– గత ఏడాది కంటే రెండింతలు అధికంగా కొనుగోళ్లు
– ప్రభుత్వానికి అమ్మిన రైతుల సంఖ్య రెట్టింపు
– ఇది ప్రభుత్వ నిబద్ధతకు నిదర్శనం
– పంట కొనుగోళ్లను వేగవంతం చేయాలి
– పత్తి కొనుగోళ్ల పరిమితిని పెంచేందుకు కేంద్రంపై ఒత్తిడి
– మంత్రి ఉత్గమ్ కుమార్రెడ్డి
హైదరాబాద్, ప్రజాతంత్ర, నవంబర్ 10: ధాన్యం కొనుగోళ్లలో రాష్ట్రం కొత్త మైలురాయిని అధిగమించింది. ఖరీఫ్ 2025–26 సీజన్లో ఇప్పటి వరకు 8.54 లక్షల మెట్రిక్ టన్నుల (ఎల్ఎమ్టీ) ధాన్యం కొనుగోలు చేయగా ఇది గత సంవత్సరం ఇదే సమయంలో కొనుగోలు చేసిన 3.94 లక్షల మెట్రిక్ టన్నుల కంటే రెండింతలు ఎక్కువ అని పౌరసరఫరాల శాఖ మంత్రి కెప్టెన్ ఉత్తమ్ కుమార్రెడ్డి చెప్పారు. వ్యవసాయ శాఖ మంత్రి తుమ్మల నాగేశ్వరరావుతో కలిసి ప్రధాన కార్యదర్శి ఎస్.రామకృష్ణారావు ఆధ్వర్యంలో జిల్లా కలెక్టర్లు, పౌర సరఫరాల శాఖ అధికారులతో డాక్టర్ బి.ఆర్. అంబేడ్కర్ సచివాలయం నుండి వీడియో కాన్ఫరెన్స్ ద్వారా సోమవారం సమీక్ష నిర్వహించారు. వాతావరణ ప్రతికూల పరిస్థితుల దృష్ట్యా అధికారులు అప్రమత్తంగా ఉండాలని, ధాన్యం కొనుగోళ్లపై తప్పుడు ప్రచారాన్ని అరికట్టాలని మంత్రి ఆదేశించారు. రాష్ట్రం ధాన్యం ఉత్పత్తి, కొనుగోళ్లలో చరిత్రలో ఎన్నడూ లేని రీతిలో రికార్డు నెలకొల్పిందని తెలిపారు. దేశంలో తొలిసారిగా ఒక రాష్ట్ర ప్రభుత్వం ఒకే ఖరీఫ్ సీజన్లో 80 లక్షల టన్నుల ధాన్యం కొనుగోలు చేయాలని నిర్ణయించుకుందని తెలిపారు. ఇది తెలంగాణ వ్యవసాయ రంగ బలాన్ని, రైతుల పట్ల తమ ప్రభుత్వ నిబద్ధతను ప్రతిబింబిస్తుందన్నారు. ఇప్పటివరకు 3.95 లక్షల మెట్రిక్ టన్నుల సన్నాలు, 4.59 లక్షల మెట్రిక్ టన్నుల పెద్ద ధాన్యం కొనుగోలు చేసినట్లు తెలిపారు. ప్రభుత్వ కొనుగోలు కేంద్రాలకు ధాన్యం అమ్మిన రైతుల సంఖ్య గత సంవత్సరం 55,493 మందిగా ఉండగా, ఈ ఏడాది 1,21,960 మందికి చేరిందని చెప్పారు. మొత్తం ధాన్యం కొనుగోలు విలువ రూ.2,041.44 కోట్లు కాగా, ఇది గత సంవత్సరం రూ.915.05 కోట్లతో పోలిస్తే రెట్టింపు. ఇందులో రూ.832.90 కోట్లు ఇప్పటికే రైతులకు చెల్లించగా, మిగిలిన రూ.1,208.54 కోట్లు ఆన్లైన్ ప్రొక్యూర్మెంట్ మేనేజ్మెంట్ సిస్టమ్ (ఓపీఎంఎస్) ద్వారా నమోదు తర్వాత 48 గంటల్లో చెల్లించనున్నట్లు తెలిపారు. సన్నాల బోనస్ మొత్తం గత సంవత్సరం రూ.43.02 కోట్ల నుండి ఈ సంవత్సరం రూ.197.73 కోట్లకు పెరిగిందని, అందులో రూ.35.72 కోట్లు ఇప్పటివరకు చెల్లించామని తెలిపారు. అధికారులు రైతులకు సమయానికి చెల్లింపులు చేయడమే కాకుండా తగిన నిల్వలు, రవాణా సదుపాయాలు కల్పించి, కలెక్టర్లు క్షేత్రస్థాయిలో నిరంతర పర్యవేక్షణ చేయాలని సూచించారు. ధాన్యం కొనుగోలు ప్రక్రియ సున్నితమైనది. కొనుగోలు నుండి చెల్లింపు వరకు నిరంతరంగా సజావుగా సాగాలి. ప్రతి గింజను రక్షించాలి, ప్రతి రైతుకు సమయానికి చెల్లింపు జరగాలి అని అన్నారు. మొంథా తుఫాన్ నుండి రైతులు