- మీరు ఉద్యోగాలు సాధించడమే మాకు బహుమతి..
- మీరు జీవితంలో స్థిరపడే వరకు తోడుంటాం
ఆత్మవిశ్వాసంతో చదివితే … విజయం మీ సొంతమవుతుందని రాష్ట్ర ఆర్థిక , వైద్య ఆరోగ్య శాఖ మంత్రి తన్నీరు హరీశ్ రావు అన్నారు . సిద్దిపేట జిల్లా కేంద్రంలోని విపంచి కళానిలయంలో పోలీస్ శిక్షణ తీసుకున్న అభ్యర్థులకు ఉచిత మెటిరీయల్ పంపిణీ కార్యక్రమంలో ఆయన పాల్గొన్నారు . ఈ సందర్భంగా శిక్షణ పొందిన అభ్యర్థులను ఉద్దేశించి మంత్రి హరీశ్ రావు మాట్లాడుతూ ఈ 60 రోజుల శిక్షణ పూర్తయిందంటే .. మీరు మొదటి ఎక్కినట్టే అని .. మీకు ఒక బలమైన సంకల్పం ఏర్పడిందన్నారు . కొంత మంది ఉద్యోగాలు సాధించి మిగతా వారు మిగిలినా .. ఎవరూ నిరాశ చెందవద్దని.. మీరు జీవితంలో స్థిరపడే వరకు మిమ్మల్ని వదలిపెట్టమన్నారు . ప్రభుత్వ ఉద్యోగాలే కాకుండా , ప్రయివేటు కానీ , ఇతర ఉద్యోగాలు సాధించేందుకు అన్ని సహకారాలు తాము అందిస్తామని భరోసా ఇచ్చారు .
ఎవరైతే తల్లిదండ్రుల కళ్లల్లో ఆనందం చూడాలనుకుంటారో.. అదే పట్టుదల ఉన్నవారికి తాము అన్ని విధాల సహకరిస్తామని తెలిపారు . మీరందరూ ఉద్యోగం సాధిస్తారనే నమ్మకం తమకు ఉందని .. ఆత్మవిశ్వాసంతో గురి చూసి కొడితే ఆకాశానికి కూడా రంధ్రం పడుతుందని .. కాబట్టి మీరందరూ ఆత్మవిశ్వాసంతో ఉండాలని సూచించారు . కొండపాకకు చెందిన అఖిల్ ఇంటివద్దనే చదివి సివిల్స్ సాధించాడని .. అతన్ని మీరందరూ ఆదర్శంగా తీసుకోవాలన్నారు . తాత్కాలిక ఆనందాలకు కొద్ది రోజులు దూరంగా ఉంటే శాశ్వతంగా సంతోషంగా ఉండే ఫలితాలు వస్తాయన్నారు.
ప్రిలిమినరీ తర్వాత ఫిజికల్ టెస్ట్ పాటు ఫైనల్స్ కు కూడా శిక్షణ అందిస్తామని హామి ఇచ్చారు . అన్నీ మీ చేతులో ఉన్నాయని .. అందుకోవాల్సింది మీరే అని మంత్రి హరీష్ రావు అన్నారు . మీరు ఎన్ని ఉద్యోగాలు సాధిస్తే.. అదే మాకు బహుమానం అన్నారు. శిక్షణ సమయంలో అభ్యర్థులకు భోజనాలకు సహకరించిన వారందరికీ కృతజ్ఞతలు తెలిపారు . ఈ కార్యక్రమంలో ఎంపీ ప్రభాకర్ రెడ్డి , సీపీ శ్వేత , శిక్షకుడు భాగ్యకిరణ్ , డీసీపీలు , ఏసీపీలు పాల్గొన్నారు.
