ప్రభుత్వం ఆగమేఘాలపై స్పందించింది.ఈ సాప్ట్‌వేర్‌ ఇం‌జినీర్‌కు సంబంధించి కొన్ని భయంకర నిజాలు వెలుగులోకి రావడంతో ఆ ప్రాంత వాసులు తీవ్ర భయాందోళనకు గురవుతున్నారు. ఇంటి నుంచి బయటకు వచ్చేందుకు సైతం జంకుతున్నారు. ప్రస్తుతం మహేంద్రా హిల్స్ ‌ప్రాంతమంతా నిర్మానుష్యంగా మారిపోయింది. అలెర్ట్ అయిన జీహెచ్‌ఎం‌సీ అధికారులు కరోనా వైరస్‌ ‌వ్యాప్తి చెందకుండా పారిశుధ్య పనులు చేపట్టారు. ఆ సాప్ట్‌వేర్‌ ఇం‌జినీర్‌ ‌బెంగుళూరు నుంచి ఈ నెల 22న హైదరాబాద్‌కు వచ్చారు. అప్పటి నుంచి 80 మందితో సన్నిహితంగా ఉన్నట్టు తెలుస్తోంది. ప్రస్తుతం వారిని గుర్తించే పనిలో వైద్య ఆరోగ్యశాఖ ఉంది.

Leave a Reply