పిల్లలపై పెరుగుతున్న వేడి గాలుల ప్రభావం: మన భవిష్యత్తుకు ప్రమాదం:
మన దేశంలో వేడి గాలుల తీవ్రత ఆందోళనకరంగా పెరుగుతోంది. 2020 నుండి 2024 మధ్య కాలంలో వేడి రోజులు దాదాపు రెట్టింపు అయ్యాయి. ఇది కేవలం పెరుగుతున్న ఉష్ణోగ్రత మాత్రమే కాదు, మన దేశంలోని చిన్నారుల భవిష్యత్తును ప్రమాదంలోకి నెట్టే తీవ్రమైన సమస్య. పిల్లల శరీరాలు పెద్దల మాదిరిగా వేడిని తట్టుకోలేకపోవడం వల్ల వారి ఆరోగ్యం, విద్య, భవిష్యత్తు తీవ్రంగా దెబ్బతింటున్నాయి.
పిల్లల శరీరంపై వేడి ప్రభావం – ఎందుకు ప్రమాదం?
పిల్లల శరీరాలు వేడికి భిన్నంగా స్పందిస్తాయి. వారి ఉష్ణోగ్రత నియంత్రణ వ్యవస్థ ఇంకా పూర్తిగా అభివృద్ధి చెందదు. అంటే వారి శరీరం సాధారణ ఉష్ణోగ్రతను నిలపడానికి చాలా కష్టపడుతుంది. పిల్లల చర్మం తక్కువ మందంగా ఉండటం వల్ల వారు వేడిని త్వరగా గ్రహిస్తారు. కానీ వారి చర్మంపై చెమట గ్రంథులు సరిగా అభివృద్ధి చెందకపోవడం వల్ల శరీరం చల్లబడటానికి అవసరమైన చెమటను తక్కువగా ఉత్పత్తి చేస్తాయి. ఇలా వేడిని త్వరగా పీల్చుకొని సరిగా చల్లబడకపోవడం వల్ల పిల్లల శరీర ఉష్ణోగ్రత చాలా వేగంగా ప్రమాదకర స్థాయికి పెరుగుతుంది. ఇది వడదెబ్బ వంటి తీవ్ర సమస్యలకు దారితీస్తుంది. పిల్లలు ఆడుతున్నప్పుడు వారి శరీరం ఎక్కువ వేడిని పుట్టిస్తుంది, వారి శరీరంలో నీరు త్వరగా ఆవిరైపోతుంది కాబట్టి వారు త్వరగా డీహైడ్రేషన్ బారిన పడతారు. పసిపిల్లలు, చిన్న పిల్లలు వేడి వల్ల కలిగే ఇబ్బందులను గుర్తించడానికి, వారికి నీళ్లు ఇవ్వడానికి, చల్లబరచడానికి పూర్తిగా పెద్దలపైనే ఆధారపడతారు. కాబట్టి తల్లిదండ్రులకు, చుట్టుపక్కల వారికి ఈ విషయంపై అవగాహన ఉండటం చాలా ముఖ్యం.
ఆరోగ్యంపై తీవ్ర ప్రభావం:
వేడి గాలులు పిల్లలపై తక్షణ ప్రభావం చూపడమే కాకుండా దీర్ఘకాలిక సమస్యలకు దారితీస్తాయి. వేడి వల్ల కలిగే అత్యంత ప్రమాదకరమైన స్థితి వడదెబ్బ. దీనివల్ల శరీరంలోని అవయవాలు త్వరగా పనిచేయకుండా పోవచ్చు, మెదడుకు శాశ్వత నష్టం కలగవచ్చు, ఒక్కోసారి ప్రాణాలు కూడా పోవచ్చు. తీవ్రమైన వేడి కిడ్నీ పనితీరును, మొత్తం శరీర ఆరోగ్యాన్ని దెబ్బతీస్తుంది. వేడి గాలుల సమయంలో గాలి కాలుష్యం కూడా పెరిగి, పిల్లలలో ఆస్తమా వంటి శ్వాసకోశ సమస్యలను మరింత తీవ్రం చేస్తుంది. అంతేకాకుండా, వేడి గాలులు పిల్లలకు పోషకాహార లోపాన్ని కూడా పెంచుతాయి. పంటలు పాడవడం, నీటి వనరులు తగ్గడం వల్ల ఆహార కొరత ఏర్పడుతుంది. ఇది ఇప్పటికే ఉన్న పోషకాహార లోపాలను మరింత తీవ్రం చేసి, పిల్లలలో ఎదుగుదల లోపం, బలహీనమైన రోగనిరోధక శక్తికి దారితీస్తుంది. వేడి ప్రభావం శిశువు పుట్టకముందే ప్రారంభమవుతుంది. అధిక ఉష్ణోగ్రతలు ముందుగానే ప్రసవం, తక్కువ బరువుతో పుట్టడం, పిండం ఎదుగుదల తక్కువగా ఉండటం వంటి వాటితో ముడిపడి ఉన్నాయి.
