•పాకిస్తాన్ లో ఉగ్రవాదులకు గౌరవ సంతాపాలు
•అన్ని వివరాలను త్వరలో ఐక్యరాజ్య సమితి ముందు ఉంచుతాం
•భారత విదేశాంగ కార్యదర్శి విక్రమ్ మిస్త్రీ
న్యూదిల్లీ, మే8 : భారత వాయుసేన స్థావరాలు సహా ఉత్తర, పశ్చిమ ప్రాంతాలలోని భారత సైనిక స్థావరాలపై పాకిస్తాన్ చేపట్టిన డ్రోన్లు, క్షిపణులతో దాడిని భారత వాయుసైనిక రక్షణ వ్యవస్థ విజయవంతంగా తిప్పికొట్టింది. భారత విదేశా ంగ కార్యదర్శి విక్రమ్ మిస్త్రీ , విదేశాంగ శాఖ ప్రతినిధి రంధీర్ జైస్వాల్, కల్నల్ సోఫియా ఖురేషీ, వింగ్ కమాండర్ వ్యోమికా సింగ్లు న్యూదిల్లీలోని విదేశాంగ మంత్రిత్వ శాఖ కార్యాలయంలో మీడియా ప్రతినిధులకు వివరాలు వెల్లడించారు.కశ్మీర్ పహల్గామ్ ఉగ్రదాడికి ప్రతీకారంగా భారత సాయుధ దళాలు పాకిస్తాన్, పాక్ ఆక్రమిత కశ్మీర్ ప్రాంతాల్లో ఉగ్రవాద కేంద్రాలపై జరిపిన ‘‘ఆపరేషన్ సింధూర్’’ అనంతరం పాకిస్తాన్ క్షీపణి,డ్రోన్లతో దాడులు చేసింది. పహల్గామ్ దాడికి పాక్ భద్రతా ఏజెన్సీలే బాధ్యత వహించాయని భారత్ ఆరోపించింది, అయితే ఇస్లామాబాద్ ఈ ఆరోపణలను ఖండించింది.
భారత విదేశాంగ కార్యదర్శి మిస్త్రీ మాట్లాడుతూ, ఇండస్ వాటర్ ట్రీటీకి భారత్ 60 సంవత్సరాలకు పైగా కట్టుబడి ఉందని తెలిపారు. అయితే, పాకిస్తాన్ ఈ ఒప్పందాన్ని అమలు చేయడాన్ని అనేక మార్గాల్లో అడ్డుకున్నట్లు ఆయన విమర్శించారు. శుద్ధమైన ఇంధన అవసరాలు, సాంకేతిక అభివృద్ధిని దృష్టిలో ఉంచుకుంటూ ఈ ఒప్పందాన్ని పునర్విమర్శించాల్సిన అవసరం ఉందని ఆయన అభిప్రాయపడ్డారు. సరిహద్దు ప్రాంతాల్లో పాక్ తరచూ జరిపిన కాల్పుల వల్ల 16 మంది భారత పౌరులు (3 మహిళలు, 5 పిల్లలు) మృతి చెందగా, 59 మందికి గాయాలు అయినట్లు మిస్త్రీ వెల్లడించారు. నీలం-జీలం అణు విద్యుత్ ప్రాజెక్టును లక్ష్యంగా భారత్ దాడి చేసిందని పాకిస్తాన్ మీడియాలో వొస్తున్న ఆరోపణలను కూడా ఆయన ఖండించారు. భారత అంతర్గత మౌలిక సదుపాయాలను టార్గెట్ చేయాలనే యత్నాలకు పాక్నే బాధ్యత వహించాలని ఆయన హెచ్చరించారు.
భారత దాడుల్లో పాకిస్తాన్ పౌరులే చనిపోయారని ఇస్లామాబాద్ చెబుతున్న వ్యాఖ్యలకు మిస్త్రీ బదులిస్తూ, భారత్ లక్ష్యంగా చేసిన స్థలాలు ఉగ్రవాద కార్యకలాపాలకు సంబంధించినవే అని స్పష్టం చేశారు. పాక్లో ఉగ్రవాదులకు గౌరవ సంతాపాలు నిర్వహించడం సాధారణంగా ఉండవచ్చు, కానీ అది భారతానికి అర్థం కానిది అని వ్యాఖ్యానించారు. భారత్కు ఘర్షణను ముదుర్చే ఉద్దేశం లేదని మిస్త్రీ స్పష్టం చేస్తూ, భారత్ దళాలు కేవలం పాకిస్తాన్ దాడులకు ప్రతిస్పందనగా చర్యలు తీసుకుంటున్నాయని పేర్కొన్నారు. పహల్గామ్ దాడిలో టీఆర్ఎఫ్ అనే ఉగ్రవాద సంస్థ ప్రమేయం ఉన్నట్లు పేర్కొన్నారు. ఇది పాకిస్తాన్కు చెందిన లష్కరే తోయిబా మౌఖికంగా ప్రోత్సహిస్తున్న సంస్థ అని తెలిపారు. ఈ విషయాన్ని త్వరలో ఐక్యరాజ్య సమితి ముందు ఉంచనున్నట్లు వెల్లడించారు. టీఆర్ఎఫ్ సంస్థ బాధ్యతను స్వయంగా రెండు సార్లు స్వీకరించినప్పటికీ, ఐక్యరాజ్య సమితి ప్రకటన నుంచి టీఆర్ఎఫ్ పేరును తొలగించమని పాకిస్తాన్ ఒత్తిడి తెచ్చిందని మిస్త్రీ తెలిపారు.
ఈ చర్యలన్నీ ఆ దాడి తీవ్రతను తెలుసుకున్న తర్వాతే జరిగినవని అన్నారు. పాకిస్తాన్ను ఉగ్రవాద కేంద్రంగా పరిగణించడంలో ప్రపంచంలోని పలు ప్రభుత్వాల, నిఘా సంస్థల వద్ద స్పష్టమైన ఆధారాలు ఉన్నాయని పేర్కొన్నారు. ‘‘ఒసామా బిన్ లాడెన్ ఎక్కడ దొరికాడు? అతన్ని అమరుడని ఎవరు పిలిచారు?’’ అని ఆయన ప్రశ్నించారు. భారత రక్షణ మంత్రిత్వ శాఖ తెల్లవారుఝామున తెలిపిన ప్రకటనను మళ్లీ గుర్తుచేస్తూ, కల్నల్ సోఫియా ఖురేషీ, వింగ్ కమాండర్ వ్యోమికా సింగ్ మాట్లాడుతూ, పాక్ చేపట్టిన దాడిని భారత దళాలు విజయవంతంగా అడ్డుకున్నట్లు తెలిపారు. పహల్గామ్ దాడే మొదటి ఘర్షణ అని, భారత్ ఇప్పుడేవైనా చర్యలు తీసుకుంటున్నది అంటే అవి కేవలం స్పందన మాత్రమేనని మిస్త్రీ స్పష్టం చేశారు. మే 6/7 రాత్రి భారత్ దాడులు చేపట్టినప్పటికీ, ఏవీ సైనిక లక్ష్యాలపై కాకుండా ఉగ్ర స్థావరాలపైనే జరిపినవని తెలిపారు.
