1997 విజయం తర్వాత శివసేన నుండి బిఎంసి (BMC) పగ్గాలను భారతీయ జనతా పార్టీ హస్తగతం చేసుకుంది. మహారాష్ట్రలోని 29 మున్సిపల్ కార్పొరేషన్లలో 25 చోట్ల బీజేపీ ఆధిపత్యం ప్రదర్శించినప్పటికీ , బిఎంసి విజయం మాత్రం ఆ పార్టీ కిరీటంలో అత్యంత విలువైన రత్నం వంటిది. 2017తో పోలిస్తే పార్టీ పనితీరు స్వల్పంగా మాత్రమే మెరుగుపడింది (గతంలో 84 వార్డులు ఉండగా, ఇప్పుడు 89 వార్డుల్లో ఆధిక్యం సాధించింది). అయినప్పటికీ, ఈ విజయం భారీ రాజకీయ ప్రాధాన్యతను కలిగి ఉంది. మహారాష్ట్ర అధికార ‘మహాయుతి’ కూటమిలో అసలైన నాయకుడు ఎవరనేది ఇది స్పష్టం చేసింది.ముంబై కేవలం మరొక మున్సిపల్ కార్పొరేషన్ మాత్రమే కాదు. ఇది భారతదేశ ఆర్థిక రాజధాని, ముంబై మెట్రోపాలిటన్ రీజియన్ (MMR)కు ముఖద్వారం మరియు దేశంలోనే అత్యంత సంపన్నమైన పౌర సంస్థ. గత ఆర్థిక సంవత్సరంలో దీని బడ్జెట్ రూ. 74,427 కోట్లు. మౌలిక సదుపాయాలు, పట్టణాభివృద్ధి మరియు గృహనిర్మాణంపై బిఎంసి తీసుకునే నిర్ణయాలు మొత్తం ప్రాంతంపై ప్రభావం చూపుతాయి.ముంబై రాజకీయాలు దశాబ్దాలుగా ప్రాంతీయ అస్తిత్వం చుట్టూ తిరుగుతున్నాయి.
1960లో మహారాష్ట్ర ఏర్పడినప్పుడు, ముంబైని కేంద్రపాలిత ప్రాంతంగా చేయాలని కొందరు భావించారు. కానీ ‘సంయుక్త మహారాష్ట్ర ఉద్యమం’ పోరాడి ముంబైని మరాఠీ రాష్ట్రంలో భాగం చేసింది. బాల్ థాకరే స్థాపించిన శివసేన, ‘మరాఠీ మానూస్’ (మరాఠీ మనిషి) రక్షకుడిగా తన రాజకీయ పునాదిని నిర్మించుకుంది. ఇప్పుడు బిఎంసి లో అతిపెద్ద పార్టీగా బీజేపీ అవతరించడం ఈ రాజకీయ వారసత్వంలో పెద్ద మార్పును సూచిస్తుంది. ఈ ఫలితాలు ప్రత్యర్థుల కంటే ఎక్కువగా సొంత కూటమిలోని మిత్రపక్షాలకు బలమైన సందేశాన్ని పంపాయి. ఉద్ధవ్ థాకరే మరియు ఏక్నాథ్ షిండే వర్గాల మధ్య జరిగిన ప్రత్యక్ష పోరులో, ముంబైలో ఉద్ధవ్ వర్గానిదే పైచేయిగా నిలిచింది. ఇది కూటమిలో షిండే బేరసారాల శక్తిని తగ్గించింది. అజిత్ పవార్ నేతృత్వంలోని ఎన్సీపీ వర్గం ఆశించిన ప్రభావం చూపలేకపోయింది. వారి కంచుకోటలైన పింప్రి-చించ్వాడ్ మరియు పూణేలలో బీజేపీ చేతిలో ఓటమి పాలైంది.
బీజేపీ తన వ్యూహంలో భాగంగా 90 మందికి పైగా మరాఠీ అభ్యర్థులను రంగంలోకి దించింది. ముంబై మేయర్ ‘మరాఠీ హిందూ’ అవుతారని ప్రకటించడం ద్వారా థాకరే వర్గపు ‘మరాఠీ కార్డు’ను తిప్పికొట్టింది. ఈ ఏడాది బీఎంసీ ఎన్నికల ప్రచార శైలిలో స్పష్టమైన మార్పు కనిపించింది .. ఇది “ముంబైని కౌ బెల్ట్ కి దగ్గరగా తీసుకువచ్చింది . న్యూయార్క్ నగర మేయర్గా జోహ్రాన్ మమ్దానీ విజయం సాధించిన తర్వాత, ముంబైలో ఒక “ఖాన్” మేయర్ కాకుండా చూసుకోవాలని ముంబై బీజేపీ అధ్యక్షుడు అమిత్ సతం పదేపదే హెచ్చరికలు చేశారు. వీటికి తోడు, ఎన్నికల సమయంలో బీజేపీ తరపున ప్రచారం చేస్తున్న హిందుత్వ ఇన్ఫ్లుయెన్సర్లు “వోట్ జిహాద్”కు వ్యతిరేకంగా పలు మతపరమైన వీడియోలను ప్రచారానికి ఉపయోగించారు. ఈ ఎన్నికల్లో ప్రధాని మోదీ లేదా అమిత్ షా ఇమేజ్పై కాకుండా, స్థానిక నాయకత్వంపైనే భారం వేయడం విశేషం. దేవేంద్ర ఫడ్నవీస్ పాత్ర: 2019లో ఎదురుదెబ్బలు తగిలినప్పటికీ, ఇప్పుడు ఫడ్నవీస్ తన రాజకీయ పట్టును నిరూపించుకున్నారు. మహారాష్ట్రలో బీజేపీకి ఆయనే అసలైన ముఖచిత్రంగా నిలిచారు. చివరగా, “ట్రిపుల్ ఇంజిన్ సర్కార్”లో మిత్రపక్షాలను సమన్వయం చేసుకుంటూ, ముంబైని బీజేపీ ఎలా పరిపాలిస్తుందనేదే ఇప్పుడు అసలైన సవాలు.