చదువుకు అడ్డంకులు – బడిలో ఇబ్బందులు:
పాఠశాలలు వేడి గాలుల సమయంలో వేడి కుంపటిగా మారతాయి. ఇది పిల్లల చదువుకు తీవ్రంగా అడ్డుపడుతుంది. ఒక్కోసారి బడులు మూసే పరిస్థితి రావచ్చు, దీనివల్ల ముఖ్యమైన చదువు సమయం వృథా అవుతుంది. పల్లెటూళ్లలో, లేదా సరైన సౌకర్యాలు లేని పట్టణ ప్రాంతాల్లోని లక్షలాది మంది పిల్లలకు ఆన్లైన్ తరగతులు అందుబాటులో ఉండవు. కాబట్టి ఈ కోల్పోయిన సమయాన్ని తిరిగి పొందలేరు. పాఠశాలలు తెరిచి ఉన్నా కూడా, సరిగా గాలి వెళ్ళని తరగతి గదుల్లోని తీవ్రమైన వేడి, పిల్లల ఆలోచనా శక్తిని బాగా తగ్గిస్తుంది. పిల్లలు తలతిరగడం, అలసిపోవడం, ఏకాగ్రత కుదరక ఇబ్బంది పడతారు. ఇది వారి నేర్చుకునే, గుర్తుంచుకునే, పరీక్షలలో బాగా రాణించే సామర్థ్యాన్ని నేరుగా ప్రభావితం చేస్తుంది. ఎయిర్ కండిషనింగ్ ఉన్న మంచి పాఠశాలల్లోని పిల్లలు చదువుకోవడం కొనసాగించవచ్చు. కానీ వెనుకబడిన ప్రాంతాల్లోని వారి తోటివారు ఎక్కువ చదువు కోల్పోతారు. తద్వారా విద్యాపరమైన అసమానతలు పెరుగుతాయి. విపరీతమైన వేడిలో బయట ఆడుకోవడం సాధ్యం కాదు, ఇది పిల్లల శారీరక, సామాజిక, భావోద్వేగ ఎదుగుదలకు అడ్డు పడుతుంది.
ఆర్థిక సమస్యలు, మానసిక ఒత్తిడి:
వేడి గాలుల ప్రభావం కేవలం ఒక్క బిడ్డకు మాత్రమే కాదు, ఇది కుటుంబాలు, సమాజాల ఆర్థిక, సామాజిక పరిస్థితులను ప్రభావితం చేస్తుంది. పొలం పనులు లేదా బయట కూలీ పనులపై ఆధారపడిన కుటుంబాలకు వేడి గాలుల వల్ల ఆదాయం తగ్గిపోతుంది. ఇది పిల్లలను బాల కార్మికులుగా మార్చి కుటుంబాన్ని పోషించడానికి సహాయపడేలా చేస్తుంది. పేద వర్గాల పిల్లలు సరైన ఇళ్లు లేని ప్రాంతాల్లో నివసిస్తూ, చల్లదనం, స్వచ్ఛమైన నీరు, వైద్యం అందుబాటులో లేక ఎక్కువగా నష్టపోతారు. శారీరక ఇబ్బందులతో పాటు, పిల్లలపై మానసిక ఒత్తిడి కూడా పెరుగుతోంది. నిరంతరం వేడి వల్ల కలిగే శారీరక అసౌకర్యం, దినచర్యలో మార్పులు, సరిగా నిద్ర పట్టకపోవడం, కుటుంబంలో పెరిగిన ఒత్తిడి పిల్లలలో ఆందోళన, డిప్రెషన్ వంటి మానసిక సమస్యలను పెంచవచ్చు. పిల్లలలో “వాతావరణం గురించి భయం” అనే భావన పెరుగుతోంది.
