అమెరికా అధ్యక్షుడు డోనాల్డ్ ట్రంప్ మంగళవారం ఇరాన్ ను ఉద్దేశిస్తూ “ఒక నాగరికత పూర్తిగా అంతరించిపోతుంది” అని చేసిన బెదిరింపు ప్రకటన ప్రపంచవ్యాప్తంగా పెను సంచలనాన్ని సృష్టించింది. ఒక పురాతన సంస్కృతిని, దేశాన్ని నాశనం చేస్తామనే ఇటువంటి హెచ్చరికలు మానవతావాదులను, చరిత్రకారులను తీవ్ర ఆందోళనకు గురి చేశాయి. మంగళవారం రాత్రి మొత్తం ..భారతీయ కాలమానం ప్రకారం.. ఈ విపత్తు తొలగిపోవాలని ఆశగా ఉదయం కోసం నిరీక్షించారు. ఈ క్లిష్ట సమయంలో పాకిస్తాన్ పోషించిన మధ్యవర్తిత్వ పాత్ర మరియు ఆ దేశం చేసిన దౌత్య ప్రయత్నాలు అభినందనీయం..!
ఏప్రిల్ 7, 2026న డోనాల్డ్ ట్రంప్ తన సోషల్ మీడియా వేదికగా, ఇరాన్ తన షరతులకు లొంగి హోర్ముజ్ జలసంధిని తెరవకపోతే, ఆ దేశ నాగరికతను పూర్తిగా తుడిచిపెట్టేస్తామని హెచ్చరించారు. ఇది కేవలం ఒక రాజకీయ ప్రకటన మాత్రమే కాదు, అంతర్జాతీయ చట్టాల ప్రకారం ఇది “యుద్ధ నేరం” కిందకు వొస్తుందని ఐక్యరాజ్య సమితి మరియు మానవ హక్కుల సంఘాలు గళమెత్తాయి.
ఒక దేశంలోని విద్యుత్ కేంద్రాలు, వంతెనలు మరియు పౌర మౌలిక సదుపాయాలను లక్ష్యంగా చేసుకోవడం వల్ల లక్షలాది మంది సామాన్యులు ప్రాణాలు కోల్పోయే ప్రమాదం ఉందని ప్రపంచ దేశాలు ఆందోళన వ్యక్తం చేశాయి. ఈ భయంకరమైన యుద్ధ వాతావరణాన్ని తగ్గించడంలో పాకిస్తాన్ తన “షటిల్ దౌత్యాన్ని” సమర్థవంతంగా ఉపయోగించింది. ట్రంప్ విధించిన ఏప్రిల్ 7 రాత్రి 8 గంటల గడువు సమీపిస్తున్న తరుణంలో, పాకిస్తాన్ ప్రధాన మంత్రి షెహబాజ్ షరీఫ్ రంగంలోకి దిగారు. దౌత్య మార్గాల ద్వారా సమస్యను పరిష్కరించడానికి సమయం ఇవ్వాలని, గడువును మరో రెండు వారాల పాటు పొడిగించాలని ఆయన ట్రంప్ను కోరారు. ఆశ్చర్యకరంగా, ట్రంప్ ఈ ప్రతిపాదనను అంగీకరించి యుద్ధాన్ని తాత్కాలికంగా వాయిదా వేశారు.
చైనాతో కలిసి పాకిస్తాన్ ఒక “శాంతి ప్రణాళికను” ప్రపంచ దేశాల ముందు ఉంచింది. అందులో ముఖ్యమైనవి 1. తక్షణ యుద్ధ విరమణ,2. హోర్ముజ్ జలసంధిలో నౌకల రాకపోకలను పునరుద్ధరించడం,3.చర్చల ద్వారా శాశ్వత పరిష్కారాన్ని కనుగొనడం,4. ఇరాన్ నాయకత్వంతో చర్చలు పాకిస్తాన్ విదేశాంగ మంత్రి ఇషాక్ దార్ రియాద్లో జరిగిన ఇస్లామిక్ సహకార సంస్థ సమావేశంలో ఇరాన్ ప్రతినిధులతో చర్చలు జరిపారు. సౌదీ అరేబియా గడ్డను ఇరాన్పై దాడికి ఉపయోగించబోమని హామీ ఇస్తూనే, ఇరాన్ కూడా ఇతర గల్ఫ్ దేశాలపై దాడులు చేయకుండా నియంత్రించడంలో పాకిస్తాన్ విజయం సాధించింది.
