ఇవిగో
రాలిపడ్డ ఆకులపై
కాలం వేసిన వేలిముద్రలు
కేలండర్ తీగపై
ఆరబెట్టిన అంకెల్లా తేదీలు
జీవితం నమిలి
ఉమ్మేసిన నిమిషాలు, గంటలు
ఇవిగివిగో
కాలదోషంలేని కథలు చెప్పే
రాతి సాలభంజికలు
ఎప్పటికీ ఎండని
రాజుగారి ఏడు చేపలు
ఇంకుడుగుంతల్లో
ఇతిహాసపు ఇసుకరేణువులు
ఇదిగో ఇదిగిదిగో
లౌల్య లోలకపు మాయలో
చిక్కుకున్న భ్రమాస్పదులు
మైనపు రెక్కలతో ఎగిరే
మోహదేశపు బేహారులు
ఆద్యంతాలు లేని
నాటకంలో పాత్రధారులు
-మల్లారెడ్డి మురళీ మోహన్