భవిష్యత్ కార్యాచరణ
దేశంలో పిల్లలపై వేడి గాలుల వల్ల కలిగే సమస్యను ఎదుర్కోవాలంటే కేవలం వచ్చినప్పుడు స్పందించడం కాకుండా, ముందుగానే ఆలోచించి అన్ని రంగాలను కలుపుకొని పనిచేయాలి. ముందుగా వేడి గాలుల కార్యాచరణ ప్రణాళికలను బలోపేతం చేసి గ్రామ స్థాయి వరకు తీసుకురావడం చాలా ముఖ్యం. ముఖ్యంగా పాఠశాలలు, అంగన్వాడీలు వంటి పిల్లల కోసం ఉన్న ప్రదేశాలకు, స్థానిక పరిస్థితులకు తగినట్లుగా వేడి ప్రమాదాలను అంచనా వేసి సరైన పరిష్కారాలను ఏర్పాటు చేయాలి. మెరుగైన ముందస్తు హెచ్చరిక వ్యవస్థలు ఉండాలి. అవి అన్ని వర్గాల ప్రజలకు స్థానిక భాషలలో కూడా చేరేలా చూడాలి. వేడిని తట్టుకునే భవనాలను నిర్మించడంలో పెట్టుబడి తప్పనిసరి. పాఠశాలలు, ఇళ్లలో కూల్ రూఫ్ టెక్నాలజీలు, సహజమైన చల్లదనాన్ని ఇచ్చే నిర్మాణాలు, పట్టణాల్లో చెట్లు నాటడం, పార్కులు ఏర్పాటు చేయడం వల్ల లోపల ఉష్ణోగ్రతలు గణనీయంగా తగ్గుతాయి.
ఆరోగ్య వ్యవస్థ పటిష్టంగా సిద్ధంగా ఉండాలి. అంటే అన్ని స్థాయిలలోని ఆరోగ్య కార్యకర్తల నుండి డాక్టర్ల వరకు పిల్లలలో వేడి సంబంధిత అనారోగ్యాలను గుర్తించడం, చికిత్స చేయడం, నిర్వహించడం కోసం శిక్షణ ఇవ్వడం. చివరగా, ఒక ముఖ్యమైన దీర్ఘకాలిక ప్రణాళిక వాతావరణ మార్పులు, వేడి గాలుల గురించి అవగాహనను పాఠశాల పాఠ్యాంశాల్లో చేర్చడం. పిల్లలకు వేడి నుండి తమను తాము ఎలా రక్షించుకోవాలో, ప్రథమ చికిత్స, పర్యావరణ పరిరక్షణ గురించి జ్ఞానాన్ని అందించాలి. స్వచ్ఛమైన నీరు, పరిశుభ్రత, మంచి ఆహారం, వేడి వల్ల కలిగే ఆర్థిక ఇబ్బందుల బారిన పడిన కుటుంబాలకు ప్రభుత్వ సహాయ కార్యక్రమాలు అందించడం వంటి ప్రాథమిక సామాజిక ఆర్థిక సమస్యలను పరిష్కరించడం కూడా మొత్తం స్థితిస్థాపకతను పెంచడానికి చాలా ముఖ్యం. ఈ సమగ్ర ప్రణాళికలను అమలు చేయడం ద్వారా మనదేశం వేడి గాలుల వినాశకరమైన ప్రభావాన్ని తగ్గించి పిల్లల ఆరోగ్యం, చదువు, భవిష్యత్తును కాపాడగలదు. తక్షణమే, అందరూ కలిసి పనిచేయాల్సిన సమయం ఇదే.