కొంతవరకు కోలుకుంటున్న సమయంలోనే మరో వాతావరణ వ్యవస్థ ఏర్పడిందని ఆయన పేర్కొన్నారు. అధికారులు వేగంగా, జాగ్రత్తగా వ్యవహరించాలి. వర్షాల వల్ల లేదా పరిపాలనా ఆలస్యాల వల్ల రైతులు నష్టపోవడానికి అవకాశం ఇవ్వకూడదని ఆయన హితవు పలికారు. అన్ని జిల్లాలు ధాన్యం కొనుగోళ్లను వేగవంతం చేసి నిల్వ ధాన్యాన్ని త్వరగా రైస్ మిల్లులకు తరలించాలని ఆదేశించారు. ధాన్యం తడవకుండా రక్షించేందుకు ప్రతి కొనుగోలు కేంద్రంలో టార్పాలిన్ షీట్లు అందుబాటులో ఉంచాలని, రైతులకు ప్రతిరోజు వాతావరణ హెచ్చరికలు అందజేయాలని చెప్పారు. వర్షాల కారణంగా తడిసిన ధాన్యాన్ని తక్షణమే బాయిల్డ్ రైస్ మిల్లులకు తరలించి, బాయిల్డ్ రైస్ కోటా కేటాయింపుల కోసం ప్రతిపాదనలు పంపాలని సూచించారు. అదనంగా తగిన గోదాంలు, స్థానిక హమాలీ సిబ్బందిని సమకూర్చి కొనుగోలు ప్రక్రియ అంతరాయం లేకుండా కొనసాగించాలని ఆదేశించారు. ధాన్యం కొనుగోళ్ల పురోగతిపై తప్పుడు ప్రచారం జరుగుతోందని ఉత్తమ్ కుమార్ రెడ్డి హెచ్చరించారు. కలెక్టర్లు కేంద్రాలను తరచుగా పరిశీలించి, వాస్తవాలను నిర్ధారించి, ప్రజలకు నిజమైన సమాచారం అందించాలన్నారు. ధాన్యం కొనుగోలు సమీక్షతోపాటు మంత్రి తుమ్మల నాగేశ్వరరావు పత్తి, మొక్కజొన్న, సోయాబీన్ కొనుగోళ్లపై జిల్లా కలెక్టర్లతో విస్తృతంగా చర్చించారు. నవంబర్ నెలను పంటల సేకరణకు అత్యంత కీలకమైన కాలంగా పేర్కొన్నారు. మొక్కజొన్న రైతులు ఎకరాకు కొనుగోలు పరిమితిని 18.5 నుండి 25 క్వింటాళ్లకు పెంచిన ప్రభుత్వ నిర్ణయంపై సంతృప్తిగా ఉన్నారని కలెక్టర్లు తెలిపారు.
మొంథా తుఫాన్ కారణంగా సుమారు 1.10 లక్షల ఎకరాలలో ధాన్యం, మొక్కజొన్న, పత్తి పంటలకు నష్టం వాటిల్లిందని నాగేశ్వరరావు తెలిపారు. వ్యవసాయ శాఖ రూపొందించిన పంటనష్టం నివేదికను కేంద్రానికి పంపామని, ప్రస్తుత వాతావరణ పరిస్థితుల్లో కొనుగోళ్లు సజావుగా సాగేందుకు ధాన్య తేమ శాతం నిబంధనలను సడలించమని కేంద్రాన్ని అభ్యర్థించామని మంత్రి తుమ్మల చెప్పారు. కేంద్రంతో చర్చలు కొనసాగిస్తామన్నారు. వాతావరణ ప్రభావంతో రైతులకు నష్టం కాకుండా ప్రభుత్వం చర్యలు తీసుకుంటుందన్నారు. తదుపరి నాలుగు వారాల్లో మొత్తం ధాన్యం కొనుగోళ్లలో 55 శాతం జరగనుందని, అందువల్ల అన్ని శాఖలు సమన్వయంతో పని చేసి రాష్ట్ర లక్ష్యం అయిన 80 లక్షల మెట్రిక్ టన్నుల కొనుగోళ్లను సాధించాలన్నారు. ఈ సమీక్ష సమావేశానికి పౌర సరఫరాల కమిషనర్ స్టీఫెన్ రవీంద్ర, ఇతర ఉన్నతాధికారులు హాజరయ్యారు.
తెలుగు జాతీయ వార్తలు, ప్రత్యేక కథనాలు, ట్రెండింగ్ వీడియోలు కోసం Prajatantra వెబ్సైట్ ను సందర్శించండి. తాజా అప్డేట్స్ కోసం మా X (Twitter), Facebook, WhatsApp ఛానల్ ను ఫాలో కండి.. అలాగే మా ప్రజాతంత్ర, యూట్యూబ్ చానల్ ను సబ్ స్క్రైబ్ చేసుకోండి.. మీ అభిప్రాయాన్ని కామెంట్ రూపంలో పంచుకోండి. మీ స్నేహితులు, కుటుంబ సభ్యులతో షేర్ చేయడం మర్చిపోవద్దు.
