– కేర్ హాస్పిట‌ల్‌లో అందుబాటులో స‌మ‌న్వ‌య చికిత్స
– నేడు ప్రపంచ మధుమేహ దినం
హైదరాబాద్‌, ప్రజాతంత్ర, నవంబర్ 13 : మధుమేహం గుండె, మూత్రపిండాలు, కళ్లూ, నరాలు, పాదాలు వంటి అవయవాలను మధుమేహం మెల్లగా దెబ్బతీస్తుందని కేర్ హాస్పిటల్స్ డాక్టర్లు హెచ్చరించారు. మధుమేహం వల్ల కలిగే ఇలాంటి సమస్యలపై ప్రజల్లో అవగాహన పెంచడం, వాటిని ముందుగానే గుర్తించడం ఎంత అవసరమో నొక్కి చెబుతోంది. ఈ ఏడాది ప్రపంచ ఆరోగ్య సంస్థ థీమ్‌ – “జీవిత దశలలో మధుమేహం”, మధుమేహ నియంత్రణ అనేది ఒకసారి చేసే పని కాదని, అది జీవితాంతం క్రమం తప్పని సంరక్షణ, క్రమశిక్షణతో సాగించే ప్రయాణమని గుర్తు చేస్తుంది. అంతర్జాతీయ డయాబెటిస్ సమాఖ్య తాజా నివేదిక ప్రకారం, ప్రపంచవ్యాప్తంగా సుమారు 589 మిలియన్ల మంది పెద్దలు — అంటే తొమ్మిది మందిలో ఒకరు — మధుమేహంతో బాధపడుతున్నారు. నాంపల్లిలోని కేర్ హాస్పిటల్స్‌లోని సీనియర్ కన్సల్టెంట్ – జనరల్ మెడిసిన్ మరియు డయాబెటాలజిస్ట్ డాక్టర్ ఎం. ఎ. ముక్సిత్ క్వాద్రి మాట్లాడుతూ, “డయాబెటిస్ అనేది కేవలం రక్తంలో చక్కెర పెరగడం మాత్రమే కాదు, ఇది శరీరంలోని ప్రతి అవయవ వ్యవస్థపై ప్రభావం చూపుతుంది. దీన్ని నిర్లక్ష్యం చేస్తే కాలక్రమేణా గుండె జబ్బులు, మూత్రపిండాల వైఫల్యం, కంటి చూపు తగ్గడం, నరాల సమస్యలు, పాదాల గాయాలు వంటి సమస్యలు తలెత్తుతాయి. కానీ ముందస్తు పరీక్షలు చేయించుకోవడం, వైద్యుల సూచనలను క్రమం తప్పకుండా పాటించడం ద్వారా ఈ సమస్యలను చాలా వరకు నివారించవచ్చు” అని తెలిపారు. ఆరోగ్యంగా ఉన్నవారికి కూడా క్రమం తప్పకుండా ఆరోగ్య పరీక్షలు చాలా అవసరం. ఎందుకంటే లక్షణాలు బయటపడే సమయానికి శరీరంలో లోపల నష్టం మొదలై ఉండే అవకాశం ఉంటుంది. ముఖ్యంగా 35 ఏళ్లు దాటిన వారు, కుటుంబంలో వ్యాధుల చరిత్ర ఉన్నవారు లేదా ఊబకాయం ఉన్నవారు తప్పనిసరిగా క్రమం తప్పకుండా స్క్రీనింగ్ చేయించుకోవాలి అని డాక్టర్ క్వాద్రి సూచించారు. కేర్ హాస్పిటల్స్ వాస్కులర్ అండ్ ఎండోవాస్కులర్ సర్జరీ, వాస్కులర్ ఐఆర్ మరియు పాడియాట్రిక్ సర్జరీ విభాగం క్లినికల్ డైరెక్టర్ అండ్ హెచ్ఓడి డాక్టర్ పి. సి. గుప్తా మాట్లాడుతూ, “ప్రపంచంలో ప్రతి 30 సెకన్లకోసారి డయాబెటిస్ కారణంగా ఒకరి కాలు కోల్పోతున్నారు. కానీ, వీటిలో చాలా వరకు సరైన సమయంలో చికిత్స, జాగ్రత్తలు తీసుకుంటే పూర్తిగా నివారించవచ్చు. డయాబెటిస్ సమస్యలను ముందుగానే గుర్తిస్తే, కాళ్లను మాత్రమే కాదు — ప్రాణాలను కూడా కాపాడవచ్చు” అని తెలిపారు. కేర్ హాస్పిటల్స్‌లో ప్రత్యేకమైన మల్టీడిసిప్లినరీ డయాబెటిక్ ఫుట్ క్లినిక్ ఏర్పాటు చేసి, మధుమేహ పాద సమస్యల చికిత్సకు సమగ్ర సంరక్షణ అందిస్తున్నారు. ఇందులో వాస్కులర్ సర్జన్లు, డయాబెటాలజిస్టులు, ఇంటర్వెన్షనల్ రేడియాలజిస్టులు, పాడియాట్రిక్ నిపుణులు కలిసి రోగులకి సమన్వయంతో చికిత్స అందిస్తున్నారు. నివారణ, అవగాహన, ముందస్తు స్క్రీనింగ్‌పై ప్రత్యేక దృష్టి పెట్టారు. “పాద సంరక్షణ సాధారణ విషయం అనిపించవచ్చు కానీ ఇది మీ కాలును కాపాడగలదు. ప్రతిరోజూ పాదాలను తనిఖీ చేయండి, సరైన పాదరక్షలు ధరించండి, ఎప్పుడూ చెప్పులు లేకుండా నడవకండి. గాయం త్వరగా మానకపోతే వెంటనే వైద్యుడిని సంప్రదించండి,” అని డాక్టర్ గుప్తా సూచించారు. కేర్ హాస్పిటల్స్ తమ సమగ్ర మధుమేహ నిర్వహణ కార్యక్రమంలో భాగంగా మానసిక కౌన్సెలింగ్‌ సేవలను అందిస్తోంది. అలాగే ఎండోక్రినాలజీ, వాస్కులర్ కేర్, ఆప్తాల్మాలజీ, నెఫ్రాలజీ, న్యూట్రిషన్ సేవలను ఒకే చోట సమగ్రంగా అందిస్తోంది. కేర్ హాస్పిటల్స్ సూచన ప్రకారం – ప్రతి ఒక్కరూ క్రమం తప్పకుండా డయాబెటిస్ స్క్రీనింగ్ చేయించుకోవాలి, సమతుల్య ఆహారం తీసుకోవాలి, ప్రతిరోజూ కొంతసేపు వ్యాయామం చేయాలి, ధూమపానం మరియు మద్యపానం పూర్తిగా మానుకోవాలి. ఏవైనా హెచ్చరికల లక్షణాలు కనిపించినప్పుడు వెంటనే వైద్యులను సంప్రదించాలి. ఈరోజు తీసుకునే చిన్న జాగ్రత్తలు రేపటి ఆరోగ్యకరమైన జీవితానికి పెద్ద మార్పు తీసుకురాగలవు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్‌సైట్ ను సందర్శించండి. తాజా అప్‌డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
