– వ్యూహాత్మక విరామమా?
– పునరాలోచనకు సంకేతమా??
(రామకిష్టయ్య సంగనభట్ల, సీనియర్ ఇండిపెండెంట్ జర్నలిస్ట్, కాలమిస్ట్)
రాజకీయ రంగస్థలంపై ప్రతీ మార్పు ఒక బలమైన సంకేతాన్ని, ప్రతీ నిశ్శబ్దం ఒక లోతైన అంతర్మథనాన్ని ఆవిష్కరిస్తుంది. భారతీయ జనతా పార్టీ (బీజేపీ) జాతీయ నూతన కార్యవర్గ పునర్వ్యవస్థీకరణలో రాష్ట్ర నేతలకు జాతీయ పదాధికారుల స్థాయిలో కొత్తగా స్థానం దక్కకపోవడం ప్రస్తుతం ఉభయ తెలుగు రాష్ట్రాల రాజకీయ వర్గాల్లో తీవ్ర చర్చనీయాంశంగా మారింది. జాతీయ ఉపాధ్యక్షులు, ప్రధాన కార్యదర్శులు, కార్యదర్శుల కూర్పుతో కూడిన భారీ జాతీయ బృందాన్ని ప్రకటించిన వేళ దేశవ్యాప్తంగా పలు రాష్ట్రాల సమతూకాన్ని పరిగణనలోకి తీసుకున్నప్పటికీ ఎదుగుతున్న తెలంగాణ విభాగానికి ఆశించిన ప్రాతినిధ్యం దక్కకపోవడం గమనార్హం. స్మృతి ఇరానీ, పీయూష్ గోయల్, వసుంధర రాజే, రామ్ మాధవ్, బైజయంత్ పాండా వంటి హేమాహేమీలతో కూడిన జాతీయ కూర్పులో సామాజిక న్యాయం, మహిళా సాధికారత, మైనారిటీ ప్రాతినిధ్యాలకు పెద్దపీట వేసినప్పటికీ, దక్షిణాదిలో అత్యంత కీలకమైన రాజకీయ క్షేత్రంగా మారిన తెలంగాణను జాతీయ సంస్థాగత కేంద్ర బిందువుగా మలచడంలో ఎక్కడో ఒక వ్యూహాత్మక విరామం కనిపించిందన్న భావన రాజకీయ పరిశీలకుల్లో వ్యక్తమవుతోంది. ఈ పరిణామాన్ని క్షుణ్ణంగా అవగతం చేసుకోవాలంటే గత కొన్నేళ్లుగా బీజేపీ సాధించిన క్రమబద్ధమైన ఎన్నికల ప్రస్థానాన్ని, గణాంకాల పూర్వాపరాలను నిశితంగా పరిశీలించాల్సి ఉంటుంది. ఒకప్పుడు కొద్ది స్థానాలకే పరిమితమైన కమలదళం 2019 లోక్సభ ఎన్నికల్లో అనూహ్యంగా నాలుగు స్థానాలు (సికింద్రాబాద్, కరీంనగర్, నిజామాబాద్, ఆదిలాబాద్) గెలుచుకుని తెలంగాణ రాజకీయ ముఖచిత్రంపై సరికొత్త అధ్యాయాన్ని లిఖించింది. ఆ తర్వాత దుబ్బాక, హుజూరాబాద్ ఉప ఎన్నికలు, జీహెచ్ఎంసీ ఎన్నికల్లో ప్రదర్శించిన దూకుడు పార్టీలో నూతనోత్తేజాన్ని నింపింది. 2023 శాసనసభ ఎన్నికల్లో సుమారు 13.9 శాతం ఓటు బ్యాంకుతో 8 అసెంబ్లీ స్థానాలను కైవసం చేసుకుని శాసనసభలో తన బలాన్ని ఇనుమడింపజేసుకుంది. ఇక 2024 సార్వత్రిక ఎన్నికల్లో ఏకంగా 8 లోక్సభ స్థానాలను చేజిక్కించుకుని, అధికార కాంగ్రెస్తో సమానమైన సీట్లను సాధించడమేకాక సుమారు 35 శాతం ఓట్ల వాటాను రాబట్టింది. ప్రస్తుతం లోక్సభలో జి.కిషన్ రెడ్డి, బండి సంజయ్ కుమార్, ఈటల రాజేందర్, డీకే అరుణ, ధర్మపురి అరవింద్, రఘునందన్రావు, కొండా విశ్వేశ్వర్రెడ్డి, గోడం నాగేశ్ రూపంలో ఎనిమిదిమంది బలమైన ప్రతినిధులు పార్లమెంట్లో ఉన్నారు. ఇంతటి విశేష ప్రజాదరణ, పార్లమెంటరీ ప్రాతినిధ్యం ఉన్న రాష్ట్రానికి కేంద్ర సంస్థాగత విభాగంలో నూతన అవకాశాలు లభించకపోవడం సాధారణ కార్యకర్తల్లో సైతం సహజంగానే ప్రశ్నలను రేకెత్తిస్తోంది.