పాకిస్తాన్ ఈ మధ్యవర్తిత్వంలో ఇంత చురుగ్గా పాల్గొనడానికి ప్రధానంగా మూడు కారణాలు ఉన్నాయి: ఒకటి ఇరాన్తో పాకిస్తాన్కు 900 కిలోమీటర్ల పొడవైన సరిహద్దు ఉంది. ఇరాన్లో యుద్ధం జరిగితే ఆ ప్రభావం నేరుగా పాకిస్తాన్ భద్రతపై పడుతుంది.రెండు యుద్ధం సంభవిస్తే ఇరాన్ నుండి లక్షలాది మంది శరణార్థులు పాకిస్తాన్లోకి వొచ్చే ప్రమాదం ఉంది, ఇది అస్థిరతకు దారితీస్తుంది.మూడు ఇప్పటికే ఆర్థిక ఇబ్బందుల్లో ఉన్న పాకిస్తాన్, చమురు ధరల పెరుగుదలను తట్టుకోలేదు. అందుకే శాంతిని కాపాడటం పాకిస్తాన్కు ఒక అనివార్యమైన అవసరంగా మారింది. అమెరికా హెచ్చరికలు ఒక పక్క, ఇరాన్ ప్రతీకారేచ్ఛ మరో పక్క ఉన్న ఈ పరిస్థితుల్లో పాకిస్తాన్ వహించిన పాత్ర అంతర్జాతీయ సమాజంలో ఆ దేశ ప్రతిష్టను పెంచింది. ముఖ్యంగా “నాగరికతలను అంతం చేస్తామనే” అమానవీయ హెచ్చరికల నుండి ప్రపంచాన్ని చర్చల దిశగా మరల్చడం లో పాకిస్తాన్, చైనా చేసిన ప్రయత్నం అభినందనీయం.
పాకిస్తాన్ అంతర్జాతీయ రాజకీయాల్లో తరచుగా విమర్శలకు గురయ్యే దేశం. ఉగ్రవాద మూలాలు, అంతర్గత అస్థిరత కారణంగా ఆ దేశాన్ని “Rogue State” (దుష్ట దేశం) అని కొందరు పిలుస్తుంటారు. అయితే, పశ్చిమ ఆసియాలో అమెరికా, ఇజ్రాయెల్, మరియు ఇరాన్ మధ్య నెలకొన్న తీవ్ర యుద్ధ మేఘాలను తొలగించడంలో పాకిస్తాన్ పోషించిన ‘నిశ్శబ్ద దౌత్యం’ ప్రపంచ దేశాలను ఆశ్చర్యపరిచింది. పశ్చిమ ఆసియా ప్రస్తుతం ఒక అగ్నిపర్వతంలా ఉంది. ఇజ్రాయెల్-హమాస్ ఘర్షణలు, ఇరాన్ మద్దతు ఉన్న గ్రూపుల దాడులు, మరియు అమెరికా జోక్యం కలిసి ఈ ప్రాంతాన్ని మూడవ ప్రపంచ యుద్ధం అంచుకు నెట్టాయి. ఇటువంటి ఉద్రిక్త సమయంలో, ఎవరూ ఊహించని విధంగా పాకిస్తాన్ ఒక ‘శాంతి దూత’ పాత్రను పోషించడం అంతర్జాతీయ రాజకీయాల్లో ఒక కీలక మలుపు.
అయితే, ఈ ప్రశంసలు శాశ్వతంగా ఉండాలంటే పాకిస్తాన్ తన గడ్డపై ఉన్న ఉగ్రవాద మూలాలను పూర్తిగా తుడిచిపెట్టాలి. అమెరికా, ఇజ్రాయెల్, మరియు ఇరాన్ ల మధ్య యుద్ధం ఆగిపోవడం వెనుక పాకిస్తాన్ కృషి ఒక నిశ్శబ్ద విజయం. ఇది ఆ దేశానికి అంతర్జాతీయ సమాజంలో పోగొట్టుకున్న గౌరవాన్ని తిరిగి తెచ్చిపెట్టడమే కాకుండా, పశ్చిమ ఆసియాలో శాంతికి కొత్త ఆశలు చిగురింపజేసింది. పాకిస్తాన్ తన పాత ఇమేజ్ను వదిలి, ఈ కొత్త బాధ్యతాయుతమైన పాత్రను కొనసాగిస్తే, అది దక్షిణాసియా ప్రాంతానికి కూడా ఎంతో మేలు చేస్తుంది.
‘విశ్వ గురువు’ గా అనుకుంటున్న భారత్ వంటి దేశాలు వేచి చూసే ధోరణి అవలంబించగా… కారణాలు, పరిస్థితులు ఏవైనప్పటికీ పాకిస్తాన్ నేరుగా శాంతి ప్రతిపాదనలతో ముందుకు రావడం ఆ దేశ దౌత్య పరిణితిని సూచిస్తుంది. ఏది ఏమైనా, యుద్ధం వల్ల ఎవరూ గెలవరు; మానవత్వం మాత్రమే ఓడిపోతుంది. కాబట్టి చర్చలే ఏకైక మార్గమని ఈ పరిణామాలు మరోసారి నిరూపించాయి.
