అన్ని సామాజిక మరియు రాజకీయ శక్తులు, వచ్చే ఏడాది సార్వత్రిక ఎన్నికల్లో, బీజేపీ అధికారంలోకి రాకుండా నిరోధించడానికి తీవ్రంగా కృషి చేయాలి. భారతదేశాన్ని ఒక మతతత్వ రాజ్యంగా మార్చే ఆరెస్సెస్ ఎజెండాను తిప్పికొట్టేందుకు లౌకిక ప్రజాతంత్ర శక్తులు చర్యలు తీసుకోవాలి. ఫాసిజం మరియు నియంతృత్వం మధ్య గుణాత్మక వ్యత్యాసం మసకబారుతోంది. ఫాసిజం కూడా నియంతృత్వమే, కానీ ప్రతి నియంతృత్వం ఫాసిజం కాదు. ఫాసిజం సమాజంలో ఒకటి లేదా కొన్ని విభాగాలను (మైనారిటీ వర్గాలు) ‘ఇతరులు’గా ప్రదర్శిస్తుంది. ఇది మైనారిటీలను ‘మెజారిటీ ప్రజలకు’ శత్రువులుగా చిత్రీకరిస్తుంది. ఇది దేశ అభివృద్ధికి అవరోధాలుగా మరియు దేశ భద్రతకు ముప్పుగా చూపుతుంది.’ ఫాసిస్ట్ శక్తులు మైనారిటీలకు వ్యతిరేకంగా మెజారిటీ ప్రజానీకాన్ని సమీకరించి జాతి ప్రక్షాళన వరకు కూడా వెళ్తాయి.
జర్మనీలో, తొంభై లక్షల మంది యూదులలో, ఫాసిజం అరవై లక్షల మంది ప్రాణాలను బలిగొంది. నిజానికి, మైనారిటీ మరియు మెజారిటీ ఆలోచనల సూత్రీకరణలోనే కుట్ర ఉంది. భారతదేశంలో, రాష్ట్రీయ స్వయం సేవక్ సంఘ్ మాత్రమే మైనారిటీలను ‘ఇతరులు’గా చిత్రీకరిస్తుంది, వారిని ‘అభివృద్ధికి అడ్డంకులు’, ‘దేశ భద్రతకు బెదిరింపులు’ ‘శత్రువులు’; వారికి వ్యతిరేకంగానే ఆరెస్సెస్ గత వందేళ్లుగా తన సిద్ధాంతాన్ని మరియు సంస్థను నిర్మించుకుంది. అటువంటి సిద్ధాంతాన్ని రూపొందించి, దానికి తగిన నిర్మాణాన్ని సిద్ధం చేసిన ఆర్ఎస్ఎస్ను మాత్రమే ఫాసిస్ట్ సంస్థగా పిలుస్తాము. కాంగ్రెస్ తీరు వేరు. ఇందిరా గాంధీ హత్యకు గురైనప్పుడు, పెద్ద ఎత్తున సిక్కు వ్యతిరేక అల్లర్లు చెలరేగాయి, ఆనాటి కాంగ్రెస్ ప్రభుత్వం వాటిని అనుమతించి ప్రోత్సహించింది, సిక్కు వ్యతిరేకత కాంగ్రెస్ సిద్ధాంతంలో భాగమని మనం చెప్పలేము. అవిభక్త ఆంధ్రప్రదేశ్ కాంగ్రెస్ ఒకసారి ఎన్టీఆర్ ప్రభుత్వాన్ని పడగొట్టడానికి, చెన్నారెడ్డి ప్రభుత్వాన్ని పడగొట్టడానికి మత కలహాలు సృష్టించిన అనుభవం మనకు ఉంది.
ఆ మత కలహాల సంఘటనలు-అవకాశవాదంగా మతపరమైనవి శోచనీయమైనవి, అవి కూడా తక్షణ రాజకీయ అవసరాల కోసం సృష్టించబడ్డాయి కానీ దైవపరిపాలనా రాజ్య స్థాపన కోసం కాదు. ఆర్ఎస్ఎస్-బిజెపి వంటి ఆధిపత్య భావజాలాన్ని కాంగ్రెస్ ఎప్పుడూ విశ్వసించలేదు. కాంగ్రెస్ పార్టీ ఎప్పుడూ మైనారిటీలకు వ్యతిరేకంగా మెజారిటీ వర్గాలను ప్రేరేపించలేదు. రాజ్యహింస సర్వసాధారణమైపోయింది, బీజేపీ పాలనలో ఉన్నా, ఇతర పార్టీల పాలనలో ఉన్నా అన్ని ప్రభుత్వాలు ప్రజల, రాజకీయ ప్రతిపక్షాల ప్రాథమిక హక్కులను పూర్తిగా నిర్వీర్యం చేస్తున్నాయి. అయితే, బీజేపీ తప్ప మరే పార్టీ కూడా ఒక మతానికి చెందిన వారిని మరో మతానికి చెందిన వారిపై రెచ్చగొట్టడం లేదు; బిజెపి తప్ప మరెవ్వరూ సమాజంలోని ఒక వర్గాన్ని ‘ఇతరులు’ ‘బయటి వ్యక్తులు’గా ప్రదర్శించరు. ప్రముఖ మార్క్సిస్ట్ రచయిత డేవిడ్ హార్వే మాటలలో , “పెట్టుబడిదారీ వ్యవస్థలో, ప్రజలు శ్రమ లేకుండా తమ హక్కులను పొందలేరు; ప్రజలు తమ స్వంత పోరాటాల ద్వారా తమ హక్కులను సాధించుకోవాలి రక్షించుకోవాలి”. నేడు, అన్ని రాజకీయ నిర్మాణాలు నియంతృత్వ పాలనను పాటిస్తున్నాయి. ప్రజలు కొంతకాలంగా నియంతృత్వ పాలనతో జీవిస్తున్నారు. కానీ ఇప్పుడు మన ముందు జడలు విప్పిన ఫాసిజం, గుణాత్మకంగా భిన్నమైన పాలన, దాని బీజాలు వంద సంవత్సరాల క్రితం నాటబడ్డాయి.
