విశ్వాసాలను గౌరవిద్దాం ..!

ఆపత్కాలంలో కనిపించే మనుషులకంటే కనిపించని దేవుళ్ళకు మొక్కుకోవడం మనుషుల నైజం. కుటుంబ సభ్యులు జబ్బుపడినప్పుడు, కొత్తగా వ్యాపారం ప్రారంభించినపుడు, వ్యాపారంలో లాభాలు కొరకు, మంచి ఉద్యోగం దొరకాలని, మంచి భర్త రావాలని, మంచి భార్య దొరకాలని, వ్యసనాలకు దూరంగా ఉండాలని..ఇలా రకరకాలుగా కష్టం వచ్చినా, ఆపద వచ్చినా మొక్కుకునేది మాత్రం దేవుళ్లకే. ప్రపంచంలో ఏ మూలకు వెళ్ళినా వారి మతాలు, సంప్రదాయాలు ప్రకారం మనుషులు దేవుళ్ళకు మొక్కుతుంటారు. వారి కోరికలు తీరిన వెంటనే మొక్కలు చెల్లించుకుంటారు. ఇది అనాదిగా వస్తున్నది. నమ్మకం పునాదిగా ఈ దైవిక విషయాలను కొందరు ఈ మధ్య తమకు ఇష్టం వచ్చినట్లు భాష్యం చెపుతున్నారు. సోషల్ మీడియా లో అయితే చెప్పనక్కర్లేదు. నిద్ర లేచింది మొదలు, రాత్రి పడుకునే వరకు… ఇలా చేయాలి అలా చేయాలి అని వీడియోల రూపంలో అక్షరాల రూపంలో… సంగ్జల రూపంలో చెప్తున్నారు. కొందరైతే నెక్స్ట్ లెవెల్ కు వెళ్లిపోయి…ఫలానా వాళ్ళు ఇలా చేశారు…అలా చేయకూడదు. ఇది తప్పు..అది తప్పు అంటూ అడగకుండానే ఉచిత సలహాలు ఇస్తుంటారు. కొంత వరకు ఒకే.. తనకు తెలిసిందే కరెక్ట్ అనుకోవడం లోనే వచ్చింది పెద్ద చిక్కు.