అపార్ట్మెంట్లో
సింప్లెక్స్ డూప్లెక్స్ ట్రిప్లెక్స్
ఈ తారతమ్యాలని
వాళ్లు ఊడ్చిపారేస్తున్నారు
చుట్టూ గోడలే తారసపడుతున్న చోట
అందరిని కలిపే కారిడార్లో కనిపించని ఫాల్స్ ప్రెస్టేజ్ అడ్డుగోడలు పెరిగిపోతుంటే
ఉరుకుల పరుగులతో వాటిని
వాళ్లు ధ్వంసం చేస్తున్నారు
ఎదురెదురు రెండు ఫ్లాట్లు కీచులాడుకుంటుంటే
మధ్యలో రైలు బండి నడుపుతూ
ఆ రెండింటి చేతులు పట్టుకొని
ప్రశాంతనగరానికెళ్దాం రండని
వాళ్లు లాక్కుపోతున్నారు
ఓనర్లంతా అతికష్టం మీద
మీటింగుకని చేరితే
మీదీ ఒక మీటింగేనా
కలిస్తే మాలా కలవండని
అలవోకగా రోజూ
వాళ్లు కలుసుకుంటూ చూపిస్తున్నారు
వాళ్లెవరు?
ఇంకెవరు
ఎప్పటికీ
వాళ్లు వాళ్లుగానే
ఉండగలిగే
పిల్లలే..
-పాయల మురళీ కృష్ణ