ఆర్ఎస్ఎస్ (సంఘ్ పరివార్) నాయకత్వంలో ఫాసిజం దాని రెండు కోణాలైన కమ్యూనలిజం మను ధర్మాన్ని దూకుడుగా ప్రదర్శిస్తోంది. ఆధిపత్య మతోన్మాదంపై నియంతృత్వం నిర్మించబడినప్పుడు, అది ఫాసిజం రూపాన్ని తీసుకుంటుంది. కార్పొరేట్ క్యాపిటల్ లూటీ ఎజెండాను ముందుకు నెట్టడం ద్వారా మాత్రమే సంఘ్ పరివార్ శక్తులు తమ ‘హిందూ రాష్ట్ర’ ఎజెండాకు మద్దతు పొందగలవు. అందుకే, తమ హిందుత్వ ఎజెండాను ముందుకు తీసుకెళ్లేందుకు, కార్పొరేట్ల సాధారణ ప్రయోజనాలను పరిరక్షిస్తున్నారు, మరీ ముఖ్యంగా ఎంపిక చేసిన కొన్ని కార్పొరేట్ సంస్థల ప్రయోజనాలకు అధిక ప్రాధాన్యత ఇస్తున్నారు. వారు ఎంచుకున్న కార్పొరేట్ సంస్థల ప్రయోజనాల కోసం చూపుతున్న పక్షపాతం అన్ని పరిమితులను అధిగమించింది. సంఘ్ పరివార్ మతోన్మాద కార్యకలాపాలు కార్పొరేట్ దోపిడిని పెంచి పోషిస్తూ వాస్తవ సమస్యల నుండి ప్రజల దృష్టిని మళ్లిస్తున్నాయన్నది నిజం. అయితే, అంతకు మించి ఇలాంటి కార్యకలాపాలు దేశాన్ని ‘హిందూ రాష్ట్రం’ (ఒక మతతత్వ రాజ్యం) వైపు నడిపిస్తున్నాయి. కొందరు సంఘ్ పరివార్ చర్యలను “అసలు సమస్యల నుండి పరధ్యానం”గా మాత్రమే కొట్టిపారేశారు. ఇది చాలా ప్రమాదకరమైన ధోరణి.
ఆరెస్సెస్ ఈ అహేతుక, ఉన్మాద, భావజాలం ఆధారంగా శిక్షణ పొందిన మరియు వ్యవస్థీకృత ప్రైవేట్ సైన్యాన్ని కలిగి ఉంది. కాబట్టి, సంఘ్ పరివార్ శక్తులు అనుసరిస్తున్న మతోన్మాద కార్యకలాపాలు వాస్తవ సమస్యల నుండి ప్రజల దృష్టిని మళ్లించడానికి సహాయపడతాయి, అయితే వారు ‘హిందూ రాష్ట్ర’ యొక్క అంతిమ లక్ష్యంగా బాటలు వేయడానికి నిర్దేశించబడ్డారని అర్థం చేసుకోవాలి. ప్రస్తుత పరిస్థితిలో మంచి విషయమేమిటంటే, భారతీయ ప్రజలు ఇంకా మతోన్మాదులుగా మారలేదు. బీజేపీ దుష్పరిపాలనను ప్రజలు గమనిస్తూనే ఉన్నారు. అందుకే చాలా రాష్ట్రాల ఎన్నికల్లో బీజేపీ ఓడిపోయింది. బెంగాల్, పంజాబ్, హిమాచల్ ప్రదేశ్, కర్నాటకలో బీజేపీ వరుసగా ఓడిపోయింది. మీడియా పాత్ర నిష్పక్షపాతంగా ఉంటే వారు మరిన్ని పరాజయాలను ఎదుర్కొనేవారు. రాబోయే సార్వత్రిక ఎన్నికలలో, బిజెపి మరియు దాని మిత్రపక్షాలు అధికారంలోకి రాకుండా నిరోధించడానికి వామపక్ష ప్రజాతంత్ర, లౌకిక మరియు ప్రతిపక్ష శక్తులు విశ్వప్రయత్నాలు చేయాలి. దేశంలో పౌరసమాజం పెద్ద ఎత్తున పనిచేయాలి. ఎన్నికల గడువు సమీపిస్తున్నది, అవకాశవాద పార్టీలను, మతతత్వ పార్టీలను ఇంటికి పంపాల్సిన అవసరం ఎంతైనా ఉంది.
