గుండె లయ రుగ్మతలకు ‘క్యూ డాట్’ చికిత్స

– ప్రారంభించిన కేర్ హాస్పిటల్స్‌, బంజారాహిల్స్

హైదరాబాద్, ప్రజాతంత్ర, నవంబర్‌ 11: మహిళల‌ను దీర్ఘకాలంగా ఇబ్బంది పెడుతున్న క్రమరహిత హృదయ స్పందన సమస్యకు వినూత్న చికిత్సతో ఉపశమనం లభించింది. దేశంలో ఆధునిక హృదయ చికిత్సలో ముందంజలో ఉన్న బంజారాహిల్స్ కేర్ హాస్పిటల్స్ మరో మైలురాయిని సాధించింది. తాజాగా ప్రారంభమైన క్యూ డాట్ టెక్నాలజీ సహాయంతో ఆట్రియల్ ఫైబ్రిలేషన్ అబ్లేషన్ (గుండె వేగంగా లేదా అసమానంగా కొట్టుకోవడం సమస్యను సరిచేయడానికి చేసే చికిత్స) శస్త్రచికిత్సను విజయవంతంగా పూర్తి చేసింది. ఈ అత్యాధునిక ఎలక్ట్రోఫిజియాలజీ పద్ధతిని ఉపయోగించిన దేశంలోని తొలి హాస్పిట‌ల్స్‌లో కేర్ హాస్పిటల్స్  ఒకటిగా నిలిచింది. ఈ చికిత్సను 57 ఏళ్ల మహిళకు విజయవంతంగా నిర్వహించారు. ఆమెకు నిరంతర గుండె దడ (కర్ణిక దడ), బయాట్రియల్ కార్డియోమయోపతి ఉన్నట్లు వైద్యులు గుర్తించారు. ప్రస్తుతం ఆమె బంజారాహిల్స్‌లోని కేర్ హాస్పిటల్స్‌లో రీజినల్ క్లినికల్ డైరెక్టర్, సీనియర్ ఇంటర్వెన్షనల్ కార్డియాలజిస్ట్ డాక్టర్ ఎం.శ్రీనివాసరావు పర్యవేక్షణలో చికిత్స పొందుతున్నారు. శస్త్రచికిత్స తర్వాత పూర్తిగా స్థిరంగా ఉండి, గుండె లయ సాధారణ స్థాయిలో కొనసాగుతోంది. క్యూ డాట్ అనేది కాథెటర్ అబ్లేషన్ టెక్నాలజీలో తాజా పురోగతి. ఇది అధిక శక్తిని తక్కువ సమయంలో ఖచ్చితంగా ఉష్ణోగ్రత నియంత్రణతో అందించే విధంగా రూపొందించబడింది. దీని వల్ల ఎలక్ట్రోఫిజియాలజీ నిపుణులు క్లిష్టమైన ఎట్రియల్ ఫైబ్రిలేషన్ చికిత్సలను తక్కువ సమయంలో పూర్తిచేయగలరు. అదే సమయంలో రోగి భద్రత మెరుగవుతుంది. అలాగే ఎక్కువసేపు అనస్థీషియా లేదా రేడియేషన్‌కు గురికావడం వల్ల వచ్చే ఇబ్బందులు తగ్గుతాయి.

ఈ విజయంపై బంజారా హిల్స్‌లోని కేర్ హాస్పిటల్స్ కార్డియాక్ ఎలక్ట్రోఫిజియాలజీ క్లినికల్ డైరెక్టర్ డాక్టర్ రామకృష్ణ ఎస్వీకే మాట్లాడుతూ క్యూ డాట్ రాక భారతదేశంలో గుండె దడ చికిత్సలో ఒక పెద్ద ముందడుగు అని చెప్పారు. ఈ సాంకేతికత అబ్లేషన్ చికిత్సలో మరింత ఖచ్చితత్వం, స్థిరత్వం తీసుకువస్తుందని తెలిపారు. ముఖ్యంగా సాధారణ ఔషధ చికిత్సకు స్పందించని దీర్ఘకాలిక అరిథ్మియాతో బాధపడుతున్న రోగులకు ఇది ఎంతో ఉపయోగపడుతుందని ఆయ‌న చెప్పారు. ఈ సందర్భంగా కేర్ హాస్పిటల్స్ జోనల్ సీఓఓ బిజు నాయర్ మాట్లాడుతూ ఈ విజయవంతమైన శస్త్రచికిత్స కేర్ హాస్పిటల్స్‌ కార్డియాక్ ప్రోగ్రామ్ బలాన్ని, అలాగే మా నిపుణుల బృందం నైపుణ్యాన్ని ప్రతిబింబిస్తోందన్నారు. కేర్ బంజారా హిల్స్ కార్డియాక్ కేర్‌లో కొత్త తరం టెక్నాలజీలను ప్రవేశపెట్టడంలో ఎప్పుడూ ముందుంటుందని, దేశవ్యాప్తంగా ఉన్న రోగులకు ఆధునిక చికిత్స సౌకర్యాలను అందించే దిశగా కొనసాగుతుందని తెలిపారు. దేశంలో దాదాపు 1% మంది కర్ణిక దడతో బాధపడుతున్నారు. ముఖ్యంగా 40 ఏళ్లు దాటిన తర్వాత దీని ప్రాబల్యం ఎక్కువగా కనిపిస్తోంది. ఈ ఆధునిక చికిత్స, రోగ లక్షణాలున్న లేదా నిరంతర కర్ణిక దడతో ఇబ్బంది పడుతున్న వారికి, మందులతో పూర్తిగా నియంత్రణలోకి రాని వారికి, అలాగే గుండె వైఫల్యం, స్ట్రోక్ లేదా జీవన నాణ్యత తగ్గే ప్రమాదం ఉన్నవారికి ఎంతో ఉపయోగకరంగా ఉంటుంది. బంజారా హిల్స్‌లోని కేర్ హాస్పిటల్స్‌లో క్యూ డాట్ విజయవంతంగా ప్రవేశపెట్టడం వలన హాస్పిటల్ దేశంలో అత్యాధునిక గుండె వైద్య సేవల (కార్డియాక్ ఎలక్ట్రోఫిజియాలజీ) కేంద్రంగా మరింత బలపడింది. ఈ సాంకేతికత రాకతో కేర్ హాస్పిటల్స్‌ భవిష్యత్తు వైద్యంలో ముందంజలో నిలుస్తూ, నూతన సాంకేతికతను వైద్య నైపుణ్యంతో కలిపి సంక్లిష్ట గుండె సమస్యలతో బాధపడే రోగులకు మెరుగైన ఫలితాలు అందించే దిశగా తమ నిబద్ధతను మరింత బలపరిచింది.

———————————————————————————————————————————————————————-