గత కాలపు రాజకీయ విన్యాసాలను పరిశీలిస్తే రాష్ట్ర నేతలు జాతీయ వేదికలపై ప్రత్యేక ముద్ర వేసిన చరిత్ర స్పష్టంగా గోచరిస్తున్నది. కిషన్ రెడ్డి కేంద్ర మంత్రిగా, రాష్ట్ర అధ్యక్షుడిగా విశేష పాత్ర పోషించగా బండి సంజయ్ కుమార్ దూకుడు రాజకీయాలతో క్షేత్రస్థాయి శ్రేణులను నడిపించి జాతీయ ప్రధాన కార్యదర్శిగా బాధ్యతలు నిర్వర్తించారు. డీకే అరుణ జాతీయ ఉపాధ్యక్షురాలిగా వ్యవహరించారు. గతంలో బంగారు లక్ష్మణ్ జాతీయ అధ్యక్షుడిగా పనిచేసిన ఘనత, సీహెచ్.విద్యాసాగర్రావు వంటి నేతల అనుభవం పార్టీ జాతీయ నిర్మాణంలో ఈ ప్రాంతానికి ఉన్న ప్రాధాన్యాన్ని నిరూపించాయి. ప్రస్తుతం కేంద్ర మంత్రివర్గంలో కిషన్ రెడ్డి, సహాయ మంత్రిగా బండి సంజయ్ కీలకమైన అధికారిక బాధ్యతల్లో ఉన్నప్పటికీ, పార్టీ యంత్రాంగాన్ని శాసించే జాతీయ సంస్థాగత పదాధికారుల జాబితాలో రాష్ట్రానికి దక్కాల్సిన ప్రాతినిధ్యంపై భిన్న వ్యాఖ్యానాలు వినిపిస్తున్నాయి. కేంద్ర అధికార నిర్వహణలో రాష్ట్ర నేతలు నిమగ్నమైనందున, సంస్థాగత బాధ్యతలను ఇతర రాష్ట్రాలకు మళ్లించారా లేక ఇది నాయకత్వ సమీకరణల్లో వచ్చిన ప్రాధాన్యతా మార్పా అన్నది ఆసక్తికరంగా మారింది. ఈ పరిణామాన్ని కేవలం నిర్లక్ష్యంగానో లేక విశ్వాస రాహిత్యంగానో పరిగణించడం తొందరపాటు విశ్లేషణే అవుతుంది. జాతీయ రాజకీయ పక్షాల విస్తరణలో ప్రాంతీయ సమీకరణలు, ఎన్నికలు జరగనున్న రాష్ట్రాల ఆవశ్యకతలు, సామాజికవర్గాల సమతుల్యత ప్రధాన పాత్ర పోషిస్తాయి. తాజా పునర్వ్యవస్థీకరణలో పదిమంది మహిళలకు, ఆరుగురు మైనారిటీ ప్రముఖులకు ప్రాధాన్యం ఇవ్వడం వెనుక దేశవ్యాప్త విస్తరణ వ్యూహం దాగి ఉంది. రాష్ట్ర నేతలు ఇప్పటికే కేంద్ర ప్రభుత్వంలో, పార్లమెంటులో విశేష ప్రాతినిధ్యం వహిస్తున్న దృష్ట్యా, రాష్ట్ర నేతలను జాతీయ స్థాయి కంటే రాష్ట్ర క్షేత్రస్థాయి రాజకీయాలకే పరిమితం చేయాలని అధిష్ఠానం భావించి ఉండవచ్చు. కాంగ్రెస్ పాలనపై నిరంతర నిఘా ఉంచడం, క్షేత్రస్థాయిలో పుంజుకునేందుకు శ్రమిస్తున్న బీఆర్ఎస్ రాజకీయ స్థానాన్ని ఆక్రమించడం రాష్ట్రంలో బీజేపీ ముందున్న తక్షణ లక్ష్యాలు.