దేశంలో మనువాద మతోన్మాద ఫాసిస్ట్ ధోరణి పేట్రేగిపోతున్నది. హిందుత్వ కార్డును ముందుకు తీసుకెళ్లడంలో మతోన్మాద శక్తులు సఫలీకృతం అయ్యారు. మతసామరస్యం, శాంతి, సౌభ్రాతృత్వం ప్రతి మనిషి జీవన విధానం కావాలని ప్రజలు గ్రహించినపుడే పరిస్థితి మారుతుంది. మత విద్వేషాలను ప్రేరేపించే విధానాలు దేశ సార్వభౌమత్వానికి ప్రమాదకరమని ప్రజలు గ్రహించాలి. మెరుగైన సమాజానికి మూలస్థంభాలైన విద్య, వైద్యం, వ్యవసాయం, పర్యావరణం, సాధికారత, విలువలు, సామాజిక సమగ్రతను ప్రజలు విస్మరించి కేవలం మతం పట్టుకుని వేలాడితే పెను ప్రమాదం అని గ్రహించాలి. కర్ణాటకలో భారతీయ జనతా పార్టీ కేంద్రంలో అధికారాన్ని కోల్పోయినప్పటికీ మతోన్మాద ప్రమాదం ఏమాత్రం తగ్గలేదు. కోల్పోయిన అధికారాన్ని సంపాదించేందుకు ఎలాంటి ముసుగులు లేకుండా నేరుగా హిందూత్వ కార్డును ముందుకు తీసుకు వచ్చేందుకు పూనుకుంటున్నారు. అధికారంలో ఉన్న రాష్ట్రాలలో మతోన్మాదాన్ని పెంచే వారి వైఖరి కొనసాగుతూనే ఉన్నది. మతోన్మాదం అది మెజారిటీ తరహా అయినా మైనారిటీ తరహా అయినా ప్రమాదకరమే. అన్ని రకాల మతోన్మాదాన్ని నిశితంగా వ్యతిరేకించాలి, ప్రతిఘటించాలి. బీజేపీ ప్రభుత్వ విధానాలు, సంఘ పరివార్ కార్యక్రమాలు లౌకికతత్వం, ప్రజాస్వామ్యం, సామాజిక న్యాయాలు పునాదులను ధ్వంసం చేస్తున్నాయి.
సంఘపరివార్ శక్తుల విభజనవాద, ఫాసిస్తుతరహా చర్యులు శ్రామిక ప్రజాల వర్గ ఐక్యతను, దేశసమగ్రతను దెబ్బ తీస్తున్నది. బిజెపి తిరిగి అధికారంలోకి వస్తే కార్యనిర్వాహక, న్యాయవ్యవస్థ, సైన్యం మరియు పోలీసు వ్యవస్థ మొత్తం సంఘ్ పరివార్ శక్తులతో నిండిపోతుంది. అప్పుడు పార్లమెంటు రద్దు చేయబడవచ్చు లేదా పూర్తిగా పనికిరానిదిగా మారవచ్చు. ఎన్నికలలో ఫాసిజాన్ని ఓడించడం ఎంత ముఖ్యమో, సాంస్కృతిక రంగంలో సంఘ్ పరివార్ కమ్యూనలిజం మరియు మనువాది సంస్కృతి (అగ్రవర్ణ, బ్రాహ్మణ సంస్కృతి) మూలాలను బహిర్గతం చేయడం కూడా అంతే ముఖ్యం. ఆర్థిక రంగంలో పోరాటాలను కూడా కొనసాగించాలి ఉధృతం చేయాలి. సంఘ్ పరివార్ యొక్క ప్రతి కదలిక మతతత్వం మరియు మను ధర్మం ఆధారంగా ‘హిందూ రాష్ట్ర’ స్థాపన లక్ష్యంగా ఉంది. ‘హిందూ రాజ్యం’ కేవలం ఎన్నికల జిమ్మిక్కు లేదా ప్రజల అసంతృప్తిని పక్కదారి పట్టించే మార్గం కాదు. అదే వారి లక్ష్యం. అటువంటి లక్ష్యాన్ని సాధించడం సాధ్యం కాకపోవచ్చు; అది సాధించినా, జర్మనీలో చేసినట్లుగా అది రద్దు చేయబడుతుంది. కానీ ఫాసిజం అభివృద్ధిని ఇప్పుడు ఆపకపోతే, మనం మునుపెన్నడూ లేని విధంగా రక్తపాతాన్ని చూస్తాము మరియు ఇది కనీసం రెండు లేదా మూడు దశాబ్దాల వరకు ఆగదు. ఫాసిజం సమాజాన్ని అంధకారంలోకి నెట్టగలదు.
– డా. యం. సురేష్ బాబు,
అధ్యక్షులు, ప్రజాసైన్స్ వేదిక
