జి-7 సదస్సులో పాల్గొననున్న ప్రధాని మోదీ

నేటి నుంచి మూడ్రోజుల పాటు విదేశీ పర్యటన

న్యూదిల్లీ,జూన్‌14: ‌ప్రధానమంత్రి నరేంద్ర మోదీ ఆదివారం మూడు దేశాల పర్యటనకు వెళ్తున్నారు. ఈనెల 15-16 తేదీల్లో సైప్రస్‌ ‌లో పర్యటిస్తారు. 16-17 తేదీల్లో కెనడాలోని జీ–7 సదస్సులో పాల్గొంటారు. 18న క్రొయేషియాలో పర్యటిస్తారు. కేంద్ర విదేశాంగ శాఖ శనివారం ఈ వివరాలను వెల్లడించింది. ఎంఈఏ వివరాల ప్రకారం, సైప్రస్‌ అధ్యక్షుడు నికోస్‌ ‌క్రిస్టోడౌలిడెస్‌ ఆహ్వానం మేరకు ప్రధానమంత్రి మోదీ ఈనెల 15-16 తేదీల్లో ఆ దేశంలో అధికారిక పర్యటన జరుపుతారు. రెండు దశాబ్దాల కాలంలో ఆ దేశంలో భారత ప్రధాని పర్యటించడం ఇదే ప్రథమం. అధ్యక్షుడు క్రిస్టోడౌలిడెస్‌తో చర్చల అనంతరం లిమాసోల్‌లో వ్యాపార దిగ్గజాలను ఉద్దేశించి మోదీ ప్రసంగిస్తారు. రెండు దేశాల మధ్య ద్వైపాక్షిక సంబంధాల పటిష్టతకు మోదీ పర్యటన దోహదం కానుంది. 

అనంతరం కెనడాకు మోదీ బయలుదేరి వెళ్తారు. కెనడా ప్రధాని మార్క్ ‌కార్నే ఆహ్వానం మేరకు జూన్‌ 16-17 ‌తేదీల్లో జరిగే జీ–7 సదస్సులో మోదీ పాల్గొంటారు. జీ–7 సదస్సులో మోదీ పాల్గొనడం వరుసగా ఇది ఆరోసారి. సదస్సు సందర్భంగా పలు దైపాక్షిక సమావేశాల్లోనూ ప్రధాని పాల్గొంటారు. ప్రధాని తన పర్యటన చివర్లో క్రొయేషియాలో పర్యటిస్తారు. క్రొయేషియా ప్రధాని ఆండ్రెజ్‌ ‌ప్లెంకోవిక్‌ ఆహ్వానం మేరకు జూన్‌ 18‌న ఆ దేశంలో అధికారిక పర్యటన జరుపుతారు. క్రొయేషియాలో భారతదేశ ప్రధానమంత్రి ఒకరు పర్యటించనుండటం ఇదే మొదటిసారి. ద్వైపాక్షిక సంబంధాల్లో ప్రధాని పర్యటన ఒక మైలురాయి కానుంది. ప్రధాని ప్లెంకోవిక్‌, అధ్యక్షుడు జోరన్‌ ‌మిలనోవిక్‌తో మోదీ సమావేశమవుతారు. యూరోపియన్‌ ‌యూనియన్‌ ‌భాగస్వాములతో మరింత పటిష్ట బంధాల గురించి చర్చిస్తారు.