విత్తనమొకటే అయినా నేల బట్టి ఫలము మారును అన్న లోకోక్తి చందంగా, ఢిల్లీ పీఠంపై రూపొందించే ఏకీకృత జాతీయ వ్యూహాలు స్థానిక నేల స్వభావానికి తగినట్లు పరివర్తన చెందినప్పుడే విజయాలు సాధ్యమవుతాయి. ప్రజాకవి కాళోజీ నారాయణరావు ‘నా గొడవ’లో ప్రబోధించినట్లు ప్రజా చైతన్యాన్ని, ప్రాంతీయ ఆకాంక్షలను ఎప్పటికప్పుడు ఒడిసి పట్టుకోవడమే ప్రజాస్వామ్య రాజకీయాల మౌలిక సూత్రం. తెలంగాణ సమాజం ఉద్యమ చైతన్యంతో, సునిశిత రాజకీయ పరిజ్ఞానంతో కూడుకున్నది. ఇక్కడ ప్రత్యామ్నాయ రాజకీయ శక్తిగా స్థిరపడాలంటే కేవలం కేంద్ర మార్గదర్శకాలే కాక, బలమైన స్థానిక అస్తిత్వం, బలహీనవర్గాలను కలుపుకుపోయే సామాజిక సమన్వయం, గ్రామస్థాయి పోలింగ్ బూత్ నిర్మాణ పటిష్ఠత అత్యంత ఆవశ్యకం. ఈ పరిణామం రాష్ట్ర నాయకత్వానికి ఒక ఆత్మ పరిశీలనాత్మక సంకేతంగా భావించవచ్చు. పదవుల కేటాయింపు కంటే ప్రజాక్షేత్రంలో సాధించే పోరాటాలే పార్టీ భవితవ్యాన్ని నిర్దేశిస్తాయి. రాష్ట్ర అసెంబ్లీలో ప్రత్యామ్నాయంగా ఎదిగేందుకు బూత్ స్థాయి నుంచి మండల, జిల్లా కమిటీల వరకు బలమైన నెట్వర్క్ నిర్మించడం, రైతు, నిరుద్యోగ, ప్రజా సమస్యలపై నిరంతర ఆందోళనలు చేపట్టడం ద్వారానే పార్టీ పునాదులు విస్తరిస్తాయి. జాతీయ నిర్ణయాల్లో రాష్ట్రానికి స్వరం ఎంత అవసరమో, రాష్ట్ర నేలపై ప్రజల నమ్మకాన్ని గెలుచుకోవడం అంతకంటే ప్రధానం. ఈ నిర్ణయం రాష్ట్రంలో బీజేపీ ప్రస్థానానికి ముగింపు కాబోదు. పదునైన క్షేత్రస్థాయి కార్యాచరణకు, ఆత్మశోధనకు, సరికొత్త రాజకీయ సమీకరణల నిర్మాణానికి నాందిగా మారే సరికొత్త అవకాశాల గవాక్షం.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోల కోసం మా Prajatantra వెబ్సైట్ ను సందర్శించండి. తాజా అప్ డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి . మీ స్నేహితులు, కుటుంబ సభ్యులతో షేర్ చేయడం మర్చిపోవద్దు
