– 23 మంది మృతి, 64మంది గల్లంతు
– గల్లంతైన వారి కోసం గాలింపు తీవ్రం
– కన్నీరుమున్నీరుగా విలపిస్తున్న కుటుంబ సభ్యులు
గోవా, జూన్ 8: గోవాలో ఘోర పడవ ప్రమాదం జరిగింది. పర్యాటకులతో వెళ్తున్న పడవ సామర్థ్యానికి మించి ప్రయాణికులను ఎక్కించుకోవడం వల్ల సముద్రంలో బోల్తా పడి 23 మంది మృతి చెందగా, మరో 64 మంది గల్లంతైనట్లు అధికారులు ధృవీకరించారు. గల్లంతైన 64 మంది కోసం కోస్ట్ గార్డ్, నౌకాదళం , విపత్తు నిర్వహణ బృందాలు అత్యాధునిక సాంకేతిక పరికరాలతో సముద్రంలో ముమ్మరంగా శోధిస్తున్నాయి.40 మందిని రెస్క్యూ టీమ్స్ రక్షించాయి. సహాయక చర్యలు కొనసాగుతున్నాయి. సమాచారం అందుకున్న కోస్ట్ గార్డ్, నౌకాదళం, మరియు విపత్తు నిర్వహణ బృందాలు ఘటనా స్థలానికి చేరుకుని గాలింపు చర్యలు ముమ్మరం చేశాయి. ఈ ఘటనపై పోలీసులు విచారణ ప్రారంభించారు. కాగా సామాజిక మాధ్యమాల్లో వైరల్ అవుతున్న పాత వీడియోలను నమ్మవద్దని అధికారులు సూచించారు, అవి అవాస్తవమని స్పష్టం చేశారు. ఇదిలావుండగా ఇప్పటివరకు 23 మంది మరణించినట్లు అధికారికంగా నిర్ధారించగా, సమయం గడుస్తున్న కొద్దీ మృతుల సంఖ్య మరింత పెరిగే అవకాశం ఉందని అధికారులు ఆందోళన వ్యక్తం చేస్తున్నారు. ప్రమాద సమాచారం తెలుసుకుని పర్యాటకుల కుటుంబ సభ్యులు, బంధువులు గోవా తీరానికి చేరుకుంటున్నారు. తమ వారి ఆచూకీ కోసం వారు కన్నీరుమున్నీరుగా విలపిస్తూ ఎదురుచూస్తుండటంతో అక్కడ భయానక వాతావరణం నెలకొంది. పడవలో ప్రయాణిస్తున్న వారందరికీ సరిపడా లైఫ్ జాకెట్లు లేవని, ఇది ప్రాణనష్టం పెరగడానికి ప్రధాన కారణమని విచారణలో తేలింది. ఎక్కువ లాభాల కోసం పడవ సామర్థ్యానికి మించి, నిబంధనలను పూర్తిగా ఉల్లంఘించి పర్యాటకులను ఎక్కించినట్లు పడవ యజమానిపై ఆరోపణలు వస్తున్నాయి. ప్రయాణికుల సంఖ్యను పర్యవేక్షించడంలో యజమాని తీవ్రంగా విఫలమయ్యాడు. కేవలం నిర్వాహకులే కాకుండా, పర్యాటకులు సైతం భద్రతా నియమాలను పట్టించుకోకుండా, మితిమీరిన ఉత్సాహంతో ఒకే పడవలో ఎక్కడం వల్ల ఈ ప్రమాద తీవ్రత పెరిగిందని పరిశీలకులు భావిస్తున్నారు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్సైట్ ను సందర్శించండి. తాజా అప్డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
