రాజ‌కీయ‌ మంటే ఫ‌క్తు వ్యాపార‌మే!

     కగార్ పేరుతో నక్సలైట్లను కంగారు పెట్టడం వెనుక పెద్ద వ్యాపార రహస్యమే ఉందన్నారు. పచ్చని అడవుల్లో ఉన్న విలువైన ఖనిజ సంపద పై ఆశ్రిత పెట్టుబడిదారుల కన్నుపడింది. కనుక పంటిలో రాయిలా? కంటిలో నలుసులాగా ఉన్న నక్సలైట్లు అనేవాళ్ల‌ను నిర్దాక్షిణ్యంగా చంపేయ‌డ‌మో  కాకుంటే భయపెట్టి తలకింత వెలకట్టి కొనడమో, ఇప్పుడు తక్షణ అవసరం. బేర‌సారాల ప‌ని కేంద్ర ప్రభుత్వం మొద‌లుపెట్టేసింది. ఇక ఎవరేమనుకున్నా మార్చి నాటికి హోంమంత్రి అమిత్ షా నక్సలైట్ క్లియరెన్స్ తో అడవుల్లో ఆదానీ,అంబానీ  వ్యాపారం స‌జావుగా సాగే అవకాశం మెరుగైంది. ఈ విషయంలో ఎవరేమనుకున్నా సమాధానం చెప్పాల్సిన అవసరం లేనేలేదు.ఎందుకంటే రాజకీయం కూడా ఫక్తు వ్యాపారమే కనుక!  మనది ప్రజాస్వామ్య దేశం కనుక నక్సలైట్లే కాదు,అడవుల్లో అదానీ,అంబానీలు స్వేచ్ఛ గా తిరిగే హక్కు కలిగించడం కేంద్రం బాధ్యత కాదా, ఎవరైనా ప్రశ్నించినా ప్రశ్నించవచ్చు. నిలదీసినా నిలదీయవచ్చు!

గతంలో రాష్ట్రాలలో , కేంద్రం లో కాస్తా సేవ , గీవ ,చేవ ఉన్నవాళ్ళు అధికార పీఠాలు ఎక్కేవారు. కానీ ఇప్పుడు ట్రెండ్ మారింది. తక్కువ కాలంలో ఎక్కువ సంపాదించే  టెక్నిక్ తెలిసిన సమర్థులైన  వ్యాపారులే రాజకీయ నేతల అవతారం ఎత్తుతున్నారు.వ్యాపార దక్షతే రాజకీయ దక్షతగా మార్పుచెందింది. అందువల్ల రాజకీయాలు -వ్యాపారం మధ్య  సరిహద్దు రేఖ చెరిగిపోయింది.   అంతర్జాతీయ వ్యాపారి ‘ట్రంప్’ ఒకవైపు మన ప్రధాని మోదీ మీద ప్రేమ ఒలకబోస్తూనే, మరోవైపు టారిఫ్ ల మీద టారిఫ్‌లు వేసి బెదిరిస్తుంటే ఆయన తెంపరితనాన్ని చూసి అప్పుడప్పుడు ముచ్చటేసేది. పిచ్చోడనుకున్నారు? మెంటలోడన్నారు? ఎవరేమనుకున్నా ఆయన తగ్గేదేలే. అన్న సినిమా డైలాగ్ లాగా నిలకడగానే నిలబడి ఉన్నారు.పైగా అంతర్జాతీయ శాంతి బహుమతి నోబెల్ తనకెందుకివ్వరని ప్రపంచాన్ని సైతం ఆయన ప్రశ్నించి నివ్వెర ప‌ర‌చిన ఘ‌న‌త ఆయ‌న‌ది. అంతర్జాతీయ వ్యాపారానికి హద్దులు, సరిహద్దులు ఉండవని ఆయన మరోమారు నిరూపించారు. ఆయనకు చమురంటే మహా ప్రీతి, నీటినుండి ఇంధనం తయారయ్యే వరకు తప్పదు మరి చమురు కమురు వాసనలు.

అప్పుడెప్పుడో అమెరికా ఇరాక్ అద్య‌క్షుడు సద్దాం హుస్సేన్ దగ్గర రసాయన ఆయుధాలు ఉన్నాయని చెప్పి దాడి చేసి చివరకు ఆయనను  ఉరితీసి చంపేశారు. వ్యాపారరహస్యం తెలియక ఆయన పిచ్చివాడిలా చావులో కూడా నవ్వును వీడ‌లేదు. కీలుబొమ్మ ను నిలబెట్టారు. చివరకు అమెరికానే ,తూచ్…ఇరాక్ దగ్గర రసాయనిక ఆయుధాలు లేనేలేవని తేల్చి పారేసింది. అదంతా ఉత్తుత్తి మాటేనంటూ గట్టిగానే చెప్పింది. అయినా జరగాల్సింది, జరిగిపోయింది కదా! ఇక ఇప్పుడు వెనిజులా చమురు పై ట్రంప్ కన్నుపడిందట..!అదే పాత కథ! వెనిజులా అధ్యక్షుడు నేరుగా మాదక ద్రవ్యాలు వ్యాపారం చేస్తున్నాడని చెప్పి త‌న సైన్యాన్ని పంపి రాత్రికి రాత్రి పడకగదిలో ఉన్న వెనివెజులా అధ్య‌క్షుడు మదురో, ఆయన భార్య  సిలియా లను రెక్కపట్టి మరీ ఈడ్చుకొచ్చి అమెరికా జైల్లో వేశారు. రేపోమాపో విచారణ జరిపి ఉరి తీస్తారు. అది వేరే కథ!! దీనికి  ముద్దుగా మన ప్రధాని మోదీ  కగార్ లాగా, ట్రంప్ కూడా “ఆపరేషన్ అబ్జాల్వేట్ రిజాల్వ్” అని ముద్దు పేరు పెట్టేసుకున్నారు. ఇక్కడ చమురే చిచ్చు పెట్టిందని ప్ర‌పంచ‌ జనం చెవులు కొరుక్కుంటున్నారు. ఐకాసలు,సార్వభౌమాధికారం జాన్తానై !సామ్రాజ్యవాదం, ఆధిపత్యం వాదం, అరాచకవాదం రాజకీయంగా మీరే పేరైనా పెట్టుకొండి, మాది మాత్రం ఫ‌క్తు వ్యాపార వాదం అని నిరూపించారు.అంతర్జాతీయ పోలీసు బాస్‌, ట్రంప్!..