కవిత పార్టీ పేరేంది ..?

తెలంగాణ జాగృతి నాయకురాలు కల్వకుంట్ల కవిత రాజకీయపార్టీ ఏర్పాటుకు ముహూర్తం ఖరారైంది. మేడ్చల్‌ ‌పరిధిలోని ముదిరాబాద్‌ ‌శివారులో ఈ నెల 25వ తేదీన ఉదయం పదిగంటలకు పార్టీ పేరు, జంఢా, ఎజండాను ప్రకటించనున్నట్లు ఆమె స్వయంగా ప్రకటించారు. బిఆర్‌ఎస్‌ ‌పార్టీనుండి సస్పెండ్‌ అయిన తర్వాత మొదటిసారిగా ఫిబ్రవరి 6న రాజకీయ పార్టీని ఏర్పాటుచేస్తున్నట్లు ఆమె ప్రకటించిన విషయం తెలిసిందే. పార్టీ ఏర్పాటు సభను చాలా సాదాసీదాగా నిర్వహించే విధంగా ఏర్పాట్లు జరుగుతున్నాయి. ఈ సమావేశానికి ఇతర రాజకీయపార్టీ నాయకలనెవరిని ఆహ్వానించడం లేదు. కేవలం జాగృతి కార్యకర్తలు, అభిమానుల మధ్యనే నిర్వహించే ఈ సభలో కొత్తగా  పార్టీలో చేరేవారెవరన్న  విషయాన్ని మాత్రం  గుప్తంగా ఉంచారు. అందుకే పార్టీ ప్రారంభ కార్యక్రమంలో చేరికలుండవని కవిత స్పష్టం చేయడం గమనార్హం. అంతవరకు బాగానేఉన్నా ఆమె పెట్టబోయే పార్టీ పేరు ఇప్పుడు రాష్ట్ర వ్యాప్తంగా పెద్ద చర్చకు దారితీసింది. ‘తెలంగాణ ప్రజా జాగృతి పార్టీ’గా నామకరణం చేయాలనుకున్నప్పటికీ, ఎలక్షన్‌ ‌కమిషన్‌ అభ్యంతరం పెట్టడంతో మరోపేరు ఆమోదం కోసం తీవ్ర కసరత్తు మొదలైంది. కాగా ఈనెల 25న జరిగే సభలో ప్రకటించనున్న పార్టీ పేరు విషయంలో కవిత ఇటీవల ఇచ్చిన  లీకు, రాష్ట్ర రాజకీయల్లో ఒక కుదుపు కుదిపిందనే చెప్పాలె. ముఖ్యంగా కెసిఆర్‌ ‌నాయకత్వంలోని బిఆర్‌ఎస్‌పార్టీకి పెద్ద షాక్‌ ఇచ్చినట్లైంది. ఆమె తన పార్టీకి తెలంగాణ రాష్ట్ర సమితిగా నామకరణం  చేయబోతున్నదా అన్న అనుమానాలకు తావేర్పడింది.