- 24 గంటల పాటు సాగిన మెగా హ్యాకథాన్!
- సాంకేతిక ఆవిష్కరణలతో మెరిసిన విద్యార్థులు
- 36 జట్లు, 144 మంది మేధావుల భాగస్వామ్యం
హన్మకొండ, ప్రజాతంత్ర, ఏప్రిల్ 11 : వరంగల్లోని ప్రతిష్టాత్మక కాకతీయ ఇన్స్టిట్యూట్ ఆఫ్ టెక్నాలజీ & సైన్స్ లో నిర్వహించిన 24 గంటల మెగా హ్యాకథాన్ “హ్యాక్స్టార్మ్-2026” (Hackstorm-2026) విజయవంతంగా ముగిసింది. సి.ఎస్.ఈ విభాగం, సెంటర్ ఫర్ ఇన్నోవేషన్, రుద్ర ఓవర్సీస్ సంయుక్తంగా నిర్వహించిన ఈ పోటీలో రాష్ట్రవ్యాప్తంగా వివిధ ఇంజనీరింగ్ కళాశాలల నుంచి 36 జట్లు పాల్గొని తమ సాంకేతిక నైపుణ్యాన్ని ప్రదర్శించాయి. శనివారం ఉదయం 9.30 నుంచి ఆదివారం ఉదయం 10.30 గంటల వరకు 24 గంటల పాటు జరుగుతున్న ఈ కార్యక్రమం లో 144 మంది విద్యార్థులు పాల్గొంటున్నారు , ఈ కార్యక్రమం వారి సాంకేతిక నైపుణ్యాలు, బృంద స్ఫూర్తి, సృజనాత్మకత, సమస్య పరిష్కార సామర్థ్యాలను మెరుగుపరచుకోవడానికి ఒక ఉత్తేజకరమైన వేదికను అందించింది . కిట్స్ వరంగల్ క్యాంపస్లోని కొత్త సెమినార్ హాల్లో, ముఖ్య అతిథిగా విచ్చేసిన కేయూ వరంగల్, ఇంజనీరింగ్ అండ్ టెక్నాలజీ ఫ్యాకల్టీ డీన్, ప్రొఫెసర్ మంచాల సదానందం జ్యోతి ప్రజ్వలనతో ఈ కార్యక్రమాన్ని ప్రారంభించారు .
ఈ సందర్భంగా ఆయన మాట్లాడుతూ ఇంజనీరింగ్ విద్యలో ఆవిష్కరణ, వ్యవస్థాపకతను ప్రోత్సహించాల్సిన ప్రాముఖ్యతతో పాటు, ఆవిష్కరణ, సంకల్ప స్ఫూర్తిని నొక్కి చెప్పారు.
గౌరవ అతిథి, హైదరాబాద్లోని డెలాయిట్ కంపెనీ సీనియర్ స్పెషలిస్ట్ డేటా సైంటిస్ట్ అయిన డాక్టర్ అక్కెం యగంతీశ్వరుడు మాట్లాడుతూ.. విద్యార్థులు సుస్థిర సాంకేతికతలకు అలవాటు పడాలని, ప్రపంచవ్యాప్తంగా 99% మంది ప్రజలు వస్తువులను వినియోగిస్తుండగా, కేవలం 1% (ఒక శాతం) మంది మాత్రమే వాటిని సృష్టిస్తున్నారని, విద్యార్థుల వైఖరి, నాణ్యమైన పని పరిశ్రమలకు స్ఫూర్తినిస్తున్నాయన్నారు.
విద్యార్థులలో పోటీ నైపుణ్యాలను పెంపొందించి, వారికి మార్గదర్శకత్వం వహించేందుకు 36 హ్యాకథాన్లు నిర్వహించామని సీఎస్ఈ విభాగాధిపతి ప్రొఫెసర్ పి. నిరంజన్ రెడ్డి తెలిపారు. పాల్గొనే విద్యార్థులు తప్పనిసరిగా కిట్స్డబ్ల్యు యాజమాన్యం అందించిన మౌలిక సదుపాయాలను ఉపయోగించుకోవాలని కోరారు.
ఈ సందర్భంగా ఐ స్క్వేర్ ఆర్ఈ హెడ్, మెకానికల్ ఇంజనీరింగ్ ప్రొఫెసర్ డాక్టర్ కె. రాజ నరేందర్ రెడ్డి అధ్యక్షత వహించారు. కిట్స్డబ్ల్యు బి. టెక్. చివరి సంవత్సర విద్యార్థుల్లో ఒకరైన పి. యశ్వంత్ కృష్ణ, ప్రపంచ స్థాయి పోటీలలో 16 హ్యాకథాన్లలో $17000 డాలర్ల విలువైన బహుమతిని గెలుచుకున్నారు. ఇంజనీరింగ్ లో విద్యార్థి దశ నుండి సాంకేతిక పరిశోధనలో ప్రపంచం ఎదుర్కొంటున్న సవాళ్లను దృష్టిలో పెట్టుకొని వాటికి దీటుగా ఇంజనీరింగ్ విద్యార్థులను తీర్చిదిద్దే ఇలాంటి కార్యక్రమాలు సమాజానికి ఎంతో ఉపయోగపడతాయి.
ఈ కార్యక్రమంలో సీఎస్ఈ విభాగాధిపతి ప్రొఫెసర్ పి. నిరంజన్ రెడ్డి, కన్వీనర్ డా. సి. శ్రీనివాస్, ఫ్యాకల్టీ కోఆర్డినేటర్లు అసిస్టెంట్ ప్రొఫెసర్లు డా. ఎన్.సి. సంతోష్ కుమార్, ఆర్. రాజేష్, స్టూడెంట్ కోఆర్డినేటర్లు: ఎన్. శశాంక్ దేశాయ్, బి. బిందు శ్రేష్ఠ, బియ్యాల సుజిత్ రావు, కృష్ణ వర్ధన్, సాయి కౌశిక్, కె. విష్ణు, పి. కౌశిక్ కమల్, ఫ్యాకల్టీ, సిబ్బంది, పీఆర్ఓ డా. డి. ప్రభాకరా చారి, 230 మందికి పైగా విద్యార్థులు పాల్గొన్నారు